ကော့ကရိတ်မြို့နယ် ကော့နွဲ့ရွာမှာ မနေ့က KNLA တပ်မဟာ ၆ နဲ့ စစ်ကောင်စီတပ်တို့အကြား တိုက်ပွဲနှစ်ကြိမ်ဖြစ်ပွားရာ စစ်ကောင်စီဘက်က တပ်ခွဲမှူးအဆင့်ရှိသူနှစ်ဦး အပါအဝင် ၇ ဦးသေဆုံးသွားခဲ့တယ်လို့ ကေအဲန်ယူသတင်းရင်းမြစ်ထံက
သိရပါတယ်။
ဒီဇင်ဘာ ၂၁ ရက်က ကေအဲန်ယူထိန်းချုပ်နယ်မြေဖြစ်တဲ့ ဒူးပလာယာခရိုင် ကော့ကရိတ်မြို့နယ် ကော့နွဲ့ကျေးရွာထဲကို နယ်မြေကျော်ရောက်ရှိလာတဲ့ စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော် KNLA တပ်တို့အကြား ရင်ဆိုင်တိုက်ပွဲနှစ်ကြိမ် ဖြစ်ပွားခဲ့တာပါ။
အဲ့ဒီ ရင်ဆိုင်တိုက်ပွဲနှစ်ကြိမ်မှာ စစ်ကောင်စီဘက်က တပ်ခွဲမှူး ၂ ဦးအပါအဝင် ၇ ဦး သေဆုံးသွားခဲ့ပြီး ၈ ဦးထိခိုက်ဒဏ်ရာရရှိသွားခဲ့တယ်လို့ နယ်မြေခံ KNLA တပ်မဟာ ၆ လုံခြုံရေးတပ်ဖွဲ့ထံကနေ သိရပါတယ်။
တိုက်ပွဲဖြစ်ပွားနေစဉ်အတွင်း စစ်ကောင်စီတပ်ဟာ ရွှေကြက်မင်းဘုရားကုန်းကနေ လက်နက်ကြီးနဲ့ အချက် ၃၀ ခန့် ပစ်ခတ်ခဲ့သေးတယ်လို့ ကေအဲန်ယူက သတင်းထုတ်ပြန်ထားပါတယ်။
Public Service Announcement
ဒီကနေ့ ဒီဇင်ဘာ ၂၂ ရက် မနက်ပိုင်းမှာလည်း ကော့နွဲ့ကျေးရွာထဲကို စစ်ကောင်စီတပ်ဖွဲ့ အင်အား ၁၀၀ ခန့် ဝင်ရောက်လာတာကြောင့် ကော့နွဲ့၊ ရွာသစ်ကုန်း၊ အံကလောင် ကျေးရွာ ၃ ရွာက ဒေသခံပြည်သူတွေဟာ စစ်ကောင်စီကိုကြောက်ရွံ့ပြီး ထွက်ပြေးတိမ်းရှောင်နေရတယ်လို့ ကေအဲန်ယူရဲ့ ထုတ်ပြန်ထားချက်အရ သိရပါတယ်။
