ရန်ကုန်မြို့ လှိုင်သာယာမြို့နယ်အတွင်းရှိ စစ်ကောင်စီတပ်ဖွဲ့ဝင်များရှိသည့် စစ်ရေးပစ်မှတ် နေရာနှစ်ခုကို ဖောက်ခွဲတိုက်ခိုက်မှု သုံးကြိမ်ပြုလုပ်ခဲ့ကြောင်း မြောက်ပိုင်းခရိုင်ပြည်သူ့ကာကွယ်ရေးတပ်ဖွဲ့က လူထုနွေဦးသို့ ပြောသည်။
ဇန်နဝါရီ ၂၂ ရက် ည ၈နာရီခန့်တွင် လှိုင်သာယာအရှေ့ပိုင်းမြို့နယ် ငါးမန်းတံတားအနီးရှိ MOGE ဂက်စ်ပိုက်လိုင်းကို ဖောက်ခွဲတိုက်ခိုက်ခဲ့ပြီး လှိုင်သာယာ အနောက်ပိုင်းမြို့နယ် သောင်ကြီးရဲစခန်းအနီး စစ်ကောင်စီတပ်သားများ အစစ်အဆေးပြုလုပ်လေ့ရှိသည့်နေရာကို ည၉ နာရီခန့်တွင် မိနစ်ပိုင်းခြား၍ နှစ်ကြိမ်ဖောက်ခွဲတိုက်ခိုက်ခဲ့ကြောင်း မြောက်ပိုင်းခရိုင်ပကဖက ဆိုသည်။
အထက်ပါ နေရာနှစ်ခုအပြင် လှိုင်သာယာအရှေ့ပိုင်းမြို့နယ် ဘုရင့်နောင်တံတားအဆင်း စစ်ကောင်စီတပ်သားများ အစစ်အဆေးပြုလုပ်သော နေရာကို ဖောက်ခွဲတိုက်ခိုက်ရန် ပြင်ဆင်ထားသော်လည်း လမ်းသွားလမ်းလာပြည်သူတစ်ဦးက ချထားသောမိုင်းကို ကောက်ယူသောကြောင့် ပြည်သူထိခိုက်မည်စိုး၍ မစ်ရှင်ဖျက်သိမ်းခဲ့ကြောင်း ထုတ်ပြန်ထားသည်။
“အများပြည်သူများအနေဖြင့် မိမိနှင့်သက်ဆိုင်မှုမရှိသော ပစ္စည်းများကို ကောက်ယူကိုင်တွယ်ခြင်းမပြုလုပ်ကြရန်နှင့် စစ်ကောင်စီတပ်သားများ ဒေါက်တိုင်များ အထိုင်ကင်းများရှိရာနေရာများနှင့် ဝေးရာတွင် နေထိုင်ပေးကြရန် အသိပေးတိုက်တွန်းအပ်ပါသည်”ဟု မြောက်ပိုင်းခရိုင်ပကဖက အသိပေးထားသည်။
Public Service Announcement
အဆိုပါတိုက်ခိုက်မှုဖြစ်စဉ်များဖြစ်ခဲ့သည်မှာ မှန်ကန်ပြီး လူထိခိုက်မှုမရှိကြောင်း လှိုင်သာယာကင်းထောက်ချန်နယ်မှ တာဝန်ရှိသူတစ်ဦးက ပြောသည်။
