ဧရာဝတီတိုင်းဝန်ကြီးချုပ်ဟောင်း မန်ဂျောနီ ယူနီဖောင်းအပြည့်နဲ့ လက်နက်ကိုင်ထားတဲ့ ဓါတ်ပုံတစ်ပုံကို ဒေါကလူကွန်ရက်ကနေ ဒီနေ့ ဖေ့စ်ဘွတ်ခ်မှာ တင်လိုက်ပါတယ်။
အမျိုးသားဒီမိုကရေစီအဖွဲ့ချုပ်ပါတီ နာယက ဖြစ်တဲ့ မန်းဂျော်နီဟာ ဧရာဝတီတိုင်းဝန်ကြီးချုပ်တာဝန်ကို ၂ နှစ်လောက်တာဝန်ထမ်းဆောင်ခဲ့သူဖြစ်ပါတယ်။
ဒေါကလူကွန်ရက်က “သူ့ကိုသိကြလား။ NLDနဲ့အတူတသက်လုံးအခါးတလှည့်အချိုတလှည့် ပေးဆပ်ဖြတ်သန်းလာခဲ့ပြီး ဧရာဝတီတိုင်း၏ဝန်ကြီးချုပ်တစ်ဦးအဆင့်အထိ နိုင်ငံတာဝန်ထမ်းဆောင်ခဲ့သည်။ လက်နက်အားကိုးအာဏာရှင်ကြီးစိုးတဲ့ဒီနိုင်ငံမှာ ဒီမိုကရေစီအစစ်အမှန်အတွက် သေနတ်ကိုင်ရမှဖြစ်မယ့်အခြေ အနေမို့ မန်းတစ်ယောက် ကရင်လူမျိုးပီပီ ကရင့်တော် လှန်ရေးမှာ ကိုယ်တိုင်ပါဝင်နေခဲ့ပါပြီ။ မန်းကိုချစ်ခင်အားပေးတဲ့သူများ အမှတ်တရစကားလေးတစ်ခွန်းပြောခဲ့ပါအုံး”လို့ ရေးထားပါတယ်။
ဓါတ်ပုံထဲမှာ KNU ဝတ်စုံအပြည့်နဲ့ လက်နက်ကိုင်ထားတဲ့ မန်ဂျော်နီဟာအသက် ၈၀ ရှိနေပေမယ့် ကျန်းမာရေးကောင်းမွန်နေပုံပေါ်လွင်နေပါတယ်။ ဧရာဝတီတိုင်း ဝန်ကြီးချုပ်ဟောင်းဟာ လွှတ်တော်တက်ခဲ့စဥ်က စည်ပင်ရိပ်သာမှာ ခြင်းခတ်လေ့ရှိသလို ၊ဝန်ကြီးချုပ်တာဝန်ထမ်းဆောင်စဥ်ကလည်း ဘောလုံးကန်ခဲ့သေးကာ အားကစားလိုက်စားပြီး ကျန်းမာရေးကောင်းမွန်သူဖြစ်ပါတယ်။
Public Service Announcement
