အမေရိကန်အထက်လွှတ်တော်အမတ်တစ်ဦးကိုလည်း CRPH ဆက်သွယ်ဆွေးနွေး
အမျိုးသားညီညွတ်ရေးအစိုးရ(NUG) နိုင်ငံခြားရေးဝန်ကြီး ဒေါ်ဇင်မာအောင်သည် ဂျာမနီ၏ ဖက်ဒရယ်နိုင်ငံခြားရေးဝန်ကြီးဌာန၏ Minister of State ဖြစ်သူ ဒေါက်တာတိုဘီယက်လင့်နာနှင့် ယနေ့(ဇန်နဝါရီ ၂၁ရက်)ဆက်သွယ်ဆွေးနွေးသည်။
တွေ့ဆုံရာတွင် နိုင်ငံခြားရေးဝန်ကြီးဒေါ်ဇင်မာအောင်က မြန်မာနိုင်ငံတွင် အကြမ်းဖက် စစ်အုပ်စု၏ အာဏာသိမ်းရန်ကြိုးပမ်းမှုကြောင့် နောက်ဆက်တွဲ ဖြစ်ပေါ်လာသော အခြေအနေများ၊ NUG ၏ နိုင်ငံရေး လူမှုရေး ကျန်းမာရေးဆိုင်ရာ ဆောင်ရွက်ချက်များ နှင့် နိုင်ငံတကာ မျက်နှာစာတွင် ပူးပေါင်းဆောင်ရွက်နိုင်ရေးကိစ္စများကို ဆွေးနွေးခဲ့ကြောင်း NUG နိုင်ငံခြားရေးဝန်ကြီးဌာနက သတင်းထုတ်ပြန်သည်။
တဖက်တွင်လည်း ပြည်ထောင်စုလွှတ်တော်ကိုယ်စားပြုကော်မတီ(CRPH)သည် အမေရိကန်လွှတ်တော် မစ္စတာတော့ယန်းနှင့် အွန်လိုင်းမှတဆင့် ဇန်နဝါရီ ၂၀ ရက်တွင် မြန်မာ့အရေးကို ဆွေး နွေးခဲ့သည်။
Public Service Announcement
CRPH ဥက္ကဋ္ဌဦးအောင်ကြည်ညွန့်က အမေရိကန်ကွန်ဂရက်ကအတည်ပြုခဲ့သော မြန်မာ့အရေး ဆုံးဖြတ်ချက်များအတွက်ကျေးဇူးတင်ကြောင်း၊ အကြမ်းဖက်စစ်ကောင်စီတပ်များကလေကြောင်းအင်အားသုံးတိုက်ခိုက်နေမှုများကို ထည့်သွင်းဆွေးနွေးသည်။
ထို့အပြင် မြန်မာပြည်သူများကို ထိရောက်သောကူညီမှုများ ပေးနိုင်ရေးအတွက် အမျိုးသားညီညွတ်ရေးအစိုးရနှင့် ဆက်လက်ပူးပေါင်းကာ မြန်မာပြည်သူများကို အကူအညီပေးစေလိုကြောင်း နှင့် ယခုကဲ့သို့ ခက်ခဲသည့် အချိန်တွင် အမေရိကန်နိုင်ငံ၊ လွှတ်တော်နှင့် လွှတ်တော်အမတ်များအပါအဝင် နိုင်ငံတကာအသိုက်အဝန်းက မြန်မာပြည်သူများအတွက် အကူအညီများ ပေးနေခြင်းအတွက် များစွာခွန်အားဖြစ်ရကြောင်း CRPH ဥက္ကဋ္ဌက ပြောသည်။
