စစ်ကောင်စီတပ်ရဲ့ လက်နက်ကြီးပစ်ခတ်မှုကြောင့် ကော့ကရိတ်မြို့အနီး ရွာသစ်ရွာက ဒေသခံနေအိမ် ၂ လုံး ပျက်စီးသွားခဲ့ပြီး ဒေသခံအများအပြား ထွက်ပြေးတိမ်းရှောင်နေရတယ်လို့ သတင်းရရှိပါတယ်။
ဒီကနေ့ မနက်ပိုင်းက ရွာသစ်ကျေးရွာထဲကို စစ်တပ်က လက်နက်ကြီးနဲ့ ပစ်ခတ်ခဲ့ပြီး ရွာသစ်ရွာက ဒေသခံပြည်သူနေအိမ် ၂ လုံးနဲ့ အိမ်မွေးတိရိစ္ဆာန်တွေ ထိခိုက်ပျက်စီးသွားခဲ့တယ်လို့ ဒေသခံတွေက ပြောပါတယ်။
“ကျနော့်အဒေါ်အိမ်ထိသွားတာပေါ့။ အိမ်ခေါင်မိုးတည့်တည့်ပဲ။ စစ်တပ်က ရွာထဲကိုလက်နက်ကြီးနဲ့ပစ်တာ။ အိမ်က ဆောက်ထားတာမကြာသေးဘူး။ အခု ကျနော့်အဒေါ်လည်း နေမကောင်းဖြစ်နေတယ်။ အခက်အခဲလည်းအများကြီးကြုံနေရတယ်” လို့ ဒေသခံတစ်ဦးက ပြောပြပါတယ်။
ပြီးခဲ့တဲ့ အောက်တိုဘာ ၁၂ ရက်ကလည်း စစ်ကောင်စီရဲ့ လက်နက်ကြီးကြောင့် ရွာသစ်ရွာက ဒေသခံတစ်ဦးရဲ့နေအိမ်ကို လက်နက်ကြီးကျည်ထိမှန် ပျက်စီးသွားခဲ့သေးတာ ဖြစ်ပါတယ်။
Public Service Announcement
ဒီလေးရက်တာအတွင်းမှာ အကြမ်းဖက်စစ်တပ်ဘက်က ကော့နွဲ့ ရွာသစ် ကျေးရွာတွေထဲကို လက်နက်ကြီးအချက်ပေါင်း ၁၆၀ ကျော်ပစ်ခတ်ခဲ့ပြီး လူနေအိမ်အနည်းဆုံး ၆ လုံးခန့် ပျက်စီးသွားခဲ့တယ်လို့ နယ်မြေခံ KNLA တပ်ဖွဲ့ရဲ့ မှတ်တမ်းများအရ သိရပါတယ်။
အောက်တိုဘာ ၁၁ ရက်ကစပြီး ကော့ကရိတ်မြို့အနီး ကော့နွဲ့ ရွာသစ်ကျေးရွာမှာဖြစ်ပွားခဲ့တဲ့ တိုက်ပွဲကြောင့် အိမ်ခြေ ၁၀၀ ကျော် ထွက်ပြေးပုန်းရှောင်နေခဲ့ရပြီး ရွာသားတွေဟာ စစ်ကောင်စီတပ်ရဲ့ ပေါ်တာခိုင်းစေတာနဲ့ နှိပ်စက်ခံရတာတွေကို ကြောက်ရွံ့နေကြတယ်လို့ ကရင်လူ့အခွင့်ရေး (KHRG)အဖွဲ့ရဲ့ သတင်းထုတ်ပြန်ချက်အရ သိရပါတယ်။
