မြဝတီတွင်​ရေစကြီး၊ ရေဘေးသင့်​ဒေသ ပိုများလာ

မိထက်/People’s Spring

မြန်မာနိုင်ငံအထက်ပိုင်းမှလွဲ၍ကျန်ဒေသများ မိုးကြီးနေပြီး ရေဘေးသင့်​ဒေသများ တိုးလာကာ ယနေ့(စက်တင်ဘာလ ၁၁ရက်)တွင် မြဝတီမြို့အပါအဝင် ကရင်ပြည်နယ်မှ မြို့နယ်အချို့ ရေဘေးစတင်ကြုံတွေ့နေရသည်။

မြန်မာ-ထိုင်းနယ်စပ်မြို့ဖြစ်သည့်မြဝတီမြို့တွင် မိုးသည်းထန်စွာရွာပြီးနောက်သောင်ရင်းမြစ်ရေလျှံပြီး မြို့ပေါ်ရပ်ကွက်များရေကြီးနှစ်မြုပ်နေပြီဟု ဒေသခံများကပြောသည်။

Public Service Announcement

မိုးဆက်ရွာနေပြီး ရေလည်း တိုးနေ၍ ဒေသခံများ စိုးရိမ်နေကြသည်။

ကရင်ပြည်နယ်တွင် မြဝတီ၊ ဘားအံ၊ ကော့ကရိတ်၊ ကျုံဒိုး၊ ကြာအင်းဆိပ်ကြီးမြို့နယ်တို့၌ မြေနိမ့်ပိုင်းရပ်ကွက်များ ရေဝင်နေပြီး ရေဘေးကြုံတွေ့​နေကြောင်း ဒေသခံများကပြောသည်။

လက်ရှိတွင် ထိုင်းနိုင်ငံနှင့် နယ်စပ်မြို့ဖြစ်သောရှမ်းပြည်နယ်အရှေ့ပိုင်း တာချီလိတ်မြို့တွင်စံချိန်တင်ရေကြီးနေပြီး မြို့ပေါ်ရပ်ကွက်များရေကြီးနစ်မြုပ်နေသည်။ တချို့​နေအိမ်များမှာ​ရေကြီးပြီး အိမ်ပင်​ရေမြှပ်လုလု အ​ခြေအ​နေကြုံ​နေကြသည်။

ကယ်ဆယ်ရေးအတွက် ဒေသခံများသည် အရေးပေါ်အကူအညီများတောင်းခံနေရဆဲဖြစ်သည်။

ထိုအပြင် ရှမ်းပြည်နယ်အရှေ့ပိုင်းမှ ပန်ဆန်းအပါအဝင် ဝကိုယ်ပိုင်အုပ်ချုပ်ခွင့်ရဒေသများ၊ မိုင်းဆတ်၊ ကျိုင်းတုံမြို့တို့၌လည်း ရပ်ကွက်အချို့ ရေဘေးကြုံနေသည်။ ရှမ်းပြည်နယ်တောင်ပိုင်း လင်းခေးမြို့၊ ပင်းတယ၊ ရွာငံ၊ကလော၊အောင်ပန်းစသည့် မြို့နယ်တို့တွင် မိုးသည်းထန်စွာရွာနေပြီး ဒေသတွင်း မြစ်ချောင်းများရေလျှံနေသည်ဟု ဒေသခံများကပြောသည်။

အလားတူရှမ်းပြည်နယ်နှင့်ထိစပ်နေသောမန္တလေးတိုင်းမှ ကျောက်ဆည်အပါအဝင်မြို့နယ်အချို့၌လည်း မိုးသည်းထန်စွာရွာနေပြီးဒေသတွင်းလမ်းပိုင်းဆက်သွယ်ရေးများ ပြတ်တောက်နေသည်ဟု သတင်းရရှိသည်။

လက်ရှိကြုံတွေ့နေသောရေဘေး ပိုမိုဆိုးရွားလာနိုင်ပြီး ရေဘေးကြုံရသည့်မြို့နယ်များအတွက် ကူညီကယ်ဆယ်ရေး စိုးရိမ်ဖွယ်အခြေအနေဖြစ်ကြောင်း လူမှုကူညီရေးအဖွဲ့များကပြောသည်။

တောင်တရုတ်ပင်လယ်တွင် ပြီးခဲ့သည့်ရက်ကဖြစ်ပေါ်ခဲ့သော တိုင်ဖွန်းမုန်တိုင်း ယာဂီမှ အကြွင်းအကျန်တိမ်တိုက်များဝင်ရောက်နေစဉ် မြန်မာနိုင်ငံ၌ မိုးသည်းထန်စွာရွာသွန်းနေခြင်းဖြစ်သည်။

စစ်ကောင်စီသည် ရေဘေးသတိပေးချက် လုံလောက်စွာ ထုတ်ပြန်ခဲ့ခြင်းမရှိသလို ကယ်ဆယ်ရေးလုပ်ဆောင်ရန်လည်း အဆင်သင့်ရှိမနေကြောင်း ရှမ်းပြည်နယ်အရှေ့ပိုင်းနှင့်တောင်ပိုင်းမှ ရေဘေးသင့်ဒေသခံများကပြောသည်။

ယာဂီမုန်တိုင်းအရှိန်ကြောင့်ဖြစ်ပေါ်လာသည့် တိမ်တိုက်များနှင့်လေ ပွေလှိုင်းများသည် ရှမ်းပြည်နယ်ကို ဝင်ရောက်ပြီးနောက်မန္တလေးတိုင်းကိုဆက်လက်ဖြတ်သန်းမည်ဖြစ်၍ မန္တလေးတိုင်း၊ မကွေးတိုင်းမြောက်ပိုင်း၊ ချင်းပြည်နယ်၊ ရခိုင်ပြည်နယ်၊ ပဲခူးတိုင်းအရှေ့ပိုင်း၊ ရန်ကုန်တိုင်း၊ကရင်ပြည်နယ်၊ မွန်ပြည်နယ်တို့တွင် မိုးများလာနိုင်ကြောင်း မိုး​လေဝသ​စောင့်ကြည့်​သော ကွန်ယက်များကသတိပေးထားသည်။