အကြမ်းဖက်စစ်ကောင်စီတပ်က လမ်းများပိတ်၍ ရမ်းကားမှုပြုလုပ်
အကြမ်းဖက်စစ်ကောင်စီက လုံခြုံရေးတင်းကြပ်နေသည့်ကြားမှ ရန်ကုန်ပြည်သူ များနှင့်အတူ ရေဘဝဲနှင့် မဟာမိတ်အဖွဲ့အစည်းများမှ ဦးဆောင်၍ ယနေ့ (ဇူလိုင် ၃၁) ညနေပိုင်း၌ “လူထုသစ္စာအဓိဌာန်ပြုပွဲ” ပြုလုပ်ခဲ့ကြသည်။
ဆန္ဒပြ လူငယ်များက” တရားတဲ့သူသာ နိုင်ကြေးဟေ့၊အားလုံးစုစည်းနေရင် ဘာမှမဖြစ် ” စာတန်းကိုကိုင်ဆွဲကာ ဦးဂျင်မီ၊ ဦးဖြိုးဇေယျာသော် မျက်နှာပုံများကို အသီးအသီးကိုင်ဆောင်လျက် ပြည်သူလူထုနှင့်အတူ သစ္စာအဓိဌာန်ပြုခဲ့သည်။
ယခုကဲ့သို့ သစ္စာအဓိဌာန်ပြုပွဲ ကျင်းပသည့်အတွက် စစ်ကောင်စီဝင်များ လာရောက်အကြမ်းဖက်ပြီး အကြောက်တရား ထည့်သွင်းနိုင်သည့်အကြောင်း ပြောကြားကာ တော်လှန်ရေးလူငယ်များက ပြည်သူများကို ဒူးထောက် တောင်းပန်စကားဆိုခဲ့ကြသည်။
အာဏာရှင်ဆန့်ကျင်ရေး ဆန္ဒပြပွဲပြုလုပ်သည့် လူငယ်များက ၎င်းတို့ပွဲပြီးချိန်၌ စစ်ကောင်စီ၏ အကြမ်းဖက်မှုများကြုံလာနိုင်ကြောင်းပြောကြား၍ ယင်းကိစ္စအတွက်အနူးအညွှတ် တောင်းပန် ကြောင်းနှင့် တော်လှန်ရေးလူငယ်များကို ခွင့်လွှတ်ကြရန် ဒူးထောက်၍ ပြောကြားခဲ့ခြင်း ဖြစ်သည်။
Public Service Announcement
အာဏာရှင်ဆန့်ကျင်ရေး ဆန္ဒပြပွဲပြုလုပ်သည့် နေရာများကို ဖိအားပေးလေ့ရှိ သည့် အကြမ်းဖက် စစ်ကောင်စီက ယနေ့ညနေပိုင်းတွင် လှိုင်မြို့နယ် (၇)ရပ်ကွက်၌ လမ်းများကို ပိတ်၍ ရမ်းကားမှုများ ပြုလုပ်ခဲ့သည်။
ဇူလိုင် ၃၁ ရက် ညနေတွင် လှိုင်မြို့နယ် (၇)ရပ်ကွက် မယ်ဇလီကုန်းလမ်း၌ လူငယ်များက အာဏာရှင်ဆန့်ကျင်ရေး လှုပ်ရှားမှုပြုလုပ်ခဲ့ခြင်းဖြစ်သည်။
ယင်းပွဲ ပြုလုပ်ပြီး၍ မိနစ်ပိုင်းအကြာတွင် အကြမ်းဖက်စစ်ကောင်စီကားနှစ်စီး အဆိုပါနေရာသို့ လာရောက်ကာ ယင်းနေရာအနီးအနားမှ ဆိုင်များကိုပိတ်ရန် နှင့် ဆိုင်အချို့မှလူများကို လမ်းမပေါ်ထွက်၍ထိုင်ခိုင်းခဲ့ကြောင်း မျက်မြင် တွေ့ခဲ့ရသူများက ပြောသည်။
“လက်ဖက်ရည်ဆိုင်ကလူတွေကို လမ်းပေါ်မှာ ငုတ်တုတ်ထိုင်ခိုင်းတာ။ တကယ်တမ်းသူတို့လာတဲ့ အချိန် ကလေးတွေက မရှိတော့ဘူး။ “ဟု ယင်းနေရာ အနီး၌ နေထိုင်သူတစ်ဦးက ပြောသည်။
ထို့နောက် ကျောင်းကုန်း (၃)လမ်းထိပ်၌ ကားပိတ်ရပ်၍ ယင်းလမ်းကို တစ်ဖက်သို့ ဖြတ်ခွင့်မပေးဘဲ နှစ်နာရီခန့်ပိတ်ဆို့ စစ်ဆေးခဲ့သည်။
“အမေ့ကိုဆေးခန်းပြမှာဆိုတာတောင် ပေးမဖြတ်ခိုင်းဘူး”ဟု အမျိုးသမီးတစ်ဦးက ပြောသည်။
အကြမ်းဖက်စစ်ကောင်စီတပ်ဖွဲ့ဝင်များနှင့်အတူ သေနတ်လွယ်ထားသည့် အရပ်ဝတ်အမျိုးသားများ လည်း ပါဝင်ပြီး ယင်းနေရာအနီးတဝိုက်ကိုလည်း ပတ်ရမ်းသွားကြောင်း အမျိုးသားတစ်ဦးက ပြောသည်။
လမ်းပိတ်ထားသည့်အချိန်သည် အလုပ်ဆင်းလာသူများ၏ အိမ်ပြန်ချိန် ဖြစ်သောကြောင့် ပြည်သူအများ အခက်အခဲကြုံခဲ့ရပြီး အချို့သူများသည် အိမ်ပြန်ရန်အတွက် တစ်နာရီခန့် စောင့်ဆိုင်းခဲ့ရသည်။
ည ၇ နာရီခွဲအချိန်ခန့်တွင် လမ်းကိုဖြတ်သန်းခွင့်ပြန်ပေးခဲ့သည်။ အထက်ပါ ဖြစ်စဉ်၌ ဖမ်းဆီးခံရသူ များရှိသည်ဟု ပြောဆိုမှုများရှိသော်လည်း လူထုနွေဦးအနေဖြင့် အတည်ပြုနိုင်ခြင်းမရှိပေ။
ပြီးခဲ့သည့်ရက်ကလည်း အာဏာရှင်ဆန့်ကျင်ရေးပွဲ ပြုလုပ်သည့်နေရာမှ ဈေးသည်များကို အကြမ်းဖက်စစ်ကောင်စီက ဖိနှိပ်မှုများပြုလုပ်ခဲ့သည်။
“ကလေးတွေနဲ့ ပြည်သူတွေကို ရန်တိုက်ပေးနေတာ ။ နောက်ကို ပွဲတွေ လာမလုပ်အောင်။ “ဟု အသက် (၅၀)ကျော်အရွယ် အမျိုးသားတစ်ဦးက ပြောသည်။
ဓာတ်ပုံ – AAMIJ
