ချင်းပြည်နယ်တောင်ပိုင်းသို့ စစ်အင်အားဖြည့်တင်းရန် မင်းတပ်မှ မတူပီမြို့သို့သွားရောက်သည့် စစ်ကောင်စီယာဉ်တန်းသည် ရာသီဥတုနှင့် ကားလမ်းမြေပြိုမှုကြောင့် လမ်းတစ်ဝက်မှ ရှေ့မဆက်နိုင်ဘဲ ဖြစ်နေကြောင်း ချင်းအမျိုးသားတပ်ဦး(CNF) ပြောရေးဆိုခွင့်ရှိသူ ဆလိုင်းထက်နီက ပြောသည်။
“တောင်ပိုင်းအခြေအနေက မင်းတပ်ဘက်ကနေ မတူပီ ဗျူဟာဘက်ကို တက်လာတဲ့ ကားတွေ က မရောက်သေးဘူး။ လမ်းတစ်ဝက်မှာ သောင်တင်နေကြတယ်။ အခု ရာသီဥတုက ကြမ်းတယ် ပြီးတော့ ကားလမ်းက မြေပြိုနေတာဆိုတော့ သူတို့ ထင်သလောက်တိုးမလာနိုင်ဘူး” ဟု ၎င်းက ဆိုသည်။
စစ်ကောင်စီတပ်များသည် အောက်တိုဘာ လလယ်ကတည်းက မင်းတပ်မှ မတူပီမြို့သို့ ထွက်ခွာသွားခြင်းဖြစ်ပြီး အဆိုပါ လမ်းခရီးသည် မိုင်၁၀၀ကျော်သာ ဝေးသည်။
ယခုရက်ပိုင်းအတွင်း ချင်းပြည်နယ် တောင်ပိုင်းနှင့် မြောက်ပိုင်းဒေသများ၌ တိုက်ပွဲဖြစ်ပွားမှုမရှိကြောင်း၊ သို့ရာတွင် ချင်းပြည်နယ် မြောက်ပိုင်း ဟားခါး- ဖလမ်းလမ်းရှိ ဒေသခံ ပြည်သူများ၏ နေအိမ် ၁၀လုံးထက်မနည်းကို စစ်ကောင်စီတပ်က ထပ်မံမီးရှို့ခဲ့ကြောင်း ဆလိုင်းထက်နီက ပြောသည်။
Public Service Announcement
ထို့ပြင် မြို့လုံးကျွတ်နီးပါး စစ်ဘေးတိမ်းရှောင်နေသည့် ထန်တလန်မြို့ပေါ်မှ လူနေအိမ်များကို စစ်ကောင်စီတပ်က ဖောက်ထွင်းပြီး စားစရာနှင့် အသုံးအဆောင်များယူဆောင်သွားခြင်းများရှိဟု ၎င်းက ဆိုသည်။
