ရန်ကုန်မြို့ လှိုင်မြို့နယ်ရဲစခန်းကို ယနေ့(အောက်တိုဘာ ၃၁)နေ့လယ်ပိုင်းတွင် လက်နက်ကြီးဖြင့် ပစ်ခတ်တိုက်ခဲ့ကြောင်း 44st-UG အဖွဲ့က ထုတ်ပြန်သည်။
“44st-UG နှင့်မဟာမိတ်အဖွဲ့အစည်းများမှ ယနေ့နေ့လည် ၁၂:၁၀ တွင် လှိုင်မြို့နယ် ရဲစခန်းအား လက်နက်ကြီးဖြင့် လေးချက်ပစ်ခတ်တိုက်ခိုက်နိုင်ခဲ့ပြီး မိမိတို့ရဲဘော်များ အန္တရာယ်ကင်းစွာပြန်လည်ဆုတ်ခွါလာနိုင်ခဲ့ကြောင်း မိဘပြည်သူများထံ အသိပေးတင်ပြလိုက်ပါသည်”ဟု ထုတ်ပြန်ချက်တွင် ဖော်ပြသည်။
အဆိုပါတိုက်ခိုက်မှုအတွင်း သုံးချက်မှာ စခန်းတွင်းကျရောက်ပေါက်ကွဲခဲ့ပြီး တစ်ချက်မှာ ကျည် ချို့ယွင်းမှုကြောင့် မပေါက်ကွဲခဲ့ကြောင်း 44st-UG အဖွဲ့က ဆိုသည်။
“စခန်းအပြင်ဘက်က ရဲကင်းကိုထိတာ။ အဲမှာအစောင့်တွေရှိတော့ သုံးယောက်ထိပြီး စိုးရိမ်ရအခြေအနေလို့ သိရတယ်။ ပစ်တာက အဝေးကနေ ရှော့တိုက်ဒုံးနဲ့ ပစ်တာလို့ ပြောတယ်”ဟု လှိုင်မြို့နယ်နေ ပြည်သူတစ်ဦးက ပြောသည်။
ပေါက်ကွဲမှုဖြစ်သည့်နေရာမှာ လှိုင်ရဲစခန်းရှေ့ တပ်ဘောလုံးကွင်းနှင့် ရန်ကုန်ယူနိုက်တက်ပိုင် ဘောလုံးကွင်းဘေးရဲကင်းစခန်းတွင် ပေါက်ကွဲခြင်းဖြစ်ကြောင်း အထက်ပါဒေသခံက ဆိုသည်။