အာဏာသိမ်းစစ်ကောင်စီက ပြည်သူလူထုအပေါ် အကြမ်းဖက်တိုက်ခိုက်နေမှု လုပ်ရပ်များကို ကာကွယ်ရန်အတွက် တိုက်ပွဲများကို ပုံစံမျိုးစုံဖြင့် ဆောင်ရွက်နေကြောင်း အမျိုးသားညီညွတ်ရေး အစိုးရ(NUG)က ယနေ့ ပြုလုပ်သည့် သတင်းစာရှင်းလင်းပွဲတွင် နိုင်ငံခြားရေးဝန်ကြီးဌာန ဒုတိယဝန်ကြီး ဦးမိုးဇော်ဦးက ပြောသည်။
တိုက်ပွဲဟုဆိုရာတွင် စစ်ကောင်စီ၏ စစ်ရေးအရ ထိုးနှက်မှုကို ခုခံရန် ပြင်ဆင်မှုများ လုပ်ဆောင်နေသကဲ့သို့ သံတမန်အရေးအရ တိုက်ပွဲ၊ ဘဏ္ဍာရေးအရ တိုက်ပွဲနှင့် ဆက်သွယ်ရေးအရ တိုက်ပွဲ စသည့် တိုက်ပွဲများ လုပ်ဆောင်ခဲ့ကြောင်း ၎င်းက ဆိုသည်။
ပြင်ဆင်မှုအားလုံးကို ဆောင်ရွက်နေသော်လည်း ဒီဒေးအတွက် အထူးတလည် ရက်သတ်မှတ်ချက်မရှိကြောင်း ဦးမိုးဇော်ဦးက ပြောသည်။
“ကျွန်တော်တို့ မြန်မာစကားပေါ့ ကုသိုလ်ကောင်းမှုလုပ်ဖို့အတွက်ဆိုရင် ရက်တိုင်းက ရက်ရာဇာပဲလို့ ပြောတဲ့စကား ရှိသလိုပဲပေါ့လေ ကျွန်တော်တို့က မတရားမှုတွေကို ဖိနှိပ်မှုတွေကို တွန်းလှန် တိုက်ခိုက်တဲ့အခါမှာတော့ ရက်တိုင်းကတော့ ဒီဒေးပဲပေါ့။ ဒီဒေးဆိုတာ ဒီနေ့လည်း ဖြစ်နိုင်တယ် မနက်ဖြန်လည်း ဖြစ်နိုင်တယ်။ အထူးတ လည်တော့ သတ်မှတ်ထားတာမရှိပါဘူး။ ရက်တိုင်းက ကျွန်တော်တို့အတွက် ဒီဒေးတွေပါပဲလို့ ပြောချင်ပါတယ်”ဟု ဦးမိုးဇော်ဦးက ပြောကြားသည်။
မကြာသေးမီကပင် NUG ယာယီသမ္မတ ဒူဝါလရှီးလက စစ်ကောင်စီ၏ ပြည်သူလူထုအပေါ် အကြမ်းဖက်သတ်ဖြတ်နေမှုကို ကာကွယ်ရန် မလွှဲမသွေတိုက်ပွဲဆင်နွှဲရမည်ဖြစ်ကြောင်း၊ တိုက်ပွဲစတင်မည့်ရက်ကို ညှိနှိုင်းသတ်မှတ်ပြီး ၀ိုင်းဝန်းဆုံးဖြတ်ရမည်ဖြစ်ကြောင်း ပြောကြားထားသည်။