အောက်တိုဘာ ၆၊၂၀၂၆။ရွှေပြည်စိုး/People’s Spring
စစ်ကိုင်းတိုင်း၊ ကသာမြို့အခြေစိုက် စစ်တပ်ရဲ့ အမှတ်(၃၀၉)ခြေမြန်တပ်ရင်း(ခမရ-၃၀၉)က စစ်ကြောင်းထွက်လာတဲ့အတွက် ဒေသခံတွေ လုံခြုံရေးသတိပြုကြဖို့ တော်လှန် ရေးရဲဘော်တွေကသတိပေးပါတယ်။
အင်အား ၂၀၀ထက်မနည်းပါတဲ့ ခမရ(၃၀၉)တပ်ရင်းစစ်ကြောင်းဟာ သြဂုတ် ၅ရက်ကနေထွက်လာတာဖြစ်ပြီး အင်းတော်မြို့ဘက်ကို ဦးတည်နေတယ်လို့ ပြည်သူ့ကာကွယ်ရေးရဲဘော်တစ်ဦးက ပြောပါတယ်။
“အင်းတော်မြို့ထဲလည်း သတိထားရမယ်။ ကသာကနေ စစ်ကြောင်း လှုပ်လာတယ်။ ၃၀၉ကနေ ထွက်လာတယ်။ ထီးချိုင့်ဘက်လည်း တိုးလာတယ်”လို့ ၎င်းက ပြောပါတယ်။
Public Service Announcement
ကသာ-အင်းတော် လမ်းပိုင်းကို တော်လှန်ရေးတပ်ဖွဲ့တွေက သတိပေးထားသလို ထီးချိုင့်- အင်းတော်လမ်းပိုင်းမှာလည်း စစ်တပ်ကအင်အားဖြည့်တင်းထားတယ်လို့ သတင်းရရှိပါတယ်။ စစ်တပ်က ထီးချိုင့်မြို့ကို အလယ်ပိုင်းတိုင်းစစ်ဌာနချုပ်(လပခ)ကတဆင့် အင်အားတွေပို့ဆောင်နေတယ်လို့သိရပါတယ်။
လက်ရှိမှာ ဒေသတွင်း စစ်ရေးအခြေအနေကြောင့် ရွှေကူ-ငါးအိုးလမ်းမကြီးကို အသုံးမပြုဘဲ သတ်မှတ်ထားတဲ့လမ်းကနေသာ ပြည်သူတွေသွားလာကြဖို့ ကချင်လွတ်လပ်ရေးတပ်မတော်(KIA) ကအောက်တိုဘာ ၅ရက်မှာ သတိပေးချက်ထုတ်ပြန်ထားပါတယ်။ ပြည်သူတွေအနေနဲ့ တော်လှန်-လမ်းကူး-စီသာ-မိုးကင့်-စီဖွားလမ်းပိုင်းကိုသာ အသုံးပြုကြရမယ်လို့ KIA က ဇွန်လ ၈ရက်မှာလည်း အသိပေးခဲ့ပါတယ်။
စစ်ကိုင်းတိုင်းက ထီးချိုင့်၊အင်းတော်၊ ကသာမြို့တွေဟာ နယ်ချင်းဆက်နေပြီး ကချင်ပြည်နယ်ရွှေကူမြို့နဲ့လည်း ဆက်စပ်နေပါတယ်။
ကသာမြို့မှာ စစ်တပ်က မြို့တွင်းမှာတပ်စွဲထားပြီး ဘေးပတ်ဝန်းကျင်ရွာတွေကို တော်လှန်ရေးတပ်တွေကထိန်းချုပ်ထားပါတယ်။ ပြီးခဲ့တဲ့ ၂၀၂၅ မတ်လက ခမရ(၃၀၉)တပ်ရင်းကနေထွက်လာတဲ့ စစ်ကြောင်းကိုအင်းတော်နဲ့ ကသာမြို့ကြားမှာ ပြည်သူ့ကာကွယ်ရေးပူးပေါင်းတပ်ဖွဲ့တွေက ကြားဖြတ်တိုက်ခိုက်ခဲ့ပြီး တိုက်ပွဲအပြင်းအထန်ဖြစ်ပွားခဲ့ပါတယ်။ အဲဒီတိုက်ပွဲမှာ စစ်တပ်က အရာရှိအချို့အပါအဝင် ၃၃ဦး သေဆုံးပြီး စစ်သုံ့ပန်း၃၁ ဦးဖမ်းမိခဲ့တယ်လို့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ အမှတ်(၁) စစ်ဒေသက သတင်းထုတ်ပြန်ခဲ့ပါတယ်။
ပြီးခဲ့တဲ့မတ်လမှာလည်း ကသာမြို့မှာတိုက်ပွဲတွေဖြစ်ပွားခဲ့ပြီး စစ်တပ်ကစစ်ဘေးရှောင်တွေခိုလှုံနေတဲ့ဘုန်းကြီးကျောင်း ဗုံးကြဲတိုက်ခိုက်ခဲ့ပါတယ်။ မတ်လ ၂၅ ရက် ညနေပိုင်းတိုက်ပွဲမှာ ခမရ(၃၀၉)တပ်ရင်းကို စစ်ကူနဲ့ လက်နက်ခဲယမ်းလာပို့တဲ့ စစ်တပ်ရဟတ်ယာဉ် သုံးစီးထဲက တစ်စီးကို PDFပူးပေါင်းတပ်တွေပစ်ခတ်လို့ ထိမှန်ပြီး မဘိမ်းမြို့နယ် ငအိုး ဘောလုံးကွင်းထဲကို အရေးပေါ်ဆင်းသက်ခဲ့ရပါတယ်။
