ကရင်အမျိုးသားအစည်းအရုံး(KNU) ကော်သူးလေ အုပ်ချုပ်နယ်မြေများ၌ ဇန်နဝါရီ ၁ရက်မှ ၁၅ရက် အတွင်း တိုက်ပွဲ ၁၈၁ကြိမ်ဖြစ်ခဲ့ပြီး စစ်ကောင်စီတပ်မှ ၁၅၉ ဦးသေဆုံးကာ ၁၀၂ဦး ဒဏ်ရာရခဲ့သည်ဟု KNU ဗဟိုသတင်းနှင့် ပြန်ကြားရေးဌာနက ယနေ့ သတင်းထုတ်ပြန်သည်။
အဆိုပါ တိုက်ပွဲများအတွင်း KNU လက်အောက်ခံ ကရင်အမျိုးသားလွတ်မြောက်ရေးတပ်မတော် KNLAနှင့် ကရင်အမျိုးသားကာကွယ်ရေးတပ် KNDO တပ်တို့မှ ၁၃ဦးကျဆုံးပြီး ၁၈ဦးထိခိုက်ခဲ့သည်ဟု ဆိုသည်။
ကော်သူးလေအုပ်ချုပ်နယ်မြေများဖြစ်သည့် KNU တပ်မဟာ(၁) ဒူးသထူခရိုင်၊ တပ်မဟာ(၃) ညောင်လေးပင်ခရိုင်၊ တပ်မဟာ(၄) ဘိတ်ထားဝယ်ခရိုင်၊ တပ်မဟာ(၅) မူတြော်ခရိုင် နှင့် တပ်မဟာ(၆) ဒူးပလာယာခရိုင် များအတွင်း တိုက်ပွဲများဖြစ်ခဲ့ပြီး တပ်မဟာ(၅)နယ်မြေ တွင် တိုက်ပွဲဖြစ်ပွားမှု အများဆုံးဖြစ်သည်။
အဆိုပါ နယ်မြေများအတွင်းသို့ အာဏာသိမ်းစစ်ကောင်စီ၏ တပ်များနှင့် ၎င်းတို့၏ လက်အောက်ခံတပ်များက ပြည်သူလူထုနေထိုင်ရာကျေးရွာများနှင့် လုပ်ငန်းခွင်များ အတွင်း လက်နက်ကြီးပစ်ခတ်ခဲ့ပြီး တပ်မဟာ(၅)နှင့် တပ်မဟာ(၆)နယ်မြေများတွင် လေကြောင်းမှ ဗုံးကြဲတိုက်ခိုက်မှု လုပ်ဆောင်ခဲ့သည်ဟု ဖော်ပြထားသည်။
Public Service Announcement
စစ်ကောင်စီတပ်က ထိုသို့ လက်နက်ကြီးပစ်ခတ်မှု၊ လေကြောင်း တိုက်ခိုက်မှုများကြောင့်အပြစ်မဲ့ပြည်သူ လူထု ၇ ဦး သေဆုံးပြီး ၁၉ ဦး ထိခိုက်ဒဏ်ရာရရှိခဲ့ကြောင်း ထုတ်ပြန်သည်။
လတ်တလော KNU အုပ်ချုပ်ရေးနယ်မြေများ၌ စစ်ရှောင် ပြည်သူ ၅ သောင်းကျောင်ရှိပြီး အခက်အခဲများစွာရင်ဆိုင်နေရ၍ ကူညီထောက်ပံ့မှုရရှိရန်လိုအပ်နေကြောင်း၊ KNU ကော်သူးလေ အုပ်ချုပ်နယ်မြေအတွင်းရှိ ပြည်သူ ၁သိန်းကျော် စိုးရိမ်ကြောက်လန့်မှုများဖြင့်အသက်ရှင်နေထိုင် နေကြရကြောင်း ထုတ်ပြန်ချက်၌ ဖော်ပြထားသည်။
