ပြည်သူ့အာဏာဖီဆန်ရေးလှုပ်ရှားမှု(CDM)ဝန်ထမ်းများ လုပ်ငန်းခွင် ပြန်လည်ဝင်ရောက်ရန် စစ်ကောင်စီက လစာငွေဖြင့် မက်လုံးပေးစည်းရုံးနေပြီး အကြမ်းဖက်စစ်ကောင်စီ လက်အောက်တွင်လုပ်ငန်းပြန်လည်ဝင်ရောက်ရန်စည်းရုံးခြင်းနှင့် တိတ်တဆိတ် လစာထုတ်ယူမှုပြုလုပ်သည့် ပြည်သူ့သစ္စာဖောက်များကို စုံစမ်းဖော် ထုတ်သွားမည်ဟု ထီးလင်းမြို့နယ်ပြည်သူ့ ကာကွယ် ရေးတပ်ဖွဲ့က သတိပေးထုတ်ပြန်သည်။
အကြမ်းဖက်စစ်ကောင်စီလက်အောက်ခံ ဌာနများမှ Non CDMဝန်ထမ်းများသည် ပြည်သူ့ဘက်တော်သား CDM/နှုတ်ထွက် ဝန်ထမ်းများအား လုပ်ငန်းပြန်လည်ဝင်ရောက်ရန်နှင့် လစာများကို (ငွေသား/Kpay /Wavepay) ထုတ်ပေးမည်ဟု ပြောဆိုစည်းရုံးနေသည်ဟု ထီးလင်းမြို့နယ်ပြည်သူ့ကာကွယ်ရေးတပ်ဖွဲ့ Yaw Defence Force – Htilin က ၎င်းတို့ ရရှိထားသည့်သတင်းကို လူထုအား အသိပေးထားသည်။
အထက်ပါ အသိပေးချက်ကို ယနေ့(မတ်လ ၇ရက်) ထုတ်ပြန်ခြင်းဖြစ်ပြီး ပြည်သူ့ဘက်တော်သား CDM/နှုတ်ထွက် ဝန်ထမ်းများအနေဖြင့် ပြည်သူ့ဘက်တွင် အဆုံးထိ ဆက်လက်ရပ်တည်သွားကြရန်လည်း Yaw Defence Force – Htilinက တောင်းဆိုထားသည်။
Non CDM ဝန်ထမ်းများကို ပြည်သူ့သစ္စာဖောက်များအဖြစ် Yaw Defence Force – Htilinက သတ်မှတ်ထားပြီး အကြမ်းဖက်စစ်ကောင်စီလက်အောက်တွင် လုပ်ငန်းပြန်လည်ဝင်ရောက်ရန် စည်းရုံးမှုများနှင့် တိတ်တဆိတ် လစာထုတ်ယူမှုများပြုလုပ်သူများကို စုံစမ်းဖော် ထုတ်သွား မည်ဖြစ်ကြောင်း သတိပေးထားသည်။
ယောဒေသမှ ထီးလင်းမြို့သည် စစ်ကောင်စီဆန့်ကျင်ရေး အင်အားကောင်းသည့် ဒေသဖြစ်ပြီး ဌာနဆိုင်ရာ ဝန်ထမ်းစုစုပေါင်း အရေအတွက်၏ ၇၀ ရာခိုင်နှုန်းခန့်သည် စစ်အာဏာရှင်ဆန့်ကျင်သည့်အနေဖြင့် CDM ပြုလုပ်နေကြသည်ဟု CDM ဝန်ထမ်းတစ်ဦးက ပြော သည်။