မန္တလေးတိုင်းဒေသကြီး စဉ့်ကူးမြို့နယ်တွင် မင်္ဂလာဧည့်ခံပွဲ ဖိတ်စာပို့သွားသည့် သတို့သားလောင်းကို စစ်ကောင်စီလက်နက်ကိုင်များက ပစ်ခတ်သတ်ဖြတ်လိုက် ၍ သေဆုံးသွားကြောင်း ဒေသခံ အချို့က ပြောသည်။
စဉ့်ကူးမြို့နယ် လက်ပန်လှအုပ်စု ငြိမ်းချမ်းအောင်ရပ်ကွက်နေ သတို့သားလောင်း မောင်ကျော်ကျော်မျိုးသည် လက်ပန်လှရွှာသို့ ဖိတ်စာသွားပို့ရာ ယမန်နေ့ (ဇွန်လ ၂၀ရက်) ည ၉နာရီခန့်တွင် ပစ်ခတ်သတ်ဖြတ်ခံရခြင်းဖြစ်သည်။
“ဖြစ်စဉ်ကတော့ သူက မနေ့ညက သူ့သူငယ်ချင်းကို ဖိတ်စာသွားဖိတ်တာမှာ ၈နာရီကျော်လို့ ပစ်ခံရတာလို့ သိရတယ်။ လက်ပံလှ အထက ကျောင်းအနောက်ဖက်မှာ ပစ်ခံရတာ။” ဟုဒေသခံတစ်ဦးက ပြောသည်။ လက်ပံလှရွာသည် စဉ့်ကူးမြို့နှင့် ၅မိုင်ခန့်သာကွာဝေးသည်ဟု ဆိုသည်။
မောင်ကျော်ကျော်မျိုးနှင့်အတူ အဖော်လိုက်ပါလာသူ လူငယ်တစ်ဦးကိုလည်း စစ်ကောင်စီတပ်များက ရိုက်နှက်ဖမ်းဆီးခေါ်ဆောင်သွားကြောင်း ဒေသခံက ပြောသည်။
မောင်ကျော်ကျော်မျိုးသည် ဇွန်လ ၂၄ရက် တွင် မင်္ဂလာပွဲပြုလုပ်မည်ဖြစ်ရာ မင်္ဂလာပွဲမတိုင်မီ ၄ရက်အလိုတွင် စစ်ကောင်စီတပ်၏ ပစ်ခတ်သတ်ဖြတ်ခံရခြင်းဖြစ်သည်။
မောင်ကျော်ကျော်မျိုးသည် စဉ့်ကူးမြို့နယ်တွင် စစ်ကောင်စီတပ်၏ လက်ချက်ကြောင့် ပထမဆုံး သေဆုံးခဲ့သူဖြစ်ကြောင်း စဉ့်ကူးမြို့ခံတစ်ဦးက ပြောသည်။