အကြမ်းဖက်စစ်ကောင်စီတပ်၏ လူသတ်၊ လူနေအိမ်မီးရှို့မှုများကို လက်တုန့်ပြန်မည်ဟု ချင်းအမျိုးသားအဖွဲ့ချုပ်/ချင်းအမျိုးသားကာကွယ်ရေးတပ်ဖွဲ့က အောက်တိုဘာ ၁၄ရက်နေ့စွဲဖြင့် ကြေညာသည်။
အာဏာကို လက်နက်အားကိုးဖြင့် မတရားရယူထားပြီး ပြည်ထောင်စုတစ်ဝှမ်းလုံးရှိ ရဟန်းရှင်၊လူပုဂ္ဂိုလ်များကို နေ့စဉ်နှင့်အမျှ အဓမ္မဖမ်းဆီးသတ်ဖြတ်ကာ စစ်ရာဇဝတ်မှုကျူးလွန်နေသော စစ်ကောင်စီတပ်များသည် ချင်းပြည်နယ် ဖလမ်းမြို့နယ်၊ သူဖေကျေးရွာရှိ အပြစ်မဲ့ ရွာသားနှစ်ဦးကို လူမဆန်စွာဖြင့် အောက်တိုဘာ ၁၃ ရက်က ပစ်သတ်ခဲ့သည်။
ထို့အပြင် ရမ်းကားသော စစ်ကောင်စီတပ်သားများသည် ၎င်းတို့ခြေချရာ လမ်းတစ်လျှောက် ကျေးရွာများရှိ ပြည်သူများကို သေနတ်ပစ်ဖောက် ခြိမ်းခြောက်ခြင်း၊ အိမ်မွေးတိရစ္ဆာန်များ၊ လူအသုံးအဆောင်ပစ္စည်းများကို လုယက်ခြင်းစသည်တို့ကို ကျူးလွန်ခဲ့ကြောင်း သိရသည်။
ဖလမ်းမြို့နယ် ရီလ်သီးကျေးရွာရှိ ဘုရားကျောင်းအပါအဝင် ရွာလုံးကျွတ်နှင့် တလန်ရောန်ကျေးရွာရှိ လူနေအိမ် ၁၂လုံးကို မီးရှို့ဖျက်ဆီးခဲ့ကြသည်ဟု ချင်းအမျိုးသားအဖွဲ့ချုပ်က ဆိုသည်။
Public Service Announcement
ထိုကဲ့သို့ လူမဆန်သောလုပ်ရပ်များ၊ စစ်ရာဇဝတ်ကို ကျူးလွန်သော စကစတပ်များကို ချင်းအမျိုးသားအဖွဲ့ချုပ်၊ချင်းအမျိုးသားကာကွယ် ရေးတပ်ဖွဲ့ (CNO/CNDF) အနေဖြင့် ဆက်လက် ၍ ခုခံကာကွယ်တိုက်ခိုက်မည့်အပြင် ယခုလုပ်ရပ်များအတွက် လက်တုန့်ပြန်သွားမည်ဟု အသိပေးသည်။
ချင်းပြည်နယ်တွင် အင်အားအဆမတန်တိုးချဲ့နေသည့် စစ်ကောင်စီတပ်များနှင့် ချင်းအမျိုးသားတပ်ဦး CNA နှင့် ချင်းဒေသကာကွယ်ရေးတပ်ဖွဲ့ CDFတို့က ခုခံတိုက်ပွဲများမှာ အောက်တိုဘာ ၁၄ ရက်ကစ၍ ပြင်းထန်နေသည်။
