ရှမ်းပြည်နယ်မြောက်ပိုင်း လားရှိုးမြို့နယ်၌ တိုက်ပွဲဆက်လက်ဖြစ်ပွားခဲ့ပြီး စစ်ကောင်စီတပ်ဘက်က သေဆုံးထိခိုက်မှုရှိခဲ့ကြောင်း ကိုးကန့်တပ်မတော် (MNDAA)က ယနေ့ ထုတ်ပြန်သည်။
နိုဝင်ဘာ ၁၅ ရက်တွင် လားရှိုးမြို့ နမ့်ပုံကျေးရွာတွင် MNDAAနှင့် စစ်ကောင်စီတပ်တိုက်ပွဲဖြစ်ပွားခဲ့ပြီးနောက် နိုဝင်ဘာ ၁၆ရက်တွင် ဆက်လက်တိုက်ပွဲဖြစ်ခဲ့သည်ဟု ဆိုသည်။
MNDAA တပ်ဖွဲ့ နယ်မြေကင်းလှည့်ချိန် စစ်ကောင်စီ၏ စကခ(၁၆) လက်အောက်ခံ တပ်ရင်း (၂၉၁)သည် လူအင်အား(၁၅၀)ဖြင့် နမ့်ပုံဒေသတစ်လျှောက်စုဝေးနေသည်ကိုတွေ့ရ MNDAA တပ်ခွဲမှူးက တိုက်ခိုက်ရေးအဖွဲ့ကို စုစည်းပြီး စစ်ကောင်စီတပ် စုဝေးရာနေရာကို တိုက်ခိုက်ခဲ့သည်ဟု ဆိုသည်။
“ကင်းစောင့်တဲ့ စစ်ကောင်စီတပ်သားကို အရင်ချေမှုန်းပြီးတော့ သူတို့ ရှိတဲ့နေရာကို ဝင်ပြီးတော့ ပစ်ခတ်တာပေါ့။ အဲဒီလို သွားရောက်ပစ်ခတ်တော့ MNDAA အဖွဲ့က အထိအခိုက် ကျဆုံးမှုမရှိခဲ့ဘူး။ အလစ်တိုက်တယ် အမြန်ထွက်ခွာတယ်ဆိုတော့ စစ်ကောင်စီ ကျဆုံးဒဏ်ရာရတာ ကောင်းကောင်း မသိခဲ့ဘူး။ အနည်းဆုံး တစ်ယောက်တော့ ကျတယ် အဲဒီ ကင်းတပ်သားတော့”ဟု ကိုးကန့် သတင်းရင်းမြစ်က ယမန်နေ့တွင် People’s Spring သတင်းဌာနသို့ ဖြေကြားထားသည်။
Public Service Announcement
MNDAA၏ ယနေ့ ထုတ်ပြန်ချက်တွင်လည်း စစ်ကောင်စီတပ်မှ တစ်ဦး သေဆုံးပြီး ဒဏ်ရာရသူများ ရှိခဲ့ကြောင်း၊ တပ်စခန်း အဆောင် တစ်ခုကိုလည်း ဖျက်ဆီးခဲ့ကြောင်း ဖော်ပြထားသည်။
စစ်ကောင်စီတပ်သည် နိုဝင်ဘာ ၁၇ရက် နေ့လယ်ပိုင်း၌ အဆိုပါ တိုက်ပွဲဖြစ်ပွားရာဒေသသို့ စစ်လေယာဉ် ၂စီးဖြင့် လာရောက်ကင်းလှည့်ခဲ့သည်ဟု MNDAAက ထုတ်ပြန်သည်။
လားရှိုးမြို့နယ်တွင် နိုဝင်ဘာ ၁၅ရက်က ဖြစ်ပွားခဲ့သည့် တိုက်ပွဲတွင် MNDAA တပ်ဖွဲ့၏ မိုင်းဖြင့်တိုက်ခိုက်မှု၊ ကြားဖြတ်တိုက်ခိုက်မှုကြောင့် စစ်ကောင်စီတပ်မှ ၁၃ဦး သေဆုံးပြီး ၁၅ဦးခန့် ဒဏ်ရာရခဲ့သည်ဟု ကိုးကန့်သတင်းရင်းမြစ်က ပြောကြားထားသည်။
