ထိုင်းနိုင်ငံ၊ကန်ချနာဘူရီ ၊မြောင်ခရိုင်ထဲမှာ နယ်စပ်ကိုဖြတ်ကျော်ပြီး တရားမဝင်ဝင်ရောက်လာတဲ့ မြန်မာ ၁၄ ဦးကို မနေ့က စက်တင်ဘာလ ၂၃ ရက်မနက် ပိုင်းမှာ ထိုင်းအာဏာပိုင်တွေက ဖမ်းဆီးလိုက်ပါတယ်။
အထူးတပ်ဖွဲ့ နဲ့ဒေသခံရဲတပ်ဖွဲ့တို့ပူးပေါင်းပြီး ကင်းလှည့်ချိန်မှာ တောအုပ်ထဲမှာ ပုန်းနေတဲ့ မြန်မာနိုင်ငံသား ၁၄ ဦးကို တွေ့ရှိတာဖြစ်ပြီး ဒီထဲမှာ အမျိုးသား ၇ ဦးပါတယ်လို့သိရပါတယ်။
ဖမ်းမိတဲ့မြန်မာနိုင်ငံသားတွေဟာ ခရီးသွားအထောက်အထားစာရွက်စာတမ်းတခုမှ ကိုင်ဆောင်လာတာ မရှိဘူးလို့ ဘန်ကောက်ပို့စ် သတင်းစာက ဖော်ပြပါတယ်။
ဖမ်းမိပြီးတဲ့နောက်မေးမြန်းချက်အရ သူတို့တွေဟာ တောလမ်းအတိုင်း ထားဝယ် ကနေ သုံးရက်ကြာ လမ်းလျှောက်လာတာဖြစ်တယ်လို့သိရပါတယ်။
အဲဒီနောက် အလုပ်ပွဲစားရဲ့ လမ်းညွှန်မှု နဲ့ လာရောက်ခေါ်ယူမယ့်နေရာမှာ စောင့်ဆိုင်းနေချိန်ဖမ်းခံရတာပါ။
အလုပ်ပွဲစားဟာသူတို့ကို ထိုင်းနိုင်ငံ ဆူရတ်ဌာနီ၊ ဖန်ဂ နဲ့ ဆန်ခလာ မှာ အလုပ်ရမယ်လို့ ပြောထားပြီး တဦးကို အလုပ်ရှာဖွေခအဖြစ် ဘတ်ငွေ ၁၅၀၀၀ ကနေ ၂၂၅၀၀ အထိ ပေးရတယ်လို့သိရပါတယ်။
ဖမ်းမိပြီးတဲ့နောက် ဥပဒေအတိုင်းအရေးယူဖို့နဲ့ #ပြည်နှင်ဒဏ် ပေးဖို့ အတွက် ကိုဗစ်ကူးစက်ခံရမှု ရှိ မရှိ စစ်ဆေးပြီး ရဲစခန်းကိုလွှဲပြောင်းပေးလိုက်တယ်လို့ ဘန်ကောက်ပို့စ်က ရေးသားထားပါတယ်။
ဖမ်းမိထားတဲ့မြန်မာနိုင်ငံသားတွေကို ထိုင်းစစ်သားတဦးက မေးမြန်းနေစဉ်
ဓာတ်ပုံ − ဘန်ကောက်ပို့စ်