အောက်တိုဘာ-၄၊၂၀၂၆။ထားမြတ်/People’s Spring
ကော်သူးလေတည်ဆောက်ရေးအတွက် နယ်ပယ်အသီးသီးမှာ တာဝန်ထမ်းဆောင်နေကြတဲ့ ကျွမ်းကျင်ကရင်လူငယ်များနဲ့ ကရင်အမျိုးသားတော်လှန်ရေးအကြား မျိုးဆက်ကြား ပေါင်းကူးချိတ်ဆက်မှု ခိုင်မာစေဖို့ ရည်ရွယ်တဲ့ ညီလာခံ တရပ်ကျင်းပခဲ့ကြောင်း ကရင်အမျိုးသားအစည်းအရုံး(KNU) ဗဟိုက သတင်းထုတ်ပြန်ပါတယ်။
ကော်သူးလေနယ်မြေ တနေရာမှာ စက်တင်ဘာ ၂၈ရက်ကနေ ၃၀ ရက်အထိ ကျင်းပခဲ့တဲ့ တတိယအကြိမ်မြောက်ကရင်မျိုးဆက်ကြား ခေါင်းဆောင်မှုညီလာခံ ( KILC)ကိုKNU ဥက္ကဋ္ဌပဒိုစောကွယ်ထူးဝင်းဦးဆောင်တဲ့ KNUခေါင်းဆောင်တွေ၊ ကရင်လူငယ်ပညာရှင်တွေ၊ ဌာနအသီးသီးမှ ကိုယ်စားလှယ်တွေနဲ့ အဖွဲ့အစည်းများမှ တာဝန်ရှိသူတွေ စုစုပေါင်း လူဦးရေ ၁၃၀ ကျော် တက်ရောက်ခဲ့တယ်လို့ အသိပေးထားပါတယ်။
“KILC သည် မျိုးဆက်များအကြား အသိပညာ၊ အတွေ့အကြုံနှင့် တန်ဖိုးများ လက်ဆင့်ကမ်းနိုင်ရေးနှင့် ကော်သူးလေ၏ ရေရှည်တည်တံ့သော အနာဂတ်အတွက် တာဝန်ယူဆောင်ရွက်နိုင်မည့် ခေါင်းဆောင်မျိုးဆက်သစ်များ ပေါ်ထွန်းလာစေရန် ပူးပေါင်းဆွေးနွေးဖလှယ်သည့် ညီလာခံတစ်ရပ် ဖြစ်ပေသည်” လို့ KNUက ထုတ်ပြန်ပါတယ်။
Public Service Announcement
အခုနှစ်ညီလာခံရဲ့ ဆောင်ပုဒ်မှာ “KAWTHOOLEI TOGETHER – CROSSING THE BRIDGE: COMMITTED TO BUILDING KAWTHOOLEI TOGETHER” ဖြစ်ပြီး ဆွေးနွေးမှုများမှ လက်တွေ့ပူးပေါင်းဆောင်ရွက်မှုသို့ ရွှေ့ပြောင်းကာ မျိုးဆက်များအကြား ပူးတွဲခေါင်းဆောင်မှုနဲ့ ကော်သူးလေရဲ့ အနာဂတ်အတွက်စုပေါင်းတာဝန်ယူမှုကိုလက်တွေ့ဆောင်ရွက်သွားဖို့ ရည်ရွယ်ကြောင်း ဖော်ပြပါတယ်။
ညီလာခံမှာ KNU ခေါင်းဆောင်တွေက သူတို့ရဲ့ ဖြတ်သန်းမှု အတွေ့အကြုံတွေနဲ့ လက်ရှိ ကြုံနေရတဲ့ စိန်ခေါ်မှုတွေ အကြောင်း မျှဝေခဲ့ကြောင်းလည်း ထုတ်ပြန်ပါတယ်။ ဒါ့အပြင် ကရင်လူငယ်များ ပါဝင်ဆောင်ရွက်နိုင်မယ့် အခန်းကဏ္ဍများကို စကားဝိုင်းဆွေးနွေးပွဲများနဲ့ အပြန်အလှန်မေးမြန်းဆွေးနွေးမှုများမှတစ်ဆင့် ဖော်ထုတ်ခဲ့ကြတယ်လို့ ဆိုပါတယ်။
ကရင်ဘွဲ့ရလူငယ်များ၊ ပညာရှင်များနဲ့ ကျွမ်းကျင်သူများရဲ့ အသိပညာ၊ အတွေ့အကြုံများကို KNUရဲ့ အုပ်ချုပ်ရေး၊ အဖွဲ့အစည်းဖွံ့ဖြိုးတိုးတက်ရေးနဲ့ ကော်သူးလေတည်ဆောက်ရေးလုပ်ငန်းတွေမှာ ပိုထိရောက်စွာ ပါဝင်အသုံးချနိုင်ရေး လူ့စွမ်းအားအရင်းအမြစ်များ ချိတ်ဆက်စုစည်းနိုင်ရေးတို့ကိုလည်း ဆွေးနွေးခဲ့ကြောင်း ထုတ်ပြန်ပါတယ်။
