တရုတ်ကုန်ပစ္စည်းများ မူဆယ်နယ်စပ်ကုန်သွယ်ရေးစခန်းမှ မကြာခင် ပြန်လည်တင်သွင်းခွင့်ရမည်ဖြစ်ကြောင်း မူဆယ်-နမ့်ခမ်း နယ်စပ်ကုန်သွယ်ရေး ကုန်သည်များအသင်းက အောက်တိုဘာ ၃ ရက်တွင်ထုတ်ပြန်သည်။
မြန်မာနိုင်ငံသို့ တင်သွင်းရန် သောင်တင်နေသည့် ကုန်ပစ္စည်းများကိုသာ တင်သွင်းရမည်ဖြစ်ပြီး ကုန်ပစ္စည်းများ ထပ်မံတင်သွင်းခွင့်ရမည်မဟုတ်ကြောင်း အဆိုပါအသင်း၏ ထုတ်ပြန်ချက်တွင်ပါဝင်သည်။
မူဆယ်နယ်စပ်ကုန်သွယ်ရေးစခန်းသည် မြန်မာနိုင်ငံ ၏ အကြီးဆုံးနယ်စပ်ကုန်သွယ်ရေးဂိတ်ဖြစ်ပြီး ဇူလှိုင် ၈ရက်တွင် ကိုဗစ်အကြောင်းပြချက်ဖြင့် တရုတ်က ကုန်သွယ်မူများကို ရပ်ဆိုင်းခဲ့ခြင်းဖြစ်သည်။
အထက်ပါကုန်သည်အသင်း၏ ထုတ်ပြန်ချက်မှာ ကုန်တင်ပြီးကားများနှင့် ဂိုဒေါင်၊ကုန်ဂိတ်များက မြန်မာပြည်တွင်းတင်ပို့ရန်ကျန်ရှိသော သွင်းကုန်ပစ္စည်းများကိုသာ တင်ပို့ခွင့်ရမည်ဟု ပါဝင်သည်။
Public Service Announcement
ထို့ကြောင့် မြန်မာနိုင်ငံ ကုန်တင်ကားများသည် တရုတ်နိုင်ငံအတွင်းသို့ ကုန်မပါဘဲဝင်ရောက်ရမည်ဟု ဆိုထားသည်။
မြန်မာပြည်ဘက်ကို တင်ပို့ရန်ကျန်ရှိသည့် ကုန်ပစ္စည်းများအတွက် ကားအစီး ၇၀၀ခန့် တင်သွင်းရမည်ဖြစ်ဟု အဆိုပါအသင်းကဆိုထားသည်။ ထိုကုန်ပစ္စည်းများကို အောက်တိုဘာလကုန်အပြီး သယ်ယူရမည်ဟု ဆိုထားသည်။
မူဆယ်ကုန်သွယ်စခန်းသည် တရုတ်-မြန်မာ နယ်စပ်ကုန်သွယ်ရေးစခန်းများအနက်ကြီး စခန်းတစ်ခုဖြစ်ပြီး နှစ်စဉ် ဒေါ်လာ ၅ ဘီလီယံ ခန့်ကုန်သွယ်နေသည့် ကုန်သွယ်ရေးစခန်းတစ်ခုဖြစ်သည်။
