ကချင်ပြည်နယ် ရွှေကူမြို့ရှိ စစ်ကောင်စီလက်အောက်ခံရဲစခန်းကို ယမန်နေ့ (ဖေဖော်ဝါရီ ၆ရက်) ညပိုင်းတွင် လက်နက်ကိုင်အဖွဲ့တစ်ခုက လာရောက်တိုက်ခိုက်ခဲ့၍ တစ်နာရီခန့် အပြန်အလှန် ပစ်ခတ်မှုများ ဖြစ်ခဲ့သည်ဟု ဒေသခံက ပြောသည်။
“ဖြစ်စဉ်က ညက ၉နာရီလောက်က အသံတွေကြားတယ်။ အသံတွေဆိုတာ မိုင်းကွဲသံပေါ့။ တော်တော်ကြာတယ် တစ်နာရီလောက်ဖြစ်မယ်။ လက်နက်ငယ်သံတွေလည်းကြားတယ်။ တစ်ညလုံးတော့ လက်နက်ငယ်သံတွေ ကြားတယ်။ ဘယ်ကပစ်လဲတော့ မသိဘူး” ဟု ၎င်းက ဆိုသည်။
အဆိုပါ ပစ်ခတ်မှုကြောင့် ထိခိုက်သေဆုံးမှု အခြေအနေများကို မကြားသိရသေးကြောင်းနှင့် ယနေ့နံနက်ပိုင်း မြို့ပေါ် အခြေအနေမှာ ပုံမှန်အတိုင်း သွားလာနေကြဆဲဖြစ်ကြောင်း ဒေသခံက ပြောသည်။
ယမန်နေ့ည တိုက်ခိုက်မှုသည် ယခုလအတွင်း ရွှေကူရဲစခန်းအား သုံးကြိမ်မြောက်တိုက်ခိုက်ခံရခြင်းဖြစ်ကြောင်း၊ ဖေဖော်ဝါရီ ၁ရက်နှင့် ၂ရက်ကလည်း လာရောက်တိုက်ခိုက်မှုများ ရှိခဲ့သော်လည်း ယမန်နေ့ညပိုင်းလောက် တိုက်ပွဲပြင်းထန်မှုမရှိကြောင်း ဒေသခံက ပြောသည်။
Public Service Announcement
အဆိုပါ တိုက်ခိုက်မှုကို ကချင်လွတ်လပ်ရေးတပ်မတော်(KIA)နှင့် ပြည်သူ့ကာကွယ်ရေးတပ်(PDF) တို့ ပူးပေါင်း တိုက်ခိုက်ခြင်းဖြစ်ကြောင်း ကရင်သတင်းရင်းမြစ်အချို့က လူမှုကွန်ရက်၌ ရေးသားထားသော်လည်း သီးခြားအတည်ပြုချက်မရသေးပေ။
