အဂတိပုဒ်မနဲ့ ဒေါ်အောင်ဆန်းစုကြည်ကို စွဲဆိုထားတဲ့အမှုမှာ ဦးဖြိုးမင်းသိန်း သက်သေအဖြစ် ထွက်ဆို

အဂတိပုဒ်မ နဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် စွပ်စွဲခံထားရတဲ့အမှု ကို ဒီနေ့ နေပြည်တော်မှာစစ်ဆေးရာ တရားလိုသက်သေအဖြစ် ဦးဖြိုးမင်းသိန်း လာရောက်ပြီး ထွက်ဆိုသွားတယ်လို့ တရားလွှတ်တော် ရှေ့နေ ဦးခင်မောင်ဇော် ဆီကသိရပါတယ်။ဒီနေ့အမှုကိုစစ်ဆေးရာမှာ အရပ်သားသက်သေတဦးကို သက်သေထွက်ဆိုဖို့ရှိတယ်ဆိုကာ တရားခွင်ထဲကို တရားသူကြီးက ဝင်ခွင့်ပြုခဲ့တယ်လို့ သိရပါတယ်။

အဲဒီအရပ်သားသက်သေ ဟာ ဦးဖြိုးမင်းသိန်း ဖြစ်နေတာကိုတွေ့ရပြီးစိတ်ဓာတ်ကျဆင်းနေပုံရကာ ဒေါ်အောင်ဆန်းစုကြည်ရှေ့က ဖြတ်လျှောက်သွားချိန်မှာတောင် လှည့် ကြည့်သွားတာမျိုး မရှိဘူးလို့ တရားလွှတ်တော်ရှေ့နေ ဦးခင်မောင်ဇော်က ပြောပါတယ်။

ဦးဖြိုးမင်းသိန်းရဲ့ထွက်ဆိုချက်တွေကတော့စစ်ကောင်စီရဲ့ဝါဒဖြန့် မြဝတီမီဒီယာမှာ ထုတ်လွှင့်ခဲ့တဲ့ ရုပ်သံဖိုင်ထဲက အတိုင်းဖြစ်တယ်လို့ သိရပါတယ်။

အဲဒီရုပ်သံဖိုင်မှာတော့ ဦးဖြိုးမင်းသိန်းဟာ ဒေါ်အောင်ဆန်းစုကြည်ကို ရွှေချောင်းနဲ့ ဒေါ်လာတွေပေးခဲ့တယ်လို့ ပြောထားတာဖြစ်ပါတယ်။

Public Service Announcement