ကုသမဂ္ဂကိုယ်စားလှယ်စိစစ်ရေးရွေးချယ်ရေးကော်မတီ ကနေ မြန်မာနိုင်ငံအတွက် ကြားအဖြေတခုထွက်လာနိုင်တဲ့အနေအထားရှိတယ်လို့ NUG ရဲ့ နိုင်ငံခြားရေးဝန်ကြီး ဒေါ်ဇင်မာအောင် က ပြောပါတယ်။
တကမ္ဘာလုံးက စစ်အာဏာသိမ်း တာကိုဆန့်ကျင်ထားတဲ့အတွက် ကော်မတီဟာ စစ်ကောင်စီရဲ့ ကိုယ်စားလှယ်ကို လက်ံခံမှာမဟုတ်တဲ့အတွက် အဆိုးဆုံးအခြေအနေတော့ ဖြစ်လာဖို့မရှိကြောင်း ဝန်ကြီး က ဆိုပါတယ်။
“လက်ရှိအချိန်ထိတော့ဒီအဆိုးဆုံးအခြေအနေ ဖြစ်လာဖို့မရှိဘူးဆိုတာ နားလည်လို့ရတယ် မျှော်လင့်လို့ရတယ် ၊ဒါဆိုဘယ်အခြေအနေဖြစ်နိုင်လဲဆိုတော့ အကောင်ဆုံးအခြေအနေကတော့ NUG ကိုလည်းထောက်ခံ ဦးကျော်မိုးထွန်းလည်းဆက်ရှိနေမယ့်အနေအထားပေါ့ ၊ဒီအနေအထားကလည်း ဆက်လက်ပြီး ရုန်းကန်ရမယ့်အနေအထားဖြစ်တယ် ၊ကြားအဖြေတခု ထွက်လာနိုင်တဲ့အနေအထားမျိုး ရှိတယ်လို့ကျွန်မတို့သုံးသပ်ရပါတယ် ” ဝန်ကြီး ဒေါ်ဇင်မာအောင်က ပြောပါတယ်။
ဒါကြောင့် ကျင်းပဆဲ ကုလသမဂ္ဂအထွေထွေညီလာခံ ပြီးသွားရင် စစ်ကောင်စီကိုအသိအမှတ်မပြုဖို့ ၊ NUG ကိုသာ တရားဝင်အစိုးရအနေနဲ့ အသိအမှတ်ပြုဖို့ ဆက်လက်ကြိုးပမ်းရမယ်လို့လည်းပြောပါတယ်။
Public Service Announcement
ကုလသမဂ္ဂမှာ မြန်မာနိုင်ငံကို ကိုယ်စားပြုခွင့်ရဖို့ NUG နဲ့ စစ်ကောင်စီက အပြိုင်တင်သွင်းထားတာကြောင့်ကိုယ်စားလှယ် စိစစ်ရေးကော်မတီက ဆုံးဖြတ်ရွေးချယ်ရမှာဖြစ်ပါတယ်။
ကော်မတီရဲ့ ဆုံးဖြတ်ချက်ဟာ ဖြစ်နိုင်ခြေ ၄ မျိုးရှိနေပြီး အဲဒီ ဖြစ်နိုင်ခြေတွေကတော့ NUG ရဲ့ုကိုယ်စားလှယ်ကိုရွေးချယ်တာ ၊စစ်ကောင်စီ ကိုယ်စားလှယ်ကိုရွေးချယ်တာ ၊ ၂ ဖက်လုံးကို မရွေးချယ်ဘဲ လက်ရှိတာဝန်ထမ်းဆောင်ဆဲ သံအမတ်ကြီး ဦးကျော်မိုးထွန်းကိုပဲဆက်ခန့်တာ ၊ မြန်မာထိုင်ခုံကို အလွတ်ထား တာပဲဖြစ်ပါတယ်။
စက်တင်ဘာလ ၁၄ ရက် ကုလညီလာခံ စတင်တဲ့ နေ့မှာပဲ အမေရိကန် အခြေစိုက် မူဝါဒရေးရာ စာစောင် Foreign Policy က မြန်မာကိုယ်စားပြုခွင့်နဲ့ပတ်သက်ပြီး စစ်ကောင်စီရဲ့ ကိုယ်စားလှယ်ကို တက်ခွင့်မပေးဘဲ ဦးကျော်မိုးထွန်းကိုသာ တက်ခွင့်ပေးဖို့အမေရိကန်နဲ့ တရုတ်တို့ သဘောတူညီချက်ရခဲ့တယ်လို့ဆိုထားပါတယ်။
ဒါပေမယ့်အဲဒီသဘောတူညီချက်မှာ သံအမတ်ကြီး ဦးကျော်မိုးထွန်းဟာ ညီလာခံမှာ စကားပြောဆိုခွင့်ရမှာမဟုတ်ဘူးလို့လည်းဖော်ပြထားတာတွေ့ရပါတယ်။
