လျှပ်စစ်မီတာခများ အတင်းအကြပ်ကောက်ခံနေသည့် လျှပ်စစ်ဝန်ထမ်းများကို စံနမူနာအနေဖြင့် အရေးယူရန်ရှိကြောင်း အမျိုးသားညီညွတ်ရေးအစိုးရအဖွဲ့ လျှပ်စစ်နှင့်စွမ်းအင်ဝန်ကြီးဌာန၊ ဒုတိယဝန်ကြီး ဦးမော်ထွန်းအောင်ကပြောသည်။
အကြမ်းဖက်စစ်ကောင်စီက မီတာခများကို လက်နက် ကိုင်ပြီး လက်ကောက်နေကြောင်းနှင့် အချို့မြို့နယ်များ မီတာမဆောင်သူများကို ဖမ်းဆီးနေသည်ဟု ဒေသခံများကပြောသည်။
“စာထုတ်ဖို့တော့ရှိတယ်။ နောက်တခုကတော့ ပီဒီအက်ဖ်တွေက ပါဝါသုံးနိုင်တဲ့ အခြေအနေပေါ်မူတည်မယ်။စံနမူနာတွေတော့ လာနိုင်တယ်”ဟု အမျိုးသားညီညွတ်ရေးအစိုးရအဖွဲ့၊ လျှပ်စစ်နှင့်စွမ်းအင် ဒုတိယဝန်ကြီး ဦးမော်ထွန်းအောင်က ပြောသည်။
အကြမ်းဖက်စစ်တပ်က နိုင်ငံအာဏာကို သိမ်းယူပြီးနောက် လူထုကအာဏာဖီဆန်ရေးလမ်းစဉ်အဖြစ် အခွန်အခပေးဆောင်ခြင်းများကို ငြင်းဆိုခဲ့ကြသည်။ထိုထဲတွင် လျှပ်စစ်မီတာခများ မပေးခြင်းလည်းပါဝင်သည်။
Public Service Announcement
အကြမ်းဖက်စစ်ကောင်စီသည် လူထုစီမှ လျှပ်စစ်မီတာခများကို နိုဝင်ဘာလကုန်အပြီးသတ်ကောက်ယူရန် လျှပ်စစ်နှင့်စွမ်းအင်ဝန်ကြီးဌာနက ဖိအားပေးထားသည်။
ထိုကြောင့် လျှပ်စစ်ဝန်ထမ်းများက မြို့နယ်အလိုက် လျှပ်စစ်မီတာခများကို လက်နက်ကိုင်များနှင့် အတင်းအကြပ်လိုက်လံကောက်ခံနေခြင်းဖြစ်သည်။
အချို့မြို့နယ်များတွင် မီတာမဆောင်သူများကို ဖမ်းဆီးမူများရှိသည်ဟုလည်း ဆိုသည်။ အင်းစိန်မြို့နယ်ရှိ ရပ်ကွက်တချို့တွင် မီတာခ ငါးလမဆောင်သည့် အိမ်များကို အကြမ်းဖက်စစ်ကောင်စီက အောက်တိုဘာ ၁၆ ရက်မနက်ပိုင်းက ဖမ်းဆီးသွားသည်ဟု ဆိုသည်။
အမျိုးသားညီညွတ်ရေးအစိုးရအဖွဲ့က အများပြည်သူအတွက် လျှပ်စစ်မီတာခများကို ၂၀၂၁ နှစ်ကုန်အထိ ကင်းလွတ်ခွင့်ပေးထားသည်။
ရန်ကုန်တိုင်း ပြည်သူလူထုက ၉၈ ရာခိုင်နှုန်း၊ မန္တလေးတိုင်းက ၉၇ ရာခိုင်နှုန်း၊ ကျန် တိုင်းနှင့် ပြည်နယ်တွေက ၈၀ ရာခိုင်နှုန်းခန့်က လျှပ်စစ်မီတာခတွေ မပေးဘဲ စစ်ကောင်စီကို ဆန့်ကျင်သပိတ်မှောက်နေကြသည်ဟု အမျိုးသားညီညွတ်ရေးအစိုးရအဖွဲ့က ထုတ်ပြန်ထားသည်။
ထိုသို့ လျှပ်စစ်မီတာ မဆောင်ခြင်းကြောင့် အကြမ်းဖက်စစ်ကောင်စီသည် ကျပ်ဘီလီယံ ၂၅၀၀ ခန့်နစ်နာနေသည်ဟုလည်း ဆိုထားသည်။
(မီတာခအတင်းအကြပ်ကောက်ခံနေသူများကို တွေ့ရစဥ်)
