ဖားကန့်မြို့နယ်ရှိ ကချင်လွတ်လပ်ရေးတပ်မတော်(KIA)တပ်မဟာ(၉)အခြေစိုက်စခန်းကို ယနေ့ညပိုင်းတွင် စစ်ကောင်စီတပ်က တိုက်လေယာဉ် သုံးစင်းဖြင့် ဗုံးလာကြဲနေကြောင်း သတင်းရရှိသည်။
ဖားကန့်မြို့နယ် ကံစီးကျေးရွာပတ်ဝန်းကျင်ကို စစ်ကောင်စီတပ်က ယနေ့(အောက်တိုဘာ ၂၃ရက်)ည ၈နာရီခွဲခန့်တွင် လေကြောင်းမှ လာရောက်တိုက်ခိုက်ခြင်းဖြစ်သည်။
“ကံစီးဘက်က ကေအိုင်အေ တပ်မဟာ(၉)ကို ဗုံးကြဲတာ။ ဖားကန့်မြို့ပေါ်မှာလည်း တိုက်လေယာဉ်တွေ ဝဲတယ်။ ကျွန်တော်တို့ တပ်မဟာ(၉)ဘက်ကို ကြိုပြီးသတင်းပို့နိုင်တယ်”ဟု ဖားကန့်ဒေသမှ ပြည်သူ့ကာကွယ်ရေးတပ်ဖွဲ့နှင့် နီးစပ်သူတစ်ဦးက ပြောသည်။
ဖားကန့်မြို့ ဝေခါနှင့် ဆိပ်မူကျေးရွာတို့တွင်လည်း ယနေ့ည ၉နာရီခန့်ထိ စစ်ကောင်စီတိုက်လေယာဉ်နှစ်စီး ပျံဝဲနေ၍ ဒေသခံများ စိုးရိမ်နေသည်။
စစ်ကောင်စီတပ်သည် မိုးမောက်မြို့နယ်အတွင်း ယမန်နေ့ကစ၍ နှစ်ရက်ဆက်ဖြစ်နေသော KIA၊ PDF ပူးပေါင်းတပ်နှင့် တိုက်ပွဲတွင်လည်း အထိနာပြီး လေကြောင်းအသုံးပြုတိုက်ခိုက်နေသည်။