ကိုဗစ်စည်းကမ်း ချိုးဖောက်တယ်ဆိုပြီး သမ္မတ ဦးဝင်းမြင့်နဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ကို စစ်ကောင်စီက စွဲဆိုထားတဲ့ သဘာဝဘေးအန္တရာယ်စီမံခန့်ခွဲမှုဆိုင်ရာ ဥပဒေ ပုဒ်မ ၂၅ နဲ့ တရားရုံးကစွဲချက်တင်ဖို့အမိန့်ချလိုက်ပါတယ်။
ဒီနေ့ အောက်တိုဘာ ၁၁ ရက် မနက် ၁၀ နာရီ ခွဲက နေပြည်တော်ကောင်စီအထူးတရားရုံးမှာ ဒီအမှုတွေကို စွဲချက်တင်ဖို့ တရားသူကြီးက အမိန့်ချ တာလို့ ရှေ့နေ တွေဆီကသိရပါတယ်။
စွဲချက်တင်တဲ့အပေါ် သမ္မတ ရော ၊ဒေါ်အောင်ဆန်းစုကြည်ကပါ သူတို့မှာ အပြစ်မရှိကြောင်း တရားရုံးမှာ ထွက်ဆိုတယ်လို့ တရားလွှတ်တော် ရှေ့နေ ဦးခင်မောင်ဇော်က ပြောပါတယ်။
စွဲချက်တင်ပြီးတဲ့နောက်မှာတော့ ဒီအမှုနဲ့ပတ်သက်ပြီး ရဲမှူးကြီးမြင့်နိုင်နဲ့ ရဲအရာရှိ လှိုင်ဝင်းတို့ကို ပြန်ခေါ်သက်သေအဖြစ် စစ်ဆေးဖို့ ခေါ်ထားတယ်လို့ သိရပါတယ်။
Public Service Announcement
အဲဒီနောက် ပို့ကုန်သွင်းကုန်ဥပဒေ နဲ့ ဒေါ်အောင်ဆန်းစုကြည်ကို စွဲဆိုထားတဲ့အမှုကို စစ်ဆေးရာ ဆက်သွယ်ရေးဝန်ကြီးဌာနက လက်ထောက် ညွှန်ကြားရေးမှူး ဦးစည်သူအောင် က တရားလိုသက်သေအဖြစ် လာရောက်ထွက်ဆိုပါတယ်။
နေပြည်တော်က ဒေါ်အောင်ဆန်းစုကြည်နေအိမ်မှာ စကားပြောစက်တွေ နဲ့ Jammer တွေ တွေ့တယ်ဆိုပြီး ပို့ကုန်သွင်းကုန်ဥပဒေ ၊ဆက်သွယ်ရေးဥပဒေတွေနဲ့ တရားစွဲထားတာပါ။
အဲဒီအမှုမှာ တရာလိုသက်သေအဖြစ် လာရောက်ထွက်ဆိုသူ လက်ထောက် ညွှန်ကြားရေးမှူး ဦးစည်သူအောင် က Jammer ကိစ္စသာ တရားရုံးမှာ သက်သေထွက်ဆိုတယ်လို့ သိရပါတယ်။
ဒေါ်အောင်ဆန်းစုကြည်ကို ပို့ကုန်သွင်းကုန်ဥပဒေ ၊ဆက်သွယ်ရေးဥပဒေတွေ နဲ့ စွဲချက် တင်မတင် ကိုတော့ ဒီတပတ်ရုံးချိန်းမှာ မဆုံးဖြတ်တော့ဘဲ လာမယ့်အပတ်ကို ရွှေ့လိုက်တယ်လို့ တရားလွှတ်တော် ရှေ့နေ ဦးခင်မောင်ဇော်က ပြောပါတယ်။
ဒီနေ့ သမ္မတ နဲ့ ဒေါ်အောင်ဆန်းစုကြည်ကို စွဲချက် တင်တဲ့ သဘာဝဘေးအန္တရာယ်စီမံခန့်ခွဲမှု ပုဒ်မ ၂၅ ကတော့ ရွေးကောက်ပွဲကာလမှာ မဲဆွယ်စည်းရုံးရေး ယာဉ်တန်းကို ထွက်နှုတ်ဆက်လို့ ဆိုကာ စစ်ကောင်စီက စွဲဆိုထားတာပါ။
ဒီပုဒ်မဟာ ထောင်ဒဏ် ၃ နှစ်အထိ ချနိုင်တဲ့ ပုဒ်မလည်းဖြစ်ပါတယ်။
