အဂတိပုဒ်မ နဲ့ စွပ်စွဲထားတဲ့အမှုမှာ တရားလိုပြသက်သေ ရဲ့ ထွက်ဆိုချက်တွေဟာ အဓိပ္ပာယ် မရှိတဲ့အကြောင်း နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် က တုံ့ပြန်တယ်လို့ ရှေ့နေတွေဆီကသိရပါတယ်။ဒီနေ့ နေပြည်တော် ၊ ဇဗ္မူသီရိ အထူးတရားရုံး ရုံးထုတ်စစ်ဆေးမှုမှာ ဒေါ်အောင်ဆန်းစုကြည်နဲ့ရှေ့နေတွေဟာ မနက် ၉ နာရီခွဲကစတင်ပြီး နာရီဝက်ကျော်ကြာ တွေ့ဆုံခဲ့ကြတာပါ။
အဲဒီလိုတွေ့ဆုံရာမှာ ဒေါ်အောင်ဆန်းစုကြည်က တရားလိုပြသက်သေရဲ့ ထွက်ဆိုချက်တွေဟာ အဓိပ္ပာယ် မရှိတဲ့အကြောင်း ပြောခဲ့တာလို့ တရားလွှတ်တော်ရှေ့နေ ဦးခင်မောင်ဇော်ဆီကသိရပါတယ်။
တရားလိုသက်သေ ရဲ့ထွက်ဆိုချက်တွေအပေါ် ဒေါ်အောင်ဆန်းစုကြည်က အင်္ဂလိပ်လို ” All absurd ” လို့ ရှေ့နေတွေကိုပြောပြခဲ့တာပါ။
ပြီးခဲ့တဲ့ သောကြာနေ့က ရုံးချိန်းမှာ တရားလိုပြသက်သေအဖြစ် ဦးဖြိုးမင်းသိန်း က ထွက်ဆိုရာမှာ သူရဲ့လုပ်ငန်းတွေအဆင်ပြေစေဖို့ ဒေါ်အောင်ဆန်းစုကြည်ကို ရွှေချောင်းနဲ့ အမေရိကန်ဒေါ်လာတွေပေးခဲ့ရတယ်လို့ ထွက်ဆိုခဲ့တာပါ။
Public Service Announcement
ဒါပေမယ့်အဲဒီရုံးချိန်းမှာ ဦးဖြိုးမင်းသိန်း ဟာ ဒေါ်အောင်ဆန်းစုကြည်ကို မျက်နှာချင်းမဆိုင်ရဲခဲ့ဘူးလို့လည်း ရှေ့နေတွေဆီကသိရပါတယ်။
