စစ်ကောင်စီထံ နိုင်ငံရေးပါတီမှတ်ပုံတင်တဲ့လုပ်ရပ် လူထုဆန္ဒကိုဆန့်ကျင်နေတယ်လို့ NUG ဆို

စစ်ကောင်စီရဲ့ရွေးကောက်ပွဲကော်မရှင်ထံ နိုင်ငံရေးပါတီမှတ်ပုံတင်သူတွေဟာ လူထုရဲ့ဆန္ဒကို ဆန့်ကျင်ရာရောက်သလို လူထုအပေါ် စစ်ကောင်စီရဲ့ဖိနှိပ်သတ်ဖြတ်မှု တွေကို အားပေးရာ ရောက်နေတယ်လို့ အမျိုးသားညီညွတ်ရေးအစိုးရ (NUG) ကဒီနေ့မှာ ထုတ်ပြန်အသိပေးလိုက်ပါတယ်။

တရားမဝင်တဲ့ စစ်ကောင်စီ ရဲ့ ရွေးကောက်ပွဲကော်မရှင်ထံ နိုင်ငံရေးပါတီမှတ်ပုံတင်တဲ့ လုပ်ရပ်ဟာ စစ်အုပ်စုရဲ့ဖြစ်တည်မှုကို အတိအလင်းလက်ခံတာဖြစ်တယ်လို့လည်း NUG ကဆိုပါတယ်။

ဒါဟာ စစ်အုပ်စုအလိုကျ လိုက်ပါအသုံးတော်ခံတဲ့ လုပ်ရပ်ဖြစ်ပြီး စစ်အုပ်စုကိုအားပေးအားမြှောက်ပြုရာလည်းရောက်တယ်လို့ NUG က အသိပေးပါတယ်။

စစ်အုပ်စုအနေနဲ့ တရားမဝင် ရွေးကောက်ပွဲကို လူထုဆန္ဒနဲ့ဆန့်ကျင်ပြီး အတင်းအကျပ် ပြုလုပ်လို့ အဲဒီရွေးကောက်ပွဲတွေကနေ ထွက်ပေါ်လာမယ့် လွှတ်တော်ကိုယ်စားလှယ်တွေ ၊ လွှတ်တော်တွေ ဟာ လူထုကို ကိုယ်စားပြုမှာ မဟုတ်ဘဲ စစ်အုပ်စုရဲ့ ရုပ်သေး တွေသာဖြစ်မယ်လို့လည်း NUG က ထုတ်ပြန်ချက်မှာထည့်သွင်းပြောဆိုထားပါတယ်။

Public Service Announcement

NUG အစိုးရအနေနဲ့တော့ စစ်အုပ်စုလက်အောက်ခံအဖွဲ့တွေ ၊ အလိုတူအလိုပါအဖွဲ့တွေ ၊ အားပေးအားမြှောက်လုပ်နေတဲ့ အဖွဲ့အစည်းတွေကို အရေးယူသွားမယ်လို့ ထုတ်ပြန်ချက်ကတဆင့် သတိပေးတာတွေ့ရပါတယ်။

လက်ရှိမှာ အာဏာသိမ်းစစ်ကောင်စီဟာ ရွေးကောက်ပွဲဥပဒေဆိုပြီး ပြဌာန်းလိုက်ကာ မှတ်ပုံပြန်မတင်တဲ့ ပါတီတွေကို ဖျက်သိမ်းမယ်လို့ခြိမ်းခြောက်ထားတာရှိပါတယ်။

ဒီနေ့အထိ စစ်တပ်ကျောထောက်နောက်ခံပြုထားတဲ့ကြံခိုင်ရေးအပါအဝင် ပါတီ ၂၁ ခုဟာ စစ်ကောင်စီရဲ့ရွေးကောက်ပွဲကော်မရှင်ထံမှာ ပြန်လည်မှတ်ပုံတင်ထားကြတယ်လို့သိရပါတယ်။