ဘယ်လို ဟက်ပီးနယူးရီးယားလဲ

Scorpio/People’s Spring

ရန်ကုန်၊ မန္တလေးအပါအဝင် မြို့ကြီးတွေမှာ နှစ်သစ်ကူးညကို နှုတ်ဆက်ဖို့ စူပါမားကတ်တွေ၊ အကင်ဆိုင်တွေ၊ အဖျော်ယမကာဆိုင်တွေမှာ လူတွေ ကြိတ်ကြိတ်တိုးခဲ့တယ်။ ပုဂံ၊ ပြင်ဦးလွင်၊ ချောင်းသာ၊ကျိုက်ထီးရိုး စတဲ့နေရာတွေလည်း ဧည့်သည်တွေ တိုးဝှေ့နေခဲ့တယ်။ စစ်ကောင်စီက လုပ်ပေးတဲ့ နှစ်သစ်ကူးပျော်ပွဲရွှင်ပွဲ စတိတ်ရှိူးပွဲတွေမှာလည်း လူတွေ စည်ကားခဲ့တယ်။

မြို့ပေါ်မှာလိုပဲ စစ်ကိုင်းတိုင်း၊ ကသာ-မြစ်ကြီးနားလမ်းပေါ်မှာလည်းအလားတူလူတွေကြိတ်ကြိတ်တိုးခဲ့ပါတယ်။ မြို့ကြီးတွေကလို နှစ်ကူးညပျော်ဖို့ပါးဖို့မဟုတ်ဘဲ အသက်ရှင်သန်ရေးအတွက် စစ်ရှောင်ရတဲ့ပြည်သူတွေပဲ ဖြစ်ပါတယ်။

ဒီဇင်ဘာ၃၁ရက် ညဟာ ပိုလို့မှောင်နေခဲ့တယ်။ နှင်းတွေဟာ ထူထူထည်းထည်းကြီးကျနေခဲ့တယ်။ မြစ်ကြီးနားဘက်ပြေးသူတွေ ညမိုးချုပ်လာတော့ ဗျူဟာလမ်းဘေးဆင်းကာ အိပ်စက်ဖို့ ပြင်ကြတယ်။ “ ဆိုင်ကယ်ပေါ်မှာ စောင်အိပ်တွေချည်း တင်ခဲ့လို့ တော်သေးတာ” လို့ ကသာမြို့က စစ်ရှောင်ပြည်သူတစ်ဦးက ပြောပါတယ်။ စစ်ရှောင်တွေဟာ လမ်းဘေး မြေသားအေးအေးပေါ် မိုးကာခင်းအိပ်ရင်း နှစ်သစ်ကို ကြိုခဲ့ကြပါတယ်။

Public Service Announcement

ကသာက ပြည်သူတွေလိုပဲ စစ်ကိုင်းတိုင်းဘုတလင်မြို့နယ်မှာလည်း ရွာပေါင်း ၂၀ လောက်က ပြည်သူတွေဟာ စစ်ဘေးရှောင်နေရတယ်။ နှစ်ကူးညမှာပဲ အမိုးအကာမပါတဲ့ ဆီး​ခြံတွေထဲ၊ ပေါင်းမိုးတွေနဲ့ အိပ်စက်နေကြရတယ်။ အိပ်မပျော်သူတွေကတော့ နှင်းတောထဲ ငုတ်တုပ်ထိုင်ရင်း နှစ်သစ်ကို ကြိုခဲ့ကြရပါတယ်။

မန္တလေးတိုင်းထဲက မတ္တရာ၊ စဥ့်ကူး၊ သပိတ်ကျင်းနယ်က စစ်ရှောင်ပြည်သူတွေဟာလည်း နှစ်ကူးညကိုစစ်ရှောင်စခန်းတွေမှာဖြတ်သန်းနေကြရပါတယ်။

ကသာဘက်ကပြည်သူတွေဟာ ကချင်ပြည်နယ်ဘက် ဦးတည်ပြေးခဲ့ကြပေမဲ့ ကချင်ဘက်မှာလည်း သိပ်ထူးမခြားနားပါ။ ကချင်ပြည်နယ်၊ ဖားကန့်မြို့မှာလည်း မနေ့က နှစ်ကူးမယ့်ညနေခင်း ၅ နာရီလောက်မှာ တပ်မကုန်းက စစ်တပ်က လက်နက်ကြီးနဲ့ အကြောင်းမဲ့ ပစ်ခတ်ခဲ့လို့ စိုင်းတောင် ရပ်ကွက် ၁ ထဲကျပြီး ပြည်သူ ၂ ဦး ထိခိုက်ဒဏ်ရာရရှိခဲ့ကြောင်း သိရပါတယ်။ဒါ့အပြင် နှစ်ကူးချိန် လက်နက်ကြီးတွေနဲ့တောက်လျှောက်ပစ်နေခဲ့တယ်လို့ ဒေသခံတွေက ပြောပါတယ်။

မြို့ပေါ်မှာ နှစ်သစ်ကူးညမို့ စျေးဆိုင်တွေ ရောင်းပန်းဝယ်ပန်းလှနေချိန် မကွေးတိုင်း၊ မြိုင်မြို့နယ်၊ ညောင်ကုန်းရွာက အပြင်အဆင်လေးတွေနဲ့ မျက်စိပသာဒဖြစ်အောင် ကြိုးစားထားတဲ့ ဝိုင်းလေး ဆိုတဲ့စားသောက်ဆိုင်လေးလည်း ဧည့်မျှော်နေခဲ့တယ်။ စျေးစရောင်းဖို့ ပြင်ဆင်နေတဲ့အချိန် ညနေပိုင်း ၄ နာရီခန့်မှာတော့ဧည့်မျှော်နေတဲ့ဆိုင်ကလေးကို စစ်တပ်က လေကြောင်းတိုက်ခိုက်ခဲ့ပါတော့တယ်။

အဲဒီတိုက်ခိုက်မှုကြောင့် ဆိုင်ရှင်အမျိုးသမီးသေဆုံးပြီး ၂ ဦး ဒဏ်ရာရခဲ့ပါတယ်။ဒါ့အပြင်နေအိမ်သုံးလုံးနဲ့ ဆိုင်ခန်းများမီးလောင်ပျက်စီးခဲ့ကြောင်း We Love Myaing အဖွဲ့က ပြောပါတယ်။

“ အဲဆိုင်လေး ပြင်ဆင်ထားတာမှမကြာသေး။ဘူး အခုတလောမှာ ဆိုင်လေးက စျေးလေးအတန်အသင့် ရောင်းနေရတာ” လို့ ဒေသခံတစ်ဦးက ပြောပါတယ်။

မြောင်နယ်ကနေ စစ်ကိုင်းတိုင်းဘက်ကူးမယ်ဆိုရင် ရောက်မယ့် ဆားလင်းကြီးမြို့နယ်မှာလည်း​နိုင်ငံတွင်းက ​ကြေးနီ​တွေတူးထုတ်​နေတဲ့ ယန်စီကုမ္မဏီဝင်းထဲက စစ်ကောင်စီတပ်ကနေ နှစ်ကူးမယ့်ည ၈ နာရီခွဲလောက်မှာ လက်နက်ကြီးနဲ့ ပစ်ခတ်လို့ ယင်းမာပင်မြို့နယ်၊ တယ်ပင်ကန်ရွာထဲ လက်နက်ကြီးကျပြီး ပြည်သူ ၃ ဦး ထိခိုက်ဒဏ်ရာ ရခဲ့ပါတယ်။

အညာမှာတင်မကဘဲ တိုင်းရင်းသားဒေသတွေမှာပါ စစ်ကောင်စီက နှစ်ဟောင်းကို ကြမ်းတမ်းစွာ နူတ်ဆက်ခဲ့ပါတယ်။ ည ၇ နာရီခွဲလောက်က ရခိုင်ပြည်နယ်၊ သံတွဲမြို့ပေါ် အမှတ် (၁) ရပ်ကွက်ကို လေကြောင်းတိုက်ခိုက်ခဲ့ပါတယ်။ အဲဒီတိုက်ခိုက်မှုကြောင့် နှစ်ပေါင်းရာချီသက်တမ်းရှိတဲ့ရှေးဟောင်းအိမ်လေးလုံးအပါအဝင် အိမ်ကိုးလုံးပျက်ခဲ့ပြီး လူသုံးဦး ဒဏ်ရာရခဲ့တယ်လို့ ဒေသခံတွေက ပြောပါတယ်။

အာဏာသိမ်းစစ်ကောင်စီရုံးစိုက်တဲ့ နေပြည်တော်မှာလည်း မနေ့ည ၇ နာရီလောက်မှာ ပျဥ်းမနားမြို့နယ်၊ ရန်အောင်(၂)၊ ရန်နိုင်ရပ်ကွက်မှာ မီးလောင်ခဲ့ပါတယ်။ ပျဥ်းမနားမှာ နေ့ခင်းကလည်း တစ်ကြိမ်လောင်ခဲ့ပြီး ဒါကဒုတိယအကြိမ်ပါ။ တစ်နာရီကျော်လောင်ကျွမ်းခဲ့ပြီးနောက် နေအိမ် ၆၀ ကျော် ပြာကျခဲ့တယ်လို့ ဒေသခံတွေက ပြောပါတယ်။ “ မနက်ပိုင်းလောင်တာ အိမ်၂ လုံး၊ ညပိုင်းလောင်တာက အိမ် ၆၂လုံး။ ပျဉ်းမနားရဲ့ နှစ်သစ်ကြိုဆိုပုံကြီးက အတော်စိတ်မချမ်းမသာဖြစ်ရပါတယ်။” လို့ ဒေသခံတစ်ဦးက ပြောတယ်။

ဇန်နဝါရီ ၁ ရက် နှစ်ဆန်းတစ်ရက်နေ့မှာလည်း စစ်ကောင်စီက ၎င်းတို့လုပ်နေကျအတိုင်း ဒေသအသီးသီးမှာ အကြမ်းဖက်လုပ်ရက်တွေ ဆက်လက် လုပ်ဆောင်နေဆဲပါ။ ဒီကနေ့ညနေ ၄ နာရီခန့်က မနေ့ကလေကြောင်းတိုက်ခိုက်ခဲ့တဲ့ မြိုင်နယ်မှာပဲ ပေါက်နဲ့ မြိုင်နယ်အစပ်က ရေနံမှော်ဒေသကို စစ်တပ်က ဂျိုင်ရိုကော်ပတာသုံးစီးနဲ့ လေကြောင်းတိုက်ခိုက်သွားပြန်ပါတယ်။ အာဏာသိမ်းစစ်တပ်ဟာ ၂၀၂၆ ကိုလည်း အကြမ်းဖက်လုပ်ရက်တွေနဲ့ ဆက်လက်မိုက်တွင်းနက်နေဆဲပဲ ဖြစ်ပါတယ်။