ယူကရိန်းနိုင်ငံ အရှေ့ပိုင်းက ရုရှားနဲ့ ယူကရိန်းတပ်တွေ အကြိတ်အနယ် စစ်ခင်းနေရာ ဘက်ခ်မတ် မြို့ထဲမှာ တိုက်ပွဲတွေက မြို့ထဲထိ ရောက်လာခဲ့ကြောင်း သိရပါတယ်။
ဘက်ခ်မတ်မှာ အရပ်သား ၄၀၀၀ လောက်က အတတ်နိုင်ဆုံး ဘေးအန္တရာယ် ကင်းလောက်တဲ့ နေရာတွေမှာ ခိုလှုံနေကြပြီး သောက်ရေ၊ လျှပ်စစ်နဲ့ ဓာတ်ငွေ့ ပြတ်လပ်မှုတွေ ကြုံနေတယ်လို့ ဘက်ခ်မတ်ရဲ့ ဒုတိယ မြို့တော်ဝန် အိုလက်ဆန်ဒါ မာချန်ကိုက ပြောပါတယ်။
ဒွန်းဘက်စ်ခ် ဒေသမှာရှိတဲ့ ဘက်ခ်မတ်မြို့ဟာ ရုရှားရဲ့ ထိုးစစ်ကို ဆောင်းရာသီ တလျှောက်လုံး ကြံ့ကြံ့ခံ အံတုခဲ့ပေမယ့် ပြီးခဲ့တဲ့ ရက်ပိုင်းတွေအတွင်း ရုရှားဖက်က သိသိသာသာ စစ်ရေးသာလာသလို မြို့ကို ဝန်းရံ ပိတ်ဆို့လာခဲ့ပါတယ်။ အဲဒီနောက် မြို့ထဲက ခုခံရေး တပ်တွေကို ပြန်ရုပ်သိမ်းဖို့ စဉ်းစားနေကြောင်း ယူကရိန်း အစိုးရက ဝန်ခံခဲ့ပါတယ်။
အခုတော့ တိုက်ပွဲတွေဟာ မြို့ရဲ့ လမ်းတွေထဲထိ ကူးစက်ရောက်ရှိလာပေမယ့် ရုရှားတပ်တွေက ဘက်ခ်မတ်ကို မထိန်းချုပ်နိုင်သေးဘူးလို့ မာချန်ကိုက အတည်ပြုပါတယ်။
Public Service Announcement
မြို့ထဲမှာလည်း အကောင်းအတိုင်း ကျန်တဲ့ အဆောက်အအုံရယ်လို့ လက်ကျန် မရှိတော့ဘဲ တစ်မြို့လုံးနီးပါး ပျက်စီးနေပြီလို့ သူက ဆက်ပြောပါတယ်။
ရုရှားဟာ ပြီးခဲ့တဲ့ လပိုင်းတွေ အတွင်းမှာ ထိန်းချုပ်နယ်မြေတွေ ဆက်တိုက် လက်လွှတ်ခဲ့ရပြီး စစ်မြေပြင်မှာ အဆုံးအရှုံးတွေ ဆက်တိုက် ကြုံနေခဲ့ရပါတယ်။ တကယ်လို့ ဘက်ခ်မတ်ကိုသာ သိမ်းယူနိုင်ခဲ့မယ်ဆိုရင် ရုရှားအတွက် ရှားရှားပါးပါး စစ်မြေပြင် အောင်ပွဲတစ်ခု ဖြစ်လာနိုင်ပါတယ်။
မြို့ပြင် ဆင်ခြေဖုံး ဧရိယာတွေမှာ တိုက်ပွဲတွေ ပြင်းထန်နေသလို လမ်းတွေပေါ်ထိလည်း အပြန်အလှန် ပစ်ခတ်မှုတွေ ဖြစ်ပေါ်လာပြီလို့ မာချန်ကိုက အတည်ပြုပါတယ်။
ရုရှားအနေနဲ့ ဘတ်ခ်မတ်ကို အရင်းအနှီး ကြီးကြီး စိုက်ထုတ်ပြီး သိမ်းယူဖို့ ကြိုးစားနေပေမယ့် စစ်ရေး သုတေသီ တချို့က အဲဒီမြို့ရဲ့ မဟာဗျူဟာ တန်ဖိုးကို မေးခွန်းထုတ်နေကြပါတယ်။ လူဦးရေ ၇၅၀၀၀ လောက် နေထိုင်ခဲ့ဖူးပြီး သတ္တုတွင်း လုပ်ငန်းတွေ အဓိက ဖွံ့ဖြိုးရာ မြို့ကို သိမ်းယူဖို့အတွက် ရုရှားစစ်သည် ထောင်သောင်းချီ အသက်ဆုံးရှုံးခဲ့တယ်လို့ ယူဆရပါတယ်။
မာချန်ကိုကတော့ ဘက်ခ်မတ်ဟာ တစ်မြို့လုံးနီးပါး ပျက်စီးနေပြီး ရုရှားအတွက် အခြေစိုက် စခန်းအဖြစ် အသုံးပြုနိုင်စရာတောင် မရှိတော့ပေမယ့် ရုရှားတပ်တွေက အသည်းအသန် တိုက်ခိုက်နေတာဟာ ယူကရိန်း ပြည်သူတွေကို လူမျိုးသုဉ်း သတ်ဖြတ်ချင်လို့သာ ဖြစ်တယ်လို့ စွပ်စွဲ ပြောဆိုသွားခဲ့ပါတယ်။
