အကြမ်းဖက်မြန်မာစစ်တပ်ဟာ အကြမ်းဖက်မှုတွေရပ်တန့်ဖို့နဲ့ မတရားဖမ်းဆီးထိန်းသိမ်းခံရသူ အားလုံးကို ပြန်လွှတ်ပေးဖို့ ဥရောပသမဂ္ဂဒုတိယဥက္ကဌ Josep Borrell က မနေ့က တိုက်တွန်းတောင်းဆိုလိုက်ပါတယ်။
ဥရောပသမဂ္ဂရဲ့နိုင်ငံခြားရေးရာနဲ့ လုံခြုံရေးမူဝါဒဆိုင်ရာ မဟာမင်းကြီးလည်းဖြစ်တဲ့ Josep Borrell ဟာ အာဆီယံကခန့်အပ်လိုက်တဲ့ မြန်မာနိုင်ငံဆိုင်ရာ အထူးကိုယ်စားလှယ်နဲ့ မနေ့က ဆွေးနွေးမှုပြုလုပ်ခဲ့ပြီးနောက်မှာ တွစ်တာစာမျက်နှာကနေ ထုတ်ပြန်အသိပေးတာဖြစ်ပါတယ်။
“အကြမ်းဖက်မှုကို ရပ်တန့်ရပါမယ်။ အာဏာသိမ်းပြီးနောက်ပိုင်း ဖမ်းဆီးထိန်းသိမ်းခံရသူအားလုံးကို ချက်ချင်းလွှတ်ပေးရပါမယ်။ လူသားချင်းစာနာမှုဆိုင်ရာရရှိဖို့ အာမခံရပါမယ်။ နောက်ပြီး ဒီမိုကရေစီနည်းကျနိုင်ငံတည်ထောင်ဖို့ စစ်မှန်တဲ့နိုင်ငံရေးတွေ့ဆုံဆွေးနွေးရေးဖြစ်စဉ် လုပ်ဆောင်ရပါမယ်” လို့ Josep Borrell က ဆိုပါတယ်။
ဥရောပသမဂ္ဂဟာ မြန်မာပြည်သူလူထုဘက်မှ ခိုင်မာပြတ်သားစွာ ရပ်တည်လျက်ရှိပြီး မြန်မာနိုင်ငံ ဒီမိုကရေစီလမ်းကြောင်းပေါ် ပြန်လည်ရောက်ရှိလာဖို့ ကြိုးပမ်းရာမှာ အာဆီယံရဲ့ အခြားမိတ်ဖက်တွေနဲ့ ပူးပေါင်းကာ အထူးကိုယ်စားလှယ်ကို ကူညီပံ့ပိုးပေးဖို့ အသင့်ရှိတယ်လို့ ဒီလဆန်း ပိုင်းမှာထုတ်ပြန်ထားပါတယ်။
အာဆီယံနဲ့ အထူးကိုယ်စားလှယ်အနေနဲ့ ပြည်ထောင်စုလွှတ်တော်ကိုယ်စားပြုကော်မတီ (CRPH)၊ အမျိုးသားညီညွတ်ရေးအစိုးရ (NUG)၊ တိုင်းရင်းသားများ၊ အခြားသော ဒီမိုကရေစီလိုလားသူအင်အားစုများအပါအဝင် ပတ်သက်ဆက်နွှယ်သူအားလုံးနဲ့အတူ အဓိပ္ပာယ်ပြည့်ဝတဲ့ နိုင်ငံရေးနှီးနှောဆွေးနွေးမှု ပြုလုပ်ခြင်းက အခရာကျတယ်လို့ အီးယူက ထောက်ပြတိုက်တွန်းထားပါတယ်။
