ကိုဗစ်ကူးစက်မှုမြင့်မားလာလို့ပိတ်လိုက်ရတဲ့ အခြေခံပညာကျောင်းတွေကို ဒီနေ့ နိုဝင်ဘာလ ၁ ရက်နေ့မှာ စစ်ကောင်စီက ပြန်လည်ဖွင့်လှစ်ရာမှာတော့တက်ရောက်သူ မရှိသလောက်နည်းပါးတာကိုတွေ့ရပါတယ်။
ရန်ကုန်မြို့က ကျောင်းတွေမှာဆို စာသင်ဆောင် တွေမှာ စာသင်ခန်း ၁ ခန်း ၊ ၂ ခန်းလောက်သာ ဖွင့်ထားနိုင်ပါတယ်။
ကျောင်းကို စာလာသင်တဲ့ဆရာမ အချို့ဟာလည်း အရပ်ဝတ်နဲ့လာကြတာကိုတွေ့ရတယ်လို့ မျက်မြင်တွေ့ရသူတွေကဆိုပါတယ်။
ရန်ကုန်တိုင်းက မြို့နယ်တွေမှာတော့ ရပ်ကွက်ထဲမှာ ရှိတဲ့ကျောင်း ရှေ့ ကိုဖြတ်သန်းသွားလာလို့မရအောင် ဒီနေ့မနက်မှာ ပိတ်ထားတာတွေ့ရပါတယ်။
Public Service Announcement
ဒါအပြင် စာသင်ကျောင်း ဝင်ပေါက် ၊ ထွက်ပေါက်တွေရှေ့မှာ အရပ်ဝတ်နဲ့ လုံခြုံရေးချထားတာလည်းရှိနေပါတယ်။
စစ်ကောင်စီဟာ အာဏာသိမ်းပြီးနောက် တိုင်းပြည် ပုံမှန်အတိုင်းလည်ပတ်နေတာကို နိုင်ငံတကာကိုပြသချင်တဲ့အတွက် ကိုဗစ်ကြောင့် ပိတ်ထားရတဲ့ ကျောင်းတွေကို အတင်းပြန်ဖွင့်ခဲ့ပါတယ်။
ကျောင်းသားမိဘပြည်သူတွေက စစ်အာဏာသိမ်းမှုကို ဆန့်ကျင်တဲ့အနေနဲ့ ကျောင်းအပ်နှံမှုကို မလုပ်ဆောင်ခဲ့ကြပါဘူး။
ဒါပေမယ့် စစ်ကောင်စီဟာ ရှိတဲ့ကျောင်းသားနဲ့ ကျောင်းတွေကိုပြန်ဖွင့်ခဲ့ပါတယ် ။
စာသင်ကျောင်း တွေအနီးမှာ ပေါက်ကွဲမှု အချို့ရှိခဲ့ပြီး ဒါဟာ မလိုလားသူတွေက ကျောင်းတွေဖွင့်လို့မရအောင်ခြိမ်းခြောက်တာလို့ စစ်ကောင်စီက စွပ်စွဲထားပါတယ်။
ကိုဗစ်တတိယလှိုင်းနဲ့ကြုံတဲ့အခါမှာတော့ ကျောင်းတွေကို ပိတ်လိုက်ရပါတယ် ။
ဒါပေမယ့် စစ်ကောင်စီဟာ အသက် ၁၂ နှစ်အထက်ကျောင်းသူ၊ကျောင်းသားတွေကို တရုတ်ကိုဗစ်ကာကွယ်ဆေးထိုးပေးပြီး ကျောင်းတွေပြန်ဖွင့်ဖို့ လုံးပမ်းခဲ့တာပဲဖြစ်ပါတယ်။
အဲဒီနောက် ဒီနေ့ နိုဝင်ဘာလ ၁ ရက်နေ့မှာ မြို့နယ်အချို့က လွဲပြီး နိုင်ငံအဝှမ်းက အခြေခံပညာကျောင်းတွေကို ပြန်ဖွင့် ခဲ့ပေမယ့် တက်ရောက်သူ မရှိသလောက်နည်းပါးခဲ့တာပဲဖြစ်ပါတယ်။
