▪︎စိုးရိမ်မှုများမှသည် လက်တွေ့ကျ ထိရောက်သော ကူညီမှုများအဖြစ်သို့ ပြောင်းလဲရန် ထောက်ပြ
တရားမဝင်စစ်ကောင်စီကို အမေရိကန်နှင့်အတူ အဖက်ဖက်မှ ပိတ်ဆို့ဖိအားပေးမှုများ လုပ်ဆောင်ရန် အိန္ဒိယအစိုးရကို ပြည်ထောင်စုလွှတ်တော်ကိုယ်စားပြုကော်မတီ CRPH က ယနေ့ တိုက်တွန်းသည်။
မြန်မာ့အိမ်နီးချင်း အိန္ဒိယသည် ယခုလက်ရှိတွင် စစ်အာဏာရှင်စနစ်ဆိုးအောက်မှ လွတ်မြောက်ရေးနှင့် ဒီမိုကရေစီအရေးအတွက် ကြိုးပမ်းနေကြသော မြန်မာပြည်သူများ၏ ရုန်းကန်မှုကို စာနာကူညီသောအားဖြင့် အကြမ်းဖက်တရားမဝင် စစ်ကောင်စီနှင့် စီးပွားရေး၊ သံတမန်ရေး၊ စစ်ရေး ပူးပေါင်းဆောင်ရွက်နေမှုများကို ရပ်တန့်ရန်၊ အမေရိကန်နှင့် အိန္ဒိယတို့အနေဖြင့် အမျိုးသားညီညွတ်ရေးအစိုးရ NUG နှင့် ဒီမိုကရေစီအင်အားစုများကို ထိရောက်သော ပံ့ပိုးကူညီမှုများနှင့် ပူးပေါင်းဆောင်ရွက်မှုများကို တိုးမြှင့်လုပ်ဆောင်ပေးရန် CRPH က တိုက်တွန်းသည်။
အိန္ဒိယဝန်ကြီးချုပ် မိုဒီ၏ ဝါရှင်တန်ခရီးစဥ်အတွင်း အမေရိကန်သမ္မတနှင့် ပူးတွဲကြေညာချက်ထုတ်ပြန်ခဲ့ရာ ခေါင်းဆောင်နှစ်ဦးက မြန်မာနိုင်ငံ ဆိုးရွားပျက်စီးနေမှုအပေါ် စိုးရိမ်ကြောင်းနှင့် တရားလက်လွတ်ဖမ်းဆီးချုပ်နှောင်ထားသူအားလုံးကို ပြန်လွှတ်ပေးရန်၊ ဒီမိုကရေစီအသွင်းကူးပြောင်းရေးလမ်းဆီ ပြန်သွားရန် စသည့်အချက်များကို ထည့်သွင်းဖော်ပြခဲ့သည်။ ယင်းသို့ မြန်မာ့အရေးထည့် သွင်းဖော်ပြမှုကို CRPH က ကြိုဆိုကြောင်း ယနေ့ ထုတ်ပြန်သည်။
သို့သော် စိုးရိမ်မှုများမှသည် လက်တွေ့ကျ ထိရောက်သော ကူညီမှုများအဖြစ်သို့ ဆက်လက်ဖော်ဆောင်ကူညီပေးရန် အထူးလိုအပ်ကြောင်း CRPH က ထောက်ပြသည်။
Public Service Announcement
အိန္ဒိယသည် မြန်မာပြည်နိုင်ငံရေးတွင် စစ်ရေး၊ နိုင်ငံရေး၊ သံတမန်ရေး၊ နည်းပညာပိုင်း၊ ရွေးကောက်ပွဲ၊ စီးပွားရေး စသည့်နယ်ပယ်များတွင် ဝင်ရောက်စွက်ဖက်ကာ အကြမ်းဖက်စစ်အုပ်စုကို ပြန်လည် နေရာပေးရေးအတွက် တက်တက်ကြွကြွဆောင်ရွက်နေကြောင်း India For Myanmar တာ၀န်ရှိသူ မသဥ္ဇာရွှန်းလဲ့ရည်က ပြောသည်။ အမေရိကန်-အိန္ဒိယခေါင်းဆောင်နှစ်ဦး၏ ပူးတွဲကြေညာချက်မှတဆင့် မြန်မာပြည်သူများ ဖက်ဒရယ်ဒီမိုကရေစီအရေးအတွက် တိုက်ပွဲ ဝင်နေသည်ကို ထုတ်ပြောလာရန် အမေရိကန်က အိန္ဒိယကို ဆွဲဆောင်နိုင်၍ India For Myanmar က ကြိုဆိုခြင်းဖြစ်ကြောင်း ၎င်းက ရှင်းပြသည်။
“အိန္ဒိယအနေနဲ့ ကျွန်မတို့ပြည်သူတွေရဲ့ ပြည်သူ့အသံကို လေးစားလိုက်နာဖို့၊ ဒီမိုကရေစီ စံချိန်စံနှုန်းတွေကို လေးစားလိုက်နာဖို့၊ စစ်အုပ်စုက မတရားအကြမ်းဖက်အာဏာသိမ်းမှုနဲ့ စစ်ရာဇဝတ်မှုတွေမှာ အလိုတူ အလိုပါ မဖြစ်ဖို့၊ ရပ်တန့်ဖို့ ဒါတွေကို ကျွန်မတို့ တောင်းဆိုလျှက်ရှိပါတယ်” ဟု မသဥ္ဇာရွှန်းလဲ့ရည်က ဆက်ပြောသည်။
အမေရိကန်-အိန္ဒိယ ခေါင်းဆောင်နှစ်ဦး၏ ပူးတွဲကြေညာချက်နှင့်ပတ်သက်၍ CRPH က လွတ်လပ်ခွင့်၊ ဒီမိုကရေစီ၊ လူ့အခွင့်အရေး၊ တန်းတူအခွင့်အရေးနှင့် စုံလင်ကွဲပြားမှု စံတန်ဖိုးများအပေါ် ထားရှိသည့် နှစ်နိုင်ငံခေါင်းဆောင်များ၏ ကတိကဝတ်ကို ဝမ်းမြောက်စွာ တွေ့ရှိရပြီး မြန်မာပြည်သူများအတွက် စစ်အာဏာသိမ်းမှုကြောင့် ဆုံးရှုံးသွားရသည့် ဒီမိုကရေစီ၊ လွတ်လပ်ခွင့်၊ လူ့အခွင့်အရေးတို့ ပြန်လည်ရရှိခံစားနိုင်ရန် အင်အားကြီး ဒီမိုကရေစီနိုင်ငံနှစ်နိုင်ငံ ဖြစ်သည့် အမေရိကန်ပြည်ထောင်စုနှင့် အိန္ဒိယနိုင်ငံတို့ထံမှ လက်တွေ့ကျသော ပံ့ပိုးကူညီမှုများ ဆက်လက်ပေးအပ်ရန် တောင်းဆို ထားသည်။
စစ်ကောင်စီ နိုင်ငံခြားရေးဝန်ကြီးဌာနကမူ၎င်းတို့အနေဖြင့် မည်သူတစ်ဦးတစ်ယောက်ကိုမျှ ဥပဒေမဲ့အရေးယူဆောင်ရွက်ထားခြင်းမရှိကြောင်း အမေရိကန်-အိန္ဒိယ ပူးတွဲကြေညာချက်အပြီး ထုတ်ပြန်ထားသည်။ နိုင်ငံတကာ အသိုင်းအဝိုင်းအနေဖြင့် ၎င်းတို့(အာဏာသိမ်း စစ်ကောင်စီ)ကို နားလည်မှု၊ အားပေးမှုနှင့်အပြုသဘောပူးပေါင်း ဆောင်ရွက်မှုများ ပေးအပ်ရန်လိုအပ်သည်ဟုဆိုသည်။
