နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို စွဲဆိုထားတဲ့အမှု ၁၁ မှုအနက် ပုဒ်မ ၅၀၅ (ခ) နဲ့စွဲဆိုထားတဲ့အမှုကို စွဲချက် တင်မတင် မနက်ဖြန် စက်တင်ဘာလ ၂၁ ရက်မှာ အမိန့်ချမယ်လို့ ရှေ့နေ ဆီကသိရပါတယ်။
ဒီနေ့ ရုံးချိန်းမှာတော့ သဘာဝဘေးအန္တရာယ်စီမံခန့်ခွဲမှုဥပဒေ နဲ့စွဲဆိုထားတဲ့အမှုကို စစ်ဆေးဖို့ရှိပေမယ့် တရားလို သက်သေ မလာတဲ့အတွက် လာမယ့် စက်တင်ဘာလ ၂၇ ရက်ကို ရုံးချိန်း ချိန်းဆိုလိုက်တယ်လို့ တရားလွှတ်တော်ရှေ့နေ ဒေါ်မင်းမင်းစိုးက ပြောပါတယ်။
ဒါအပြင် ပို့ကုန်သွင်းကုန်ဥပဒေ နဲ့စွဲဆိုထားတဲ့အမှု ဟာလည်း စစ်ဆေးစရာ တရားလိုပြသက်သေ ကုန်သွားတဲ့အတွက် နှစ်ဖက်လျှောက်လဲချက်ပေးဖို့ စက်တင်ဘာလ ၂၇ ရက်ကို ချိန်းဆိုလိုက်တယ်လို့ သိရပါတယ်။
ဒီနေ့ ရုံးချိန်းမှာ သမ္မတဦးဝင်းမြင့် ကိုသဘာဝဘေးအန္တရာဆိုင်ရာစီမံခန့်ခွဲမှု ဥပဒေနဲ့စွဲထားတဲ့အမှုကိုလည်း စစ်ဆေးခဲ့ပြီး အဲဒီအမှုမှာ စစ်ဆေးစရာ သက်သေကုန်သွားပြီလို့ တရားလွှတ်တော်ရှေ့နေ ဒေါ်မင်းမင်းစိုးက ပြောပါတယ်။
Public Service Announcement
ဒေါ်အောင်ဆန်းစုကြည် ဟာ ဆက်သွယ်ရေးဥပဒေ ၊ ပို့ကုန်သွင်းကုန်ဥပဒေ ၊သဘာဝဘေးအန္တရာယ်ဆိုင်ရာစီမံခန့်ခွဲမှုဥပဒေ ၊ နိုင်ငံတော်လျှို့ဝှက်ချက်ဥပဒေ ၊ အဂတိဥပဒေ တွေနဲ့ စစ်ကောင်စီရဲ့ တရားစွဲဆိုခြင်းကိုခံနေတာပါ။
မနက်ဖြန်မှာတော့ အဲဒီအမှုတွေထဲက ရာဇသတ်ကြီး ပုဒ်မ၅၀၅(ခ) နဲ့ စွဲထားတဲ့အမှုကို စွဲချက်တင် မတင် အမိန့်ချမယ်လို့ သိရပါတယ်။
ဆူပူအောင်လှုံဆော်တယ်ဆိုကာ စွဲဆိုထားတဲ့ ၅၀၅ (ခ) ပုဒ်မဟာ ထောင် ၂ နှစ် ချနိုင်တဲ့ ပုဒ်မလည်းဖြစ်ပါတယ်။
