ပအိုဝ်းပြည်သူများအနေဖြင့် ပအိုဝ်းအမျိုးသားလွတ်မြောက်ရေးတိုက်ပွဲ၊ စစ်အာဏာရှင်စနစ်အမြစ်ပြတ်ချေမှုန်းရေးနှင့် ဖက်ဒရယ်ဒီမိုကရေစီ ပြည်ထောင်စုတည်ဆောက်ရေး တိုက်ပွဲတို့တွင် ပအိုဝ်းအမျိုးသားဖက်ဒရယ်ကောင်စီ(PNFC) နှင့်အတူ ဆထက်ထမ်းပိုးလက်တွဲ၍ တိုက်ပွဲဝင်ကြရန် PNFCက ယနေ့ ပန်ကြားလိုက်သည်။
PNFCက ယနေ့(ဒီဇင်ဘာ ၁၁ရက်) ကျင်းပသည့် (၇၃)နှစ်မြောက် ပဒေသရာဇ်စနစ်ဆိုးဆန့်ကျင်တော်လှန်ရေးနေ့ အထိမ်းအမှတ် ထုတ်ပြန်ချက်တွင် အထပ်ပါအတိုင်း ဖော်ပြခဲ့ခြင်းဖြစ်သည်။
လက်ရှိ အခြေအနေများအရ ဗမာအပါအဝင် တိုင်းရင်းသားလူမျိုးပေါင်းစုံ ပြည်သူလူထု အပေါ် ချုပ်ကိုင် ချယ်လှယ်ခဲ့သော စစ်အာဏာရှင်စနစ်သည် ပဋိပက္ခ ပေါင်းစုံတို့ဖြင့် ပြိုကွဲလုနီးနီးဖြစ်နေပြီဖြစ်ကြောင်း PNFCက ဆိုသည်။
စစ်အုပ်စု၏ အဆုံးစွန်သော ဖိနှိပ်ရက်စက်မှုတို့နှင့်အတူ ဗမာအပါအဝင် တိုင်းရင်းသား လူမျိုးပေါင်းစုံ ပြည်သူလူထုတစ်ရပ်လုံး၏ စစ်အုပ်စုအပေါ် စက်ဆုပ်ရွံရှာ မုန်းတီးမှုသည် အထွတ်အထိပ်တို့ ရောက်နေပြီဖြစ်၍ စစ်အာဏာရှင်စနစ်၏ တရားဝင်မှုသည် လုံး၀လွင့်ပျောက် ကုန်ဆုံးသွားပြီဖြစ်ကြောင်း ဖော်ပြသည်။
Public Service Announcement
စစ်အုပ်စုသည် စစ်ရေးအရ ရှုံးနိမ့်မှုများကို ဆက်လက်ရင်ဆိုင်နေရပြီး အုပ်ချုပ်ရေးယန္တရားကိုလည်းအပြည့်အ၀ ကိုင်တွယ်နိုင်စွမ်းမရှိတော့ကြောင်း၊ နိုင်ငံတကာ ဆက်ဆံရေး၌လည်း လက်တဆုပ်စာ နိုင်ငံများကလွဲ၍ စစ်အုပ်စု၏ ကိုယ်စားပြုပိုင်ခွင့်သည် သုညအဆင့်သို့ ရောက်ရှိနေပြီဖြစ်ကြောင်း PNFCက ဆိုသည်။
“ပြည်သူလူထု တစ်ရပ်လုံးကလည်း အင်နဲ့အားနဲ့ အရှိန်နဲ့ အဟုန်နဲ့ကြိုးပမ်းဆောင်ရွက်နေသလို နိုင်ငံတကာ မိတ်ဆွေများနဲ့ ပြည်တွင်းပြည်ပ နိုင်ငံတကာမှာရှိတဲ့အားလုံးရဲ့ ထောက်ပံ့မှုတွေ ကူညီမှုတွေနဲ့ ဒီတော်လှန်ရေးဟာ အောင်မြင်မယ်ဆိုတာကို ယုံကြည်ပါကြောင်း ပြောကြားလိုပါတယ်”ဟု PNFC ဥက္ကဋ္ဌက ယနေ့ကျင်းပသည့်အခမ်းအနားတွင် ပြောကြားသည်။
အဆိုပါအခမ်းအနားတွင် နွေဦးတော်လှန်ရေး၌ ပါဝင်နေသည့် ပအိုးအမျိုးသား ကာကွယ်ရေးတပ်ဖွဲ့(ခမ်းကောင်) (PNDF-KK) နှင့် ပအိုဝ်းပြည်သူ့ကာကွယ်ရေးတပ်(PPDF-KD)တို့က စစ်ရေးလှုပ်ရှားဖော်ဆောင်မှု အပါအဝင် တစ်နှစ်တာအတွင်း လှုပ်ရှားမှုများကို အစီရင်ခံတင်ပြခဲ့သည်။
