တောင်ဒဂုံမြို့နယ်တွင် အာဏာသိမ်းစစ်ကောင်စီသတင်းပေး ထောင်ထွက်လူမိုက်နဂါးလေးသေနတ်ဖြင့်အပစ်ခံရပြီးနောက် အမည်မသိလက်နက်ကိုင်အဖွဲ့နှင့် အကြမ်းဖက်စစ်ကောင်စီတို့ကြား အပြန်အလှန် ပစ်ခတ်မှုဖြစ်ပွားခဲ့ကြောင်း ဒေသခံအချို့ကသည်။
တောင်ဒဂုံမြို့သစ်တောင်ပိုင်း (၂၀) ရပ်ကွက်တွင်စစ်တပ်ထောက်ခံသူ ထောင်ထွက်လူမိုက် တစ်ဦးဖြစ်သည့် နဂါးလေး(ခ) အောင်နိုင်မြင့်ကို တော်လှန်ရေးအဖွဲ့တစ်ဖွဲ့က ယနေ့ နေ့ခင်းပိုင်းတွင် သေနတ်ဖြင့်ပစ်ခတ်ခြင်းဖြစ်ပြီး နဂါးလေးခါးတွင် ကျည်ဆံထိမှန်သွားသည်ဟုဒေသခံများက ပြောသည်။
“စစ်တပ်နဲ့ပေါင်းပြီး လူပါးဝနေတဲ့ လူမိုက်ကို လာရှင်းတာပါ”ဟု တောင်ဒဂုံမြို့ခံတစ်ဦးက ပြောသည်။အပစ်ခံရသောနဂါးလေးသည် ကျည်ဆံထိမှန်သွားသော်လည်း သေဆုံးခြင်း ရှိ၊ မရှိကို အတည်မပြုနိုင်ကြောင်း ဒေသခံများက ဆက်ပြောသည်။
” လူမိုက် နဂါးလေးကို ပျောက်ကြားတစ်ဖွဲ့က အောင်ဗောဓိဘုရားနောက်နားမှာ သေနတ်နဲ့ လာပစ်တယ်လို့ သိရတယ်။ နဂါးလေးက သေနတ်ကျည်ဆန်ခါးကိုပဲ ထိသွားပြီး မသေသွားဘူး။ စစ်တပ်က နဂါးလေးပစ်ခံရလို့ တစ်ရပ်ကွက်လုံး ပတ်စစ်တဲ့အချိန် (၁၉) ရပ်ကွက်နားမှာ အပြန်အလှန်ပစ်ကြတယ်လို့ သိရတယ်။ နှစ်ဖက်လုံး ဒဏ်ရာရတာတွေ ရှိတယ်လို့တော့ ကြားတယ်။ အခုတော့ ပြန်ငြိမ်သွားပြီ။ စစ်တပ်ကတော့ ရပ်ကွက်ကို ပတ်ပြီး တောက်လျောက်စစ်နေပါတယ် ” ဟု ရပ်ကွက်နေပြည်သူတစ်ဦးက ပြောသည်။
စစ်ကောင်စီသတင်းပေးထောင်ထွက်လူမိုက်သေနတ်ဖြင့်ပစ်ခတ်ခံရပြီးနောက် ရောက်လာသောစစ်ကောင်စီတပ်သားများနှင့် တော်လှန်ရေးအဖွဲ့တို့မှာတောင်ဒဂုံမြို့နယ် (၂၀) ရပ်ကွက် ၊အောင်ဗောဓိဘုရားအနီးတွင် ယနေ့မွန်းတည့် ၁၂ နာရီခန့်က နှစ်ဖက်အပြန်အလှန်ပစ်ခတ်မှုဖြစ်ပွားခဲ့ခြင်းဖြစ်သည်။
ထိုပစ်ခတ်မှုဖြစ်ပြီးနောက် အကြမ်းဖက်စစ်သားများက တောင်ဒဂုံမြို့နယ်ကို ပိတ်ဆို့စစ်ဆေးမူများပြုလုပ်ခဲ့ပြီး နေအိမ်များကို တစ်အိမ်တက်တစ်အိမ်ဆင်းလိုက်လံရှာဖွေနေသည်ဟု ဒေသခံများက ပြောသည်။ နဂါးလေးကိုသေနတ်ဖြင့်ပစ်ခတ်သည့်သူများသည် ထိုရပ်ကွက်အတွင်း ပုန်းနေသည်ဟုဆိုကာ အကြမ်းဖက်စစ်သားများကတစ်အိမ်တက် တစ်အိမ်ဆင်းလိုက်လံရှာဖွေနေသည်။
(ဓါတ်ပုံ-ထောင်ထွက်လာပြီးစစ်ကောင်စီသတင်းပေးလုပ်နေပြီးယနေ့သေနတ်ဖြင့်အပစ်ခံရသောနဂါးလေး)