ဘော့စ်နီးယား ဟာဇီဂိုးဗီးနား အသင်းကို တစ်ယောက်လျော့ အနေအထားမှာ အနိုင်ယူပြီး အမေရိကန်က ကမ္ဘာ့ဖလား ၁၆ သင်း ရှုံးထွက်အဆင့်ဆီ တက်ရောက်နိုင်ခဲ့ပါတယ်။ ရှေ့ပွဲစဉ်တွေမှာ ကနေဒါနဲ့ မက္ကဆီကိုတို့လည်း အသီးသီး နောက်တစ်ဆင့် တက်ထားပြီ ဖြစ်တာကြောင့် ပူးတွဲအိမ်ရှင် သုံးသင်းစလုံး ၁၆ သင်း ရှုံးထွက်အဆင့်ကို ရောက်ရှိလာခြင်းလည်း ဖြစ်ပါတယ်။
ပွဲစကတည်းက အမေရိကန်က ဘော့စ်နီးယားအပေါ် အသာစီးနဲ့ ကစားနိုင်ခဲ့ပြီး တိုက်စစ်မှူး ဖိုလာရင် ဘာလိုဂန်ရဲ့ အတိုးအလှုပ်တွေက ဘော့စ်နီးယား ခံစစ်ကို အတော်လေး အလုပ်များစေခဲ့ပါတယ်။ ပထမပိုင်း ပြီးခါနီးမှာတော့ ဘာလိုဂန်က ဆာဘီးယား ဂိုးသမားရဲ့ ခြေထောက်နှစ်ချောင်းကြားက ကန်သွင်းယူပြီး အမေရိကန်အတွက် ဦးဆောင်ဂိုး ရရှိခဲ့ပါတယ်။ ဘာလိုဂန် သွင်းတဲ့ နောက်ထပ်တစ်ဂိုးက လူကျွံနေခဲ့သလို အားထုတ်မှု တစ်ကြိမ်ကလည်း ဂိုးဘားတန်း ထိထွက်သွားတာကြောင့် အခုထက် ဂိုးပိုမရခဲ့တာပါ။
ဒုတိယပိုင်း ပြန်စပြီး မိနစ် ၂၀ လောက် အကြာမှာတော့ ဘာလိုဂန်ဟာ တိုက်ရိုက် အနီကတ်နဲ့ ထုတ်ပယ်ခြင်း ခံလိုက်ရပါတယ်။ ဘောလုံးကို ယှဉ်လုရင်း သူနဲ့ ဘော့စ်နီးယား နောက်ခံလူ တာရစ်ခ် မူဟာရီမိုဗစ်တို့ လုံးထွေး လဲကျသွားတဲ့ ဖြစ်စဉ်ကို ကွင်းလယ်ဒိုင်က ဗီဒီယို အနှေးပြကွက် (VAR) ပြန်ကြည့်ပြီးတဲ့နောက် ဘာလိုဂန်ဟာ အန္တရာယ်ရှိတဲ့ ဖျက်ထုတ်မှုမျိုး ကျူးလွန်ခဲ့ကြောင်း ဆုံးဖြတ်ပြီး အနီကတ် ပြသခဲ့တာပါ။ အနီကတ်ကြောင့် ဘာလိုဂန်ဟာ ၁၆ သင်း ရှုံးထွက်အဆင့် ပွဲစဉ်ကို အလိုအလျောက် လွဲချော်တော့မှာ ဖြစ်ပါတယ်။
တစ်ယောက်လျော့သွားပေမယ့် အမေရိကန်ဟာ စုစည်းမှု မပျက်အောင် ထိန်းသိမ်းထားနိုင်ခဲ့ပြီး ၈၂ မိနစ်မှာတော့ မာလစ်ခ်တေးလ်မန်းက ပြစ်ဒဏ်ဘောကို တိုက်ရိုက် ကန်သွင်းပြီး အနိုင်သေချာစေမယ့် ဒုတိယဂိုးကို ရယူသွားခဲ့ပါတယ်။ နောက်ပိုင်းမိနစ်တွေမှာ ဘော့စ်နီးယားက တိုက်စစ်ကို အရှိန်တင်ဖို့ ကြိုးစားလာပေမယ့် အချိန်နှောင်းနေပြီ ဖြစ်သလို ထိရောက်တဲ့ အခွင့်အရေးတွေလည်း မဖန်တီးနိုင်တာကြောင့် အမေရိကန်က နှစ်ဂိုးပြတ်နဲ့ အနိုင်ရသွားခဲ့ပါတယ်။
Public Service Announcement
အမေရိကန်ဟာ ၁၆ သင်း ရှုံးထွက်အဆင့်မှာတော့ ဘယ်ဂျီယမ်အသင်းနဲ့ ရင်ဆိုင်ကစားသွားမှာ ဖြစ်ပါတယ်။
ကိုးကား: FIFA
