▪︎ အစုလိုက်သတ်ဖြတ်မှုကို ရလခတိုင်းမှူး ဗိုလ်ချုပ်မျိုးမင်းထွန်းနှင့် ဗိုလ်မှူးချုပ်နေလင်းအောင် တို့ ကွပ်ကဲသည့် စစ်ကောင်စီတပ်များ ကျူးလွန်ခဲ့
အမျိုးသားညီညွတ်ရေးအစိုးရ(NUG) လူ့အခွင့်အရေးဆိုင်ရာဝန်ကြီးဌာနက ပြည်သူတစ်ရပ်လုံး တန်းတူညီမျှမှုရရှိရေး၊ ငြိမ်းချမ်းရေးနှင့်တရားမျှတမှုရရှိရေးတည်းဟူသော ဦးတည်ချက်များကို ခိုင်ခိုင်မာမာလက်ကိုင်ဆွဲထား၍စစ်ကောင်စီတပ်၏ ကျုးလွန်မှုများကိုအပြစ်ပေးအရေးယူနိုင်ရေး အစွမ်းကုန်တာဝန်ယူဆောင်ရွက်သွားမည်ဖြစ်ကြောင်း ထုတ်ပြန်ခဲ့သည်။
မတ်လ ၁၁ရက်က ရှမ်းပြည်နယ်၊ ပင်လောင်းမြို့နယ်၊ နမ်းနိန်းကျေးရွာဘုန်းကြီးကျောင်းအတွင်း ရှိ သံဃာတော် (၃)ပါးနှင့် ကျေးရွာသား (၁၉) ဦးအားဖမ်းဆီးကာစစ်အုပ်စုက အစုအလိုက် အပြုံလိုက်သတ်ဖြတ်မှုနှင့် ပင်လောင်းဒေသ၌စစ်ကောင်စီတပ်မှ ပြည်သူလူထုအပေါ် ကျူးလွန်ခဲ့သည့် ဖြစ်ရပ်နှင့်ပတ်သက်ပြီး ဝန်ကြီးဌာနက ယမန်နေ့တွင် ထုတ်ပြန်ခဲ့ခြင်းဖြစ်သည်။
အဆိုပါအကြမ်းဖက်မှုဖြစ်စဉ်ကို ဗိုလ်မှူးချုပ်နေလင်းအောင်ကွပ်ကဲသော ဖယ်ခုံမြို့နယ်အခြေစိုက် အမှတ်(၇) စစ်ဆင်ရေးကွပ်ကဲမှု (စကခ-၇) ၊စကခ-၁၈ ၊တိုင်းမှူး ဗိုလ်ချုပ် မျိုးမင်းထွန်းကွပ်ကဲသော တောင်ကြီးမြို့အခြေစိုက် အရှေ့အလယ်ပိုင်း တိုင်းစစ်ဌာနချုပ် က အကြမ်းဖက်စစ်သားများက ကျူးလွန်ခဲ့ကြောင်း ဖော်ပြထားသည်။
စစ်ကောင်စီတပ်က အင်အား ၂၀၀ ခန့် အသုံးပြုခဲ့ပြီး ဒေသခံ များ၏ နေအိမ် များကို မီးရှို့ခဲ့ကြောင်း၊ မတ်လ ၁၁ရက် ညနေပိုင်းတွင် နမ့်နိန်းရွာ အနီးဝန်းကျင်သို့ လေယာဉ်နှင့် လက်နက်ကြီးများ အသုံးပြုကာ ပစ်ခတ်၍ ပြည်သူများ ရွာ၏ ဘုန်းကြီးကျောင်းအတွင်းသို့ ဝင်ရောက်ခိုလှုံခဲ့ရကြောင်းသိရသည်။
Public Service Announcement
ထိုနောက်စစ်အုပ်စုသည် ကျေးရွာအတွင်း ဖြန့်ကျက် ဝန်ရောက်ခဲ့ပြီး ဘုန်းကြီးကျောင်းအတွင်း သံဃာတော်များနှင့် ဒေသခံ ပြည်သူများအား ပုန်းအောင် နေရာမှ ဖမ်းဆီးကာ ကျောင်းနံရံ နောက်ခံထား၍ ရက်စက်စွာ ပစ်ခတ်သတ်ဖြတ်ခဲ့သည်ဟု ဖော်ပြသည်။
သတ်ဖြတ်ခံရသည့် ဒေသခံများ၏ အလောင်းများတွင် ဦးခေါင်းဓားမဖြင့် ပေါက်ထားသော ဒဏ်ရာများ၊ သေနတ်ပစ်ခတ်ခံထားရသည့် ဒဏ်ရာများ တွေ့ရှိရကြောင်း၊ ပစ်ခတ်မှုကြောင့် သံဃာ ၃ပါး၊ အမျိုးသမီး ၁ဦး၊ အမျိုးသား ၁၈ဦး စုစုပေါင်း ၂၂ဦး သေဆုံးခဲ့ရပြီး ဘုန်းကြီးကျောင်းဘေးရှိ ဆိုင်ကယ်များလည်း မီးရှို့ဖျက်ဆီးခံခဲ့ရကြောင်း လည်းဖော်ပြအထားသည်။ကျူးလွန်ရာတွင် အသုံးပြုသောသေနတ်မှာ MA1 ဖြစ်ကြောင်းလည်းသိရသည်။
ပအိုဝ်ပြည်သူများကို စစ်တပ်က အစုလိုက်အပြုံလိုက်သတ်ဖြတ်မှုသည် အာဏာသိမ်းစစ်ခေါင်ဆောင် မင်းအောင်လှိုင်က စစ်တပ်လက်အောက်ခံပြည်သူ့စစ်အဖွဲ့ဖြစ်သော PNO/PNA ခေါင်းဆောင် ဦးအောင်ခမ်းထီးကို မတ်လ ၇ ရက်က ကျောက်တစ်လုံးကြီးမြို့၌ သွားရောက်တွေ့ဆုံပြီး ၄ ရက်အကြာတွင် ကျူးလွန်ခဲ့ခြင်းဖြစ်သည်။
စစ်ကောင်စီ ဝါဒဖြန့် တယ်လီဂရန်ချန်နယ်အချို့က နမ်းနိန်းရွာဘုန်ကြီးကျောင်းတွင် အသတ်ခံရသူများသည် PDF များဖြစ်သည်ဟု သေဆုံးသူ ရုပ်အလောင်းများနှင့် လက်လုပ်သေနတ်များတွဲတင်၍ သတင်းအမှားဖြန့်ဝါဒဖြန့်ခဲ့ကြသည်။
ယင်းဒေသ၌လွန်ခဲ့သော(၂)ပတ်ခန့်ကမီးရှို့ဖျက်စီးမှုကြောင့် ပင်လောင်းမြို့နယ် ၊နမ့်နှိမ်းကျေးရွာတကြောတွင် နေအိမ်အလုံး (၅၀) ပျက်စီးဆုံးရှုံးခဲ့ရပြီး လက်နက်ကြီးပစ်ခတ်မှုကြောင့် အသက် ၅၀ အရွယ် ပြည်သူ တစ်ဦး သေဆုံးခဲ့ရကြောင်းလည်း ထုတ်ပြန်ခဲ့သည်။
စစ်တပ်သည် ဖေဖော်ဝါရီမှ စတင်ကာ ပင်လောင်း၊ ရှားတော၊ ဒီးမော့ဆို၊ ဘောလခဲ စသည့် တို့၌ စစ်မျက်နှာ ၄ခုဖြင့် အပြင်းအထန် ထိုးစစ်ဆင်ခဲ့ရာ ပင်လောင်းမြို့နယ်၌ နှစ်ပတ်ကြာ တိုက်ပွဲများ ဖြစ်ပွားခဲ့သည်။
