ဗန်း​မော်မြို့သိမ်းတိုက်ပွဲက ရဲ​ဘော်ပွကြီး

ဒီပ/People’s Spring

“ပွကြီးရှေ့တည့်တည့် ​(စစ်သား)နှစ်ကောင်ဘွားကနည်းပေါ်လာတော့ ပွကြီးကမေးလိုက်တယ်။ဟျောင့်တွေ မင်းတို့ဘယ်တပ်စိပ်ကလဲဆိုတော့တစ်ယောက်ကဖြေတယ်စစ်နိုင်တပ်စိပ်က တဲ့။ပွကြီးက သိလိုက်ပီ ဒါ ငါတို့လူမဟုတ်ဘူးဆိုတာပေါ့”

ဗန်းမော် မြိုသိမ်းတိုက်ပွဲမှာ စစ်တပ်ရဲ့အမှတ် (၂၃၆ )​ခြေလျင်တပ်ရင်း (ခလရ ၂၃၆) သိမ်း တိုက်ပွဲမှာ ကချင်လွတ်လပ်​ရေးတပ်မ​တော် (KIA)ဦး​ဆောင်တဲ့ ​​တော်လှန်​ရေးတပ်တွေ နဲ့ စစ်​သား​တွေ ​ထွေးလုံးရစ်ပတ်အသည်းအသန်တိုက်ခိုက်ချိန်မှာ အသက်ရှုမှား​လောက်တဲ့ အခိုက် အတန့်တစ်ခုပါ။

ကချင်​ဒေသက ပြည်သူ့ကာကွယ်​ရေးတပ်ဖွဲ့ (KPDF )တပ်ဖွဲ့ဝင်တစ်ဖြစ်ပြီး အသက် ၃၁ နှစ်အရွယ် ​တောင့်တင်းကြံ့ခိုင်တဲ့ ခန္ဒာကိုယ်ရှိတဲ့သူ့ကိုသူငယ်ချင်း​တွေကရဲ​ဘော်ပွကြီးလို့ချစ်စနိုး​​ခေါ်ကြပါတယ်။ ဗန်း​မော်မြို့မှာစစ်တပ်ရဲ့ အဓိက တပ်ရင်းဌာနချုပ်ဖြစ်တဲ့ အမှတ် ၂၁ စစ်ဆင်​ရေးကွပ်ကဲမှုဌာနချုပ် (စကခ ၂၁)ရဲ့ ​ရှေ့မှာ ကာကင်းစခန်းကြီးလို့လည်း​ခေါ်နိုင်တဲ့ ခလရ (၂၃၆)တပ်ရင်းသိမ်းတိုက်ပွဲကို စစ်ကူ​အ​နေနဲ့လိုက်လာတာပါ။

Public Service Announcement

ခလရ၂၃၆ နဲ့ အမတ ၃၆၆ ကြား သစ်ပင်ခြုံနွယ်တွေ ပေါပြီးမျက်ကွယ်နေရာမျိုးမှာ စစ်သား ၂ ဦးနဲ့ပက်ပင်းတိုးခဲ့တာပါ။​လေ​ကြောင်း အန္တရာယ်၊ဒရုန်း အန္တရာယ်​တွေ​ကြောင့် ရဲ​ဘော်​တွေ​​မြေ​ပေါ် ပြားကပ်​နေ​အောင် ဝပ်ထားချိန်မှာ တပ်စိပ်​ရှေ့ဆုံးက ရဲ​ဘော်ပွကြီး နဲ့ စစ်သား ၂ ​ယောက်တည့်တည့်တိုးတာပါ။ကံ​ကောင်းတာက ရဲ​ဘော်ပွကြီးက သူ့ယူနီ​​ဘောင်းက ဘတ်တံဆိပ်ကိုဖြုတ်ထားတာဖြစ်ပါတယ်။သူ့​နောက် ခပ်လှမ်းလှမ်းမှာ ​ကျောင်းသားတပ်လို့​ခေါ်တဲ့ ABSDF နဲ့ KPDF တပ်ဖွဲ့ဝင်တချို့ကရှိ​နေပါတယ်။ ပွကြီး​ရှေ့က ၂ ​ယောက်ဟာ စစ်သား​တွေဆိုတာသိလိုက်တာနဲ့ ၄၀ မမထည့်ပစ်ရ​ပေမယ့် အသီးကုန်​နေတဲ့ ​သေနတ်ကိုအသာချလိုက်တယ်။

ခပ်တည်တည်ပဲပြောလိုက်တယ် မင်းတို့ လူမမြင်ပဲ ဘာလို့ရမ်းပစ်နေကြတာလဲဒီမှာ ကိုယ့်အချင်းချင်းထိကုန်ရင် ဘယ်လိုလုပ်မလဲ ပေးစမ်းမင်းတို့သေနတ်ဆိုပီး ရှေ့ထွက်ရပ်လိုက်ပါတယ်။

“တစ်ယောက်က ကြောင်အမ်းအမ်းနဲ့သေနတ်ကို ရှေ့ထိုးပေးပါရောချက်ခြင်းဆွဲယူပီး ပစ်သတ်လိုက်တယ်။နောက်တစ်ယောက်က ပွကြီးကို သေနတ်နဲ့ပစ်ဖို့ ချိန်လိုက်တဲ့အချိန်မှာ ပွကြီးကအဲ့ကောင်သေနတ်ကို ဆွဲယူပီး လက်သီးနဲ့ထိုးထဲ့လိုက်တယ်။ခွေးကောင်လဲကျသွားတယ်ဆွဲယူလိုက်တဲ့ သေနတ်နဲ့ပဲ ပစ်သတ်လိုက်ပြန်တယ်”ကျည်အသင့်ဖြည့်ပြီးသား စစ်သား ၂ ​ယောက်နဲ့ ပက်ပင်းတိုးတာမှာ ကျည်ကုန်​နေ​ပေမယ့် ​ကြောင်မသွားပဲ ဖြတ်ထိုးဥာဏ်သုံးပြီး လက်ချည်ဗလာတိုက်ခိုက်သွားတဲ့ ပွကြီးရဲ့ လုပ်ရပ်ကို KPDF ကတပ်ဖွဲ့ဝင်တဦးဖြစ်တဲ့ ရဲ​ဘော်​သီဟ ကစာနဲ့​ရေးပြပြီဂုဏ်ပြုမှတ်တမ်းတင်ထားတာဖြစ်ပါတယ်။

ပွကြီးနောက်ကကြည့်နေတဲ့ ရဲဘော်တွေသေနတ်တွေနဲ့ ချိန်ထားကြ​ပေမယ့်ကိုယ့်လူ ကွယ်နေတော့ ပစ်မရကြပါဘူး။ အက်ရှင်ရုပ်ရှင် ဇာတ်လမ်းဆန်ဆန် တိုက်ခိုက်ခဲ့တာမှာ ပွကြီးလက်မှာလည်း စစ်သားရဲ့သေနတ်လုယူလိုက်တဲ့အချိန်မှာပြောင်းတံကို ဆွဲမိသွားမို့ လက်အပူလောင်သွားပီး အရေပြား ကွာသွားခဲ့ပါ​သေးတယ်။

​ရှေ့တန်းမှာ အခုလိုအနီးကပ် ရန်သူနဲ့ကြုံရင်အတိုနဲ့ရှင်းရတာမျိုးပါ။ဒါ​ပေမယ့် အတိုက တစ်ပွင့်ဗိုလ်အထက်ပဲကိုင်ရတာမို့ ပွကြီးမှာ အတိုလည်းမရှိသလို ဓားမြှောင်လည်း မဆောင်ထားပါဘူး။ ဒါ​ကြောင့် လက်ဗလာနဲ့ နှစ်ယောက်တစ်ယောက်ကို စစ်သားဆီက သေနတ်ကိုလုပီး ပြန်ပစ်ခဲ့ရတာပါ။

“တကယ်တမ်းကြတော့သူ(ပွကြီး)က ပျော်ပျော်နေပီးအမြဲတမ်း တက်တက်ကြွကြွရှိတဲ့သူမျိုးပေါ့။ဒါပေမယ့်ဒီလိုဖြစ်ရပ်မျိုးကြတော့သူက ဉာဏ်ကောင်းသွားတာရယ်။ရန်သူကို နှစ်ယောက်တစ်ယောက်လက်ချည်ဗလာနဲ့ ဝင်လုံးရတာကတကယ်ကို ကျနော်တို့အတွက်က အံ့သြမှင်တက်စရာပါပဲ”လို့.ရဲ​ဘော်​သီဟက ​ပြောပါတယ်။

ရဲ​​ဘော်ပွကြီးကသာ စစ်သား ၂ ​ယောက်ကိုအဲလို မရှင်းနိုင်ခဲ့ဘူးဆိုရင် စစ်သား ၂ ​ယောက်ကလည်း ကျည်အသင့်ဖြည့်ပြီးသားမို့ ပစ်ခတ်မယ်ဆိုရင် ပွကြီး​နောက်မှာ ရှိနေတဲ့ တပ်စိပ်ဖြစ်တဲ့ KPDF နဲ့ ABSDF က ရဲ​ဘော်​တွေ အနည်းနဲ့အများထိခိုက်မှု​တွေရှိနိုင်ပါတယ် ။ဒါ​ကြောင့် ရဲ​ဘော်ပွကြီးကို အဲ့မှာရှိနေခဲ့တဲ့ တစ်စိပ်လုံးကကျေးဇူးတင်နေကြတယ်။

“ဒီအဖြစ်ကိုမျက်မြင်ကိုယ်တွေ့ ကြုံခဲ့ရတဲ့ကျောင်းသားတပ်က ညီလေးက ဒရုန်းမိုင်းထိလို့ဆေးရုံရောက်လာတော့ ပြောပြလို့ကို မပီးနိုင်။ဒါမျိုးကို ရုပ်ရှင်ထဲမှာပဲ တွေ့ဖူးတာအပြင်မှာချက်ခြင်းတုန့်ပြန်နိုင်စွမ်းရှိဖို့ကတော်တန်ယုံလူ မလွယ်ဘူးမဟုတ်လား” လို့ ရဲ​ဘော်သီဟက ဖွင့်ဟပါတယ်။

KIA နဲ့ KPDF ၊ABSDF စတဲ့မဟာမိတ်တပ်​တွေရဲ့ပြောင်​မြောက်တဲ့ရဲစွမ်းသတ္တိ နဲ့ တိုက်စွမ်းရည်​တွေ​ကြောင့် စစ်​ကောင်စီတပ်က ​လေ​ကြောင်းက​နေ ဗုံးမိုး​တွေရွာ ၊ ပြည်ပကဝယ်ယူထားတဲ့စွမ်းရည်မြင့်ဒရုန်း​တွေသုံး၊လက်နက်ကြီး​တွေ အများအပြားပစ် ​ပေမယ့် စစ်တပ်ရဲ့ ခလရ (၂၃၆) ကို​ရော ၊အမတ ၃၆၆ ကို​ရော​ ဖေ​ဖော်ဝါရီ တတိယပါတ်မှာ ​အောင်မြင်စွာသိမ်းပိုက်လိုက်ပါတယ် ။ စကခ (၂၁) ကို ကာ​ပေး​နေတဲ့ တပ်ရင်း​တွေကျသွားတာမို့ စစ်တပ်အတွက် ရှုံးချက်နာလှပါတယ်။

အခုဆိုရင် KIA နဲ့ ပူး​ပေါင်းတပ်​တွေရဲ့ ၂၀၂၄ ဒီဇင်ဘာ ၄ ရက်မှာစတင်တဲ့ ကချင်ပြည်နယ် ဒုတိယမြို့​တော်ကိုသိမ်းတဲ့ စစ်ဆင်​ရေးဟာ နှစ်လ​ကျော်အတွင်း အမှတ် (၇၀၀၆) သံချပ်ကာတပ်ရင်း ၊ အမှတ် (၅၀၁၄) တင့်ကားတပ်ရင်း ၊ အမှတ် (၃၆၆) အမြောက်တပ်ရင်း၊ အမှတ် (၂၃၆)​ခြေလျင်တပ်ရင်း၊ ဗန်း​မော်​လေယာဥ်ကွင်း ၊စရဖရုံး နဲဲ ဗန်း​မော်မြို့အတွင်းစစ်တပ်တပ်စွဲရာ​နေရာအများအပြားကို သိမ်းပိုက်ထားပြီးဖြစ်ပါတယ် ။

ဗန်း​မော်မြို့မှာ စစ်​ကောင်စီရဲ့ အဓိကတပ်ရင်းဌာနချုပ်ဖြစ်တဲ့ စကခ ၂၁ ကိုလည်းထိုးစစ်ဆင်​နေပြီဖြစ်ပြီး သိမ်းပိုက်ဖို့နီးကပ်လာတာပါ။ ဗန်း​မော်မြို့ဟာ ကချင်ပြည်နယ်မှာ စစ်​ရေးအရ ဗျူဟာ​မြောက်လှတာမို့ စစ်တပ်ကလည်း ​လေ​ကြောင်းတိုက်ခိုက်မှု​တွေနဲ့ အပြင်းအထန်ခုခံခဲ့ပါတယ်။ ဗန်း​မော်မှာ အရင်ရှိ​နေတဲ့ တပ်​တွေရယ် ၊စစ်ရှုံးပြီး စွန့်လွတ်ရတဲ့မြို့​တွေက ​ပြေးလာတဲ့စစ်တပ်​တွေရယ် အင်အား​ထောင်ချီ ရှိသလို ခံစစ်အခိုင်အမာတည်​ဆောက်ထားတာ​ကြောင့်တိုက်ပွဲ​တွေဟာပြင်းထန်လှပါတယ်။

မြို့သိမ်းတိုက်ပွဲ တ​လျှောက် ​​တော်လှန်​ရေးတပ်ဖွဲ့ဝင်​တွေဟာ ရဲဝံ့စွန့်စားကြသလို ၊ပြင်းထန်လှတဲ့တိုက်ပွဲမို့ နှစ်ဖက် ထိခိုက်ကျဆုံးမှု​တွေလည်းများတယ်လို့ရဲ​ဘော်​တွေက​ပြောပါတယ်။ ဒီလို ပြင်းထန်တဲ့ ​ရှေ့တန်းမှာ ရဲ​ဘော်ပွကြီးလို တပ်ဖွဲ့ဝင်​တွေရဲ့ စွမ်းရည်​တွေ​ကြောင့် ကချင်ပြည်နယ်ရဲ့ ဒုတိယမြို့​တော်မှာ KIA ဦး​ဆောင်တဲ့​တော်လှန်​ရေးတပ်​တွေက သိမ်းပိုက်နိုင်နီးကပ်လာပြီဖြစ်ပါတယ်။

အခု​တော့ ရဲ​ဘော်ပွကြီးရဲ့ အပူ​လောင်တဲလက်ကလည်း​ဆေးထည့်ပြီး​ကောင်းသွားပါပြီ။သမိုင်းဝင်ဗန်း​မော်မြို့သိမ်းတိုက်ပွဲမှာ ရဲ​ဘော်သီဟ အတွက် ရဲ​ဘော်ပွကြီးရဲ့ စွမ်း​ဆောင်မှုကို အမြဲအ မှတ်ရနေမှာဖြစ်ပြီး မှတ်တမ်းတင်ထားပြီဖြစ်ပါတယ်။

“သတ္တိကောင်းခဲ့တာလားဆိုတော့တကယ်တမ်းပြောရရင်ရဲဘော်တိုင်း သတ္တိကောင်းကြတယ်။ဒါပေမယ့်ဒီလိုနဖူးတွေ့ ဒူးတွေ့ အသက်လုရမယ့် အချိန်ရောက်တော့ သတ္တိရှိတယ်ဆိုတာထက် လုပ်သင့်တာကို သူမှန်မှန်ကန်ကန် မြန်မြန်ဆန်ဆန် ဆုံးဖြတ်နိုင်တာက ကျနော်တို့ သူ့ကို ပိုလေးစားစရာ ဖြစ်ရတာပေါ့”လို့ ရဲ​ဘော်ပွကြီးရဲ့ စွမ်း​ဆောင်ရည်အ​ပေါ် ရဲ​ဘော်သီဟက မှတ်ချက်ပြုလိုက်ပါတယ်။