ဂျာမနီ နိုင်ငံက ရိုလာကိုစတာတစ်ခုမှာ မတော်တဆမှု ဖြစ်ပွားရာက လူ ၃၀ ကျော် ထိခိုက်ဒဏ်ရာ ရခဲ့ကြောင်း သိရပါတယ်။
ဂွန့်ဇ်ဘက်ဂ် မြို့နားမှာရှိတဲ့ Legoland အပန်းဖြေ ဥယျာဉ်ရဲ့ ထုတ်ပြန်ချက်အရ ရိုလာကိုစတာပေါ်မှာ အပျော်စီး ရထားတွဲနှစ်စီး အချင်းချင်း တိုက်မိခဲ့တာလို့ သိရပါတယ်။ ဩဂုတ် ၁၁ ရက်က မတော်တဆ ဖြစ်ရပ်ကြောင့် လူ ၃၁ ဦး ဒဏ်ရာရခဲ့ပြီး ၁ ဦးရဲ့ အခြေအနေက ပြင်းထန်တယ်လို့ မီးသတ်နဲ့ ကယ်ဆယ်ရေး ဌာနက ထုတ်ပြန်ပါတယ်။
Fire Dragon ရိုလာကိုစတာမှာ ကြုံတွေ့ခဲ့တဲ့ ကိစ္စနဲ့ ပတ်သက်လို့ အလေးအနက် စုံစမ်း စစ်ဆေးသွားမယ်လို့ အပန်းဖြေ ဥယျာဉ်က ကတိပေးထားပြီး ဒီအတောအတွင်း ရိုလာကိုစတာကိုလည်း ယာယီ ပိတ်ထားမှာ ဖြစ်ပါတယ်။ မျက်မြင်တွေရဲ့ အဆိုအရ ရထားတစ်စီးဟာ ရုတ်တရက် ရပ်တန့်သွားရာက နောက်တစ်စီးနဲ့ တိုက်မိခဲ့တာလို့ သိရပါတယ်။
ဒီလိုတွေ ဖြစ်ပျက်ခဲ့ရတဲ့ အကြောင်းရင်းကိုတော့ လောလောဆယ် အတိအကျ မပြောနိုင်သေးကြောင်း၊ ဒီကိစ္စမျိုးက အရမ်းရှားပါးတဲ့ ဖြစ်တောင့်ဖြစ်ခဲ အခြေအနေလို့ သတ်မှတ်ရမှာဖြစ်ကြောင်း Legolandရဲ့ ထုတ်ပြန်ချက်မှာ ဖော်ပြထားပါတယ်။
Public Service Announcement
ရထားနှစ်စီးပေါ်မှာ စုစုပေါင်း လူ ၃၈ ဦး လိုက်ပါလာပြီး ၃၁ ယောက်က ဒဏ်ရာရခဲ့ကြပါတယ်။ အဲဒီထဲက ၁၄ ယောက်ကို ဒဏ်ရာအခြေအနေ သေချာစစ်ဆေးဖို့ ဆေးရုံ ပို့ဆောင်ခဲ့ပြီး ၁ ဦးကတော့ ဒဏ်ရာပြင်းတဲ့အတွက် ဆေးရုံမှာ ရက်အတော်ကြာ ကုသမှု ခံယူရဦးမှာပါ။
မတော်တဆမှုအပြီး ကယ်ဆယ်ရေး လုပ်ငန်းတွေ ဆောင်ရွက်ဖို့ Legolandကို ရဟတ်ယာဉ် ၃ စီး ဆင်းသက်လာတာကိုလည်း တွေ့ရကြောင်း ဂျာမန် မီဒီယာတွေက ဖော်ပြပါတယ်။ ရထားနှစ်စီး တိုက်မိပြီးတဲ့နောက် ရိုလာကိုစတာပေါ်မှာ စီးနင်းသူတွေ ပိတ်မိနေတာကြောင့် မီးသတ်ကား နှစ်စီးက လှေကားထောင်ပြီး ကူညီ ရွှေ့ပြောင်းပေးခဲ့ရပါတယ်။
Fire Dragonဟာ တွန့်လိမ်ကွေ့ကောက်နေတဲ့ သံလမ်းပေါ်မှာ တည်ဆောက်ထားတဲ့ ရိုလာကိုစတာ အကြီးစားတစ်ခုဖြစ်ပြီး ရထားတွဲတွေဟာ တစ်နာရီ ၁၈ မိုင် မြန်နှုန်းလောက်နဲ့ ပြေးလွှားနေလေ့ရှိကြောင်း သိရပါတယ်။
