ဘားအံမြို့တွင် ယနေ့ ညနေပိုင်း၌ ကမ္ဘောဇဘဏ်( KBZ ဘဏ် ) ဓားပြအတိုက်ခံရပြီး ကျပ်သိန်းတစ်ထောင်ကျော်ပါသွားသည်ဟု ကြားသိရကြောင်း ဒေသခံများကပြောသည်။
ဘားအံမြို့နယ်၊ အမှတ် (၂) ရပ်ကွက်ရှိ KBZ ဘဏ်ခွဲ(၁)အတွင်းသို့ ယနေ့(မတ်လ ၄ရက်)ညနေ သုံးနာရီခန့်တွင် အမျိုးသားငါးဦးဝင်ရောက်ကာ သေနတ်ပစ်ဖောက်၍ ငွေများကိုဓါးပြတိုက် ယူသွားခြင်းဖြစ်ကြောင်း ဒေသခံများကပြောသည်။
” Mask တွေ တပ်ထားတယ်။ အချို့ကဆိုင်ကယ်ဦးထုပ်ဆောင်းထားတယ်။ သေနတ်နှစ်ချက်ဖောက်သံကြားရတယ်။ ငွေသိန်းတစ်ထောင်ကျော်ပါသွားတယ်လို့ ကြားတာပဲ။ အတိအကျတော့ မသိဘူး”ဟု အမှတ် ၂ ရပ်ကွက်တွင် နေထိုင်သူတစ်ဦးကပြောသည်။
ဘဏ်သည် ရဲတပ်ဖွဲ့နှင့် စစ်ကောင်စီတပ်ဖွဲ့များ ရှိရာနေရာနှင့်အလှမ်းမဝေးဘဲ ယခုကဲ့သို့ ဓားပြတိုက်ခံရခြင်းအပါ် ဒေသခံအချို့ကသံသယဝင်နေသည်။
Public Service Announcement
“ဒီကောင်တွေ( စစ်ကောင်စီနှင့် ရဲ) ပဲ အရပ်ဝတ်နဲ့ ဓားပြတိုက်လားမသိဘူး။ စစ်ကောင်စီဒေါက်တိုင် ခရိုနီဘဏ် အခုလို ဓားပြတိုက်ခံရတာလည်း ကောင်းတာပဲ”ဟု ဘားအံမြို့ခံတစ်ဦးကသူ့အမြင်ကိုပြောသည်။
KBZ ဘဏ်ပိုင်ရှင် ဦးအောင်ကိုဝင်သည် စစ်ကောင်စီအတွက် ဘဏ်လုပ်ငန်း၊လေကြောင်းသယ်ယူပို့ဆောင်ရေး၊စီးပွားရေးတို့တွင် ကူညီပေးနေသူဟုသတင်းကြီးသူဖြစ်ပြီး ၊ပြည်သူများ၏ ဘဏ်အကောင့်များစွာကို KBZ ဘဏ်ကစစ်ကောင်စီအလိုကျ ပိတ်သိမ်းခဲ့သည့်အတွက်လူထုက အမြင်မကြည်ဖြစ်နေသည်။ လွန်ခဲ့သည့် လေးရက်(ဖေဖော်ဝါရီ ၂၈ရက်)ကလည်း ရှမ်းပြည်နယ်မြောက်ပိုင်းရှိသီပေါမြို့မှ KBZ ဘဏ် ဓားပြတိုက်ခံရပြီး ကျပ်သိန်းတစ်ထောင် ကျော်ပါသွားခဲ့သေးသည်။KBZ ဘဏ်သည် ဘဏ်ခွဲပေါင်းတစ်ထောင်ကျော်ရှိပြီး ပြည်တွင်း၌ ဘဏ်ခွဲအများဆုံးဘဏ်ဖြစ်သည်။
စစ်တပ်အာဏာသိမ်းပြီးနောက်ပိုင်း တရားဥပဒေစိုးမိုးမှုပျက်ယွင်းနေရာ နိုင်ငံတစ်ဝန်း ဘဏ်ဓါးပြတိုက်မှုများမကြာခဏဖြစ်ပွားနေသည်။ အချို့ ဘဏ်ဓါးပြတိုက်မှုမှာ စစ်ကောင်စီရဲစခန်း၊စစ်ကောင်စီတပ်များရှိရာနေရာအနီးမှာပင် ဓါးပြတိုက်ခံနေရခြင်းဖြစ်သည်။
