မုံရွာမြို့တွင် သီတင်းကျွတ်လပြည့်ည(ယမန်နေ့ည)က ရဲစခန်းနှစ်ခုအပါအဝင် နေရာသုံးနေရာတွင် မိုင်းခွဲခဲ့ကြောင်း PDF – South Monywaက အသိပေးသည်။
အောက်တိုဘာလ ၂၀ရက် သီတင်းကျွတ်လပြည့်နေ့ည ၈နာရီခွဲအချိန်က မုံရွာမြို့ အမှတ် (၁) ရဲစခန်း၊အမှတ် (၂) ရဲစခန်းနှင့် မြန်မာ့စီးပွားရေးဘဏ် များ၌ မိုင်းထောင် ဖောက်ခွဲခြင်းများ ပြုလုပ်ခဲ့ကြောင်း၊ ရဲစခန်းနှစ်ခုပေါက်ကွဲမှုတွင် ရဲတပ်သားများထိခိုက်သေဆုံးနိုင်ဟု ယူဆကြောင်း၊ တော်လှန်ရေးရဲဘော်များမှာ သတင်းရယူရန် စောင့်ကြည့်နေရန် မဖြစ်နိုင်ပါသောကြောင့်သတင်းအတိအကျကို ဖော်ပြနိုင်မည်မဟုတ်ကြောင်း PDF – South Monywaက အသိပေးသည်။
သီတင်းကျွတ်လပြည့်နေ့ညတွင် စုစုပေါင်းစစ်ဆင်ရေး ၅ ခု ပြုလုပ်ခဲ့သော်လည်းဖေါ်ပြပါ စစ်ဆင်ရေး သုံးခုသာ အောင်မြင်ပြီးကျန်ရှိသော စစ်ဆင်ရေး ၂ ခု မအောင်မြင်ရခြင်းအတွက် မိဘပြည်သူများအား တောင်းပန်ကြောင်းလည်း ပါရှိသည်။ ယခု စစ်ဆင်ရေးငါးခု စလုံး၌ ကျွန်ုပ်တို့ဘက်မှ အထိအခိုက် လုံးဝ မရှိကြောင်း PDF – South Monywaက ထုတ်ပြန်သည်။
သီတင်းကျွတ်လပြည့် အဘိဓမ္မာအခါတော်နေ့မှာ မိဘပြည်သူများ စစ်အာဏာရှင်စနစ်ဆိုးအောက်မှ လွတ်မြောက်ရန် အုတ်တစ်ချပ် သဲတစ်ပွင့်အနေဖြင့် ကြိုးစားပေးခဲ့ကြပါကြောင်း PDF – South Monywaက အသိပေးသည်ဟု ထုတ်ပြန်ထားသည်။
Public Service Announcement
