အကြမ်းဖက်စစ်ကောင်စီက ဆိုင်ကယ်စီးလာသူနှစ်ဦးကိုမသင်္ကာဟုဆိုကာ ပစ်ခတ်ဖမ်းဆီး၍ တစ်ဦးသေဆုံး
ရန်ကုန်မြို့ လှိုင်သာယာမြို့နယ် အမှတ် (၆)ရပ်ကွက် အုပ်ချုပ်ရေးမှူးနှင့် နောက်လိုက်တစ်ဦး သေနတ်ပစ်ခတ်ခံရ၍ သေဆုံးသွားကြောင်း HTY Information က သတင်းဖော်ပြထားသည်။
ဇူလိုင် ၁၈ ရက် ည ၉နာရီခွဲခန့်တွင် ဈေးလေးမှတ်တိုင်အနီး၌ (၆)ရပ်ကွက် အုပ်ချုပ်ရေးမှူး ကျော်စိုးထွန်းနှင့် ၎င်း၏နောက်လိုက် ဖိုးထူးတို့ သေနတ်ဖြင့် ပစ်ခတ်ခံခဲ့ရခြင်းဖြစ်ကြောင်း ဒေသခံများ၏ ပြောကြားချက်ကို HTY Information က ဖော်ပြထားသည်။
“လှိုင်သာယာ တစ်မြို့လုံး သေနတ်သံတွေပါပဲ။မြို့ဝင်၊မြို့ထွက် ပိတ်ဆို့ စစ်ဆေးနေပါတယ်။ဒါပြင် လှိုင်သာယာရဲ့ လမ်းဆုံ၊လမ်းဂွ အဓိက နေရာတွေမှာ လဲ စစ်ဆေးတင်းကျပ်ထားပါတယ်” ဟု လှိုင်သာယာဒေသခံတစ်ဦးက ပြောသည်။
ထို့အပြင် ည ၁၁နာရီခန့်တွင် အကြမ်းဖက်စစ်ကောင်စီက ဆိုင်ကယ်စီးလာသူ နှစ်ဦးကို မသင်္ကာဟုဆိုကာ သေနတ်ဖြင့် ပစ်ခတ်ဖမ်းဆီးခဲ့သောကြောင့် တစ်ဦးသေဆုံးသွားကြောင်း HTY Information က ထပ်မံဖော်ပြထားသည်။
HTY Information သည် လှိုင်သာယာမြို့နယ်အတွင်း ဖြစ်ပျက်သည့် ကိစ္စများကို ဖော်ပြပေးနေသည့် သတင်းစာမျက်နှာဖြစ်သည်။
အုပ်ချုပ်ရေးမှုးများကို ပစ်ခတ်သည့် ဖြစ်စဉ်နှင့်ပတ်သက်၍ ပြည်သူ့ ကာကွယ်ရေးတပ်ဖွဲ့များ ကလည်း သတင်းထုတ်ပြန်ခြင်းမရှိသေးသောကြောင့် မည်သည့်အဖွဲ့က လုပ်ဆောင်သည်ကို အတည်မပြုနိုင်သေးပေ။