အစိုးရတရပ်မဟုတ်သည့် အကြမ်းဖက်စစ်ကောင်စီက ICJ ၌ နိုင်ငံကိုယ်စားပြုခွင့်မရှိဟု NUG ပြော

အပြည်ပြည်ဆိုင်ရာတရားရုံး(ICJ)၌ ဂမ်ဘီယာက မြန်မာကို စွဲဆိုထားသောအမှုတွင် အကြမ်းဖက်စစ်ကောင်စီသည် နိုင်ငံ၏ အစိုးရတရပ်မဟုတ်သည့် အတွက် ကိုယ်စားပြုခွင့်မရှိကြောင်း အမျိုးသားညီညွတ်ရေးအစိုးရ(NUG)နိုင်ငံခြားရေးဝန်ကြီး ဒေါ်ဇင်မာအောင်က ပြောသည်။

ICJက ယနေ့(ဖေဖော်ဝါရီ ၂၁ရက်)စတင်သည့် မြန်မာ-ဂမ်ဘီယာ ဒုတိယအကြိမ်ရုံးချိန်းတွင် အကြမ်းဖက်စစ်ကောင်စီ တက်ရောက်မည့်အခြေအနေအပေါ် NUG နိုင်ငံခြားရေးဝန်ကြီးက ရှင်းလင်းပြောကြားခြင်းဖြစ် သည်။

“ရှုတ်ထွေးနေတဲ့အနေအထားက အာဏာသိမ်းလိုက်တဲ့အတွက် နိုင်ငံတော်ကို ကိုယ်စားပြုခွင့်မရှိတဲ့သူတွေက နိုင်ငံတော်ကို ကိုယ်စားပြုရမယ့်နေရာမှာလာပြီးတော့ ကိုယ်စားပြုနေတဲ့အတွက်ကြောင့် ဖြစ်နေတဲ့ ပြဿနာလို့ ဒီလိုပဲ ရှင်းရှင်းလင်းလင်းမြင်ပါတယ်”ဟု ဝန်ကြီးဒေါ်ဇင်မာအောင်က ယနေ့ပြုလုပ်သော သတင်းစာရှင်းလင်းတွင် ပြောသည်။

စစ်တပ်သည် နိုင်ငံ၏အစိတ်အပိုင်းဖြစ်ပြီး မည်သည့်စစ်တပ်ကမျှ နိုင်ငံကို ကိုယ်စားပြုခွင့်မရှိဘဲ မြန်မာပြည်သူများကလည်း စစ်တပ်ကို ၎င်းတို့အား ကိုယ်စားပြုခွင့်၊ အုပ်ချုပ်ခွင့်ပေးမထားကြောင်း NUG နိုင်ငံခြားရေးဝန်ကြီးက ရှင်းလင်းသည်။

Public Service Announcement

နိုင်ငံကို တရားမဝင်အတင်းအဓမ္မအာဏာသိမ်းရန်ကြိုးပမ်းသည့် မြန်မာစစ်တပ်သည် နိုင်ငံတနံတလျား၌ ပြည်သူလူထုအပေါ် ရက်စက်ယုတ်မာမှုများ၊ အကြမ်းဖက်မှုများ၊ လူ့အခွင့်အရေးချိုး ဖောက်ခဲ့ပြီး ယင်းသို့သော အကြမ်းဖက်အဖွဲ့ထံမှ ICJ အနေဖြင့် တရားမျှတမှုမျှော်လင့်နိုင်မည် မဟုတ်ကြောင်း ဝန်ကြီးဒေါ်ဇင်မာအောင်က ဆိုသည်။

သို့သော် မြန်မာပြည်သူလူထု၏ အာဏာအပ်နှင်းခံရသော အမျိုးသားညီညွတ်ရေးအစိုးရ(NUG)က ရိုဟင်ဂျာအရေးသာမက အာဏာမသိမ်းမီနှင့် အာဏာသိမ်းပြီးနောက်ပိုင်း မြန်မာစစ်တပ် ကျူးလွန်သောအကြမ်းဖက်မှုများအတွက် တရားမျှတမှုဖြစ်ပေါ်စေရန် ကြိုးပမ်းနေကြောင်း ပြောသည်။

“ကျွန်မတို့အနေနဲ့ တာဝန်ယူမှု၊ တာဝန်ခံမှုရှိရှိတဲ့ ကျွန်မတို့နိုင်ငံမှာဖြစ်ပေါ်သွားတဲ့ကျူးလွန်မှုတွေကို နိုင်ငံတော်အစိုးရတရပ်အနေနဲ့ပူးပေါင်းဆောင်ရွက်သွားမယ်။ တရားရုံးဆုံးဖြတ်ချက်တွေကို လိုက်နာသွားမယ်။ ကျွန်မတို့ ရပ်တည်ချက်က တရားမျှတဖို့အတွက်ပဲ။ ဖြစ်ပျက်နေတဲ့အခြေအနေတွေကို တိုင်းပြည်ထဲမှာ ဖြစ်ပျက်နေတဲ့အနေအထားအတိုင်း တင်ပြသွားဖို့ရှိတယ်။ နောက်ဆုံး ဆုံးဖြတ်ချက်က တရားသူကြီးတွေက ချမှတ်ရမှာဖြစ်တယ်။ တရားသူကြီးတွေက ချမှတ်လိုက်တဲ့ တရားရုံးဆုံးဖြတ်ချက်ကိုလည်း ကျွန်မတို့အနေနဲ့ ပူးပေါင်းဆောင်ရွက်သွားမှာဖြစ်ပါတယ်”ဟု ဝန်ကြီးဒေါ်ဇင်မာအောင်က ပြောသည်။

NUGသည် ICJ ၌ မြန်မာကိုယ်စားပြုတက်ရောက်ရှင်းလင်းရန် ကြိုးပမ်းနေသော်လည်း လက်ရှိအချိန်အထိ ရုံးတော်၏ အကြောင်းပြန်ကြားချက် မရရှိသေးပေ။

အကြမ်းဖက်စစ်ကောင်စီက ICJ ရုံးတော်၏ ဆင့်ခေါ်စာရရှိထားသဖြင့် ၎င်းတို့၏ ကိုယ်စားလှယ်အဖွဲ့ကို စေလွှတ်ထားပြီး အချို့မှာ လူကိုယ်တိုင် နယ်သာလန်ရှိ သည်ဟိဂ်ရုံးတော်၌၊ အချို့မှာ အွန်လိုင်းမှတဆင့် တက်ရောက်ရှင်းလင်းမည်ဟု သတင်းထုတ်ပြန်ထားသည်။