ကုလသမဂ္ဂအထွေထွေအတွင်းရေးမှူးချုပ်ရဲ့ မြန်မာနိုင်ငံဆိုင်ရာအထူးကိုယ်စားလှယ်အသစ်အဖြစ် စင်ကာပူနိုင်ငံသူ နိုလန်းဟေးဇာကိုခန့်အပ်တယ်လို့ အတွင်းရေးမှူးချုပ်က မနေ့(အောက်တိုဘာ၂၅)က ကြေညာပါတယ်။
ပြီးခဲ့တဲ့ရက်ပိုင်းက တာဝန်ပြီးဆုံးခဲ့တဲ့ ဆွစ်ဇာလန်သံတမန် ခရစ်စတင်းရှယန်နာဘာဂျီနာနေရာကို အသက် (၇၃) နှစ်အရွယ် တီမောလက်စတေးနိုင်ငံဆိုင်ရာ ကုလအတွင်းရေးမှူးချုပ်ရဲ့အထူးအကြံပေးထမ်းဆောင်ခဲ့ဖူးသူ ဟေးဇာကိုခန့်အပ်ခဲ့တာဖြစ်ပါတယ်။
မစ္စစ်ဟေးဇာဟာ ၂၀၀၇ ကနေ ၂၀၁၄ အတွင်း အာရှ-ပစိဖိတ်ဆိုင်ရာ ကုလသမဂ္ဂစီးပွားနှင့်လူမှုရေးရာကော်မရှင်ရဲ့ အမှုဆောင်အတွင်းရေးမှူးအဖြစ် တာဝန်ထမ်းဆောင်တဲ့ပထမဆုံးအမျိုးသမီး ဖြစ်ပြီး အာရှ-ပစိဖိတ် ပိုမိုတိုးတက်ရေး ဒေသတွင်းပူးပေါင်းဆောင်ရွက်မှုကို အားစိုက်ခဲ့သူ လည်းဖြစ်ပါတယ်။
မြန်မာနိုင်ငံနဲ့ပတ်သက်လို့ မစ္စစ်ဟေးဇာဟာ ၂၀၀၈-၁၉ ကာလအတွင်း နာဂစ်ဆိုင်ကလုန်းနောက်ပိုင်း ပြန်လည်တည်ဆောက်ရေးကြိုးပမ်းမှုတွေ၊ ဖွံ့ဖြိုးမှုနဲ့ ဆင်းရဲမှုလျှော့ချရေးအတွက် မြန်မာခေါင်းဆောင်တွေနဲ့ တွေ့ဆုံဆွေးနွေးမှုဦးဆောင်ခဲ့ကာ အာဆီယံ၊ မြန်မာအစိုးရနဲ့ ကုလသမဂ္ဂတို့ အကြားနီးကပ်စွာ လုပ်ဆောင်ခဲ့ပါတယ်။
Public Service Announcement
မစ္စစ်ဟေးဇာဟာ စင်ကာပူတက္ကသိုလ်ကနေ ဝိဇ္ဇာဘွဲနဲ့ မဟာသိပ္ပံဘွဲ့တွေ ရရှိခဲ့ပြီး ဗြိတိန်ရှိ ကိန်းဘရစ်ချ်တက္ကသိုလ်ကနေ လူမှုသိပ္ပံ ဒေါက်တာဘွဲ့ ရရှိခဲ့သူဖြစ်ပါတယ်။
ဓာတ်ပုံ – The Straits Times
