အိမ်သို့လာဖမ်းစဉ် စစ်ကောင်စီတပ်နှင့် အပြန်အလှန်ပစ်ခတ်ခဲ့သည့် ပဲခူးမှလူငယ် ဆေးရုံတွင်ဆုံးပြီ

နေအိမ်သို့လာရောက်ဖမ်းဆီးစဉ် စစ်ကောင်စီတပ် ဖွဲ့ဝင်များကို ပြန်လည်ခုခံပစ်ခတ်ခဲ့သည့် ပဲခူးမြို့မှလူငယ်တစ်ဦး ယနေ့ နေ့လည်ပိုင်းက ပဲခူးဆေးရုံကြီး၌ သေဆုံးသွားကြောင်း သတင်းရရှိသည်။

စစ်ကောင်စီတပ်အား ပြန်လည်ပစ်ခတ်ခဲ့သည့်လူငယ်မှာ ပဲခူးမြို့ ဟင်္သာကုန်းရပ်ကွက် ဇေယျာအောင်မြေလမ်းနေ အသက် ၂၅ နှစ်အရွယ် ကိုစည်သူကောင်းမြတ်ဖြစ်ပြီး စက်တင်ဘာ ၂၃ ရက် နံနက် ၁၀ နာရီခွဲတွင် ပစ်ခတ်မှုဖြစ်ပွားခဲ့ခြင်း ဖြစ်သည်။

အဆိုပါပစ်ခတ်မှုကြောင့် ကိုစည်သူကောင်းမြတ်တွင် သေနတ်ဒဏ်ရာ သုံးချက်ရရှိပြီး ပဲခူးဆေးရုံ၌ ကုသမှုခံယူနေစဉ် သေဆုံးသွားခြင်းဖြစ်သည်ဟု ပဲခူးမြို့ခံတစ်ဦးက ပြောသည်။

“အိမ်မှာလာပြီး ကောင်လေးကိုလာရှာတာ မတွေ့တော့ သူ့အမေကိုလက်ထိပ်ခတ် ဖမ်းတယ်။ ဒီမှာတင် သူ့အမေအဖမ်းခံရတာတွေ့တော့ ပုန်းနေရာကနေ သေနတ်နဲ့ပြန်ပစ်တာ။ ဟိုဘက်က ရဲတစ်ယောက်လည်း ဒဏ်ရာရတယ်။ ကောင်လေးကိုလည်း သုံးချက်ထိတယ်။ ပြီးတော့ သားအမိနှစ်ယောက်လုံး ဖမ်းသွားတယ်”ဟု ယင်းမြို့ခံက ပြောသည်။

Public Service Announcement

ဒဏ်ရာရရှိသည့် ကိုစည်သူကောင်းမြတ်အား ပဲခူးဆေးရုံသို့ပို့ဆောင်ကုသစေပြီး စစ်ဆေးမှုများလုပ်ဆောင်နေစဉ် ယနေ့(စက်တင်ဘာ ၂၄)မွန်းလွဲ ၁၂ နာရီကျော်တွင် ပဲခူးဆေးရုံကြီး၌ ဆုံးပါးခဲ့သည်။

သားဖြစ်သူနှင့်အတူ ဖမ်းဆီခံခဲ့ရသည့် အသက် ၅၁ အရွယ် ကိုစည်သူကောင်းမြတ်၏မိခင် ဒေါ်သန်းသန်းမြင့်အား စစ်ကောင်စီမှ ပြန်လွှတ်ပေးခြင်းမရှိသေးဘဲ ဆက် လက်ဖမ်းဆီးထားဆဲ ဖြစ်သည်။