စစ်ကောင်စီတပ်သားအလောင်းများနှင့် လက်နက်ခဲယမ်းအချို့တိုက်ပွဲနယ်မြေ၌ထပ်တွေ့ဟု MNDAAထုတ်ပြန်

အာဏာသိမ်းစစ်ကောင်စီတပ်မှ စွန့်လွှတ်ခဲ့သည့် တပ်သားအလောင်းများနှင့် လက်နက်ခဲယမ်းအချို့ကို တိုက်ပွဲဖြစ်ပွားရာနေရာများမှ တွေ့ရှိခဲ့ရကြောင်း ကိုးကန့်လက်နက်ကိုင်တပ်ဖွဲ့(MNDAA)က ယနေ့(နိုဝင်ဘာ၈ ရက်) ထုတ်ပြန်သည်။

MNDAAက နိုဝင်ဘာ ၆ရက် တိုက်ပွဲအခြေအနေကို ဖော်ပြရြ ယခုရက်ပိုင်းအတွင်း စစ်ကောင်စီတပ်သည် MNDAA၏ ကျင်ကော်တစ်တပ်စခန်းကို စဉ်ဆက်မပြတ်ထိုးစစ်ဆင်နေကြောင်း တိုက်ပွဲဖြစ်ပွားရာ နေရာများတွင် စစ်ကောင်စီမှ စွန့်လွတ်ခဲ့သော တပ်သားအလောင်းများတွေ့ရှိပြီး လက်နက်ခဲယမ်းအချို့များသိမ်းဆည်းရမိကြောင်း၊ စစ်ကောင်စီ၏ ရှေ့တန်းရဲဘော်များ၏ လုပ်ရပ်သည် တိုက်ပွဲဆန့်ကျင်သော လက္ခဏာကို ပြနေခြင်းဖြစ်ကြောင်း ဖော်ပြထားသည်။

နိုဝင်ဘာ ၅ရက် နေ့လည်ပိုင်းကလည်း စစ်ကောင်စီတပ်သည် MNDAA၏ ကျင်ကော်တစ်တပ်စခန်းကို နှစ်ကြိမ်ထိုးစစ်ဆင်ခဲ့သော်လည်း တပ်ပြန်ဆုတ်သွားကြောင်း၊ထို့နောက် နှစ်ဖက်မှစစ်ရေး ဆက်လက် တင်းမာနေပြီး စစ်ကောင်စီမှ မုံးကိုးဗျူဟာနှင့် ကွမ်သာဒေသ ရှိလက်နက်ကြီးများဖြင့် ကျင်ကော်တစ် တပ်စခန်းကို ပစ်ခတ်ခဲ့ရာ MNDAA တပ်မှတစ်ဦး ဒဏ်ရာရရှိခဲ့ကြောင်း ထုတ်ပြန်ခဲ့သည်။

MNDAAနှင့် စစ်ကောင်စီတပ်တို့သည် ပန်ရင်လားပ တောင်ကုန်းတွင်လည်း တိုက်ပွဲဖြစ်ခဲ့ကြောင်း၊ ယင်း တိုက်ပွဲ၌ MNDAAတပ်မှ တပ်စိတ်မှူးတစ်ဦး ဒဏ်ရာရခဲ့ပြီး စစ်ကောင်စီတပ်၏ အကျအဆုံးမသိရကြောင်း ဖော်ပြထားသည်။

Public Service Announcement

စစ်ကောင်စီတပ်အနေဖြင့် မုံးကိုး၊ ဖောင်းဆိုင်၊ ပန်ဆိုင်း ဒေသများ၌ စစ်ရေးလှုပ်ရှားမှုများ ဆက်လက်ပြုလုပ်နေကြောင်း၊ တိုက်ပွဲများ ဆက်လက်ဖြစ်လာနိုင်ကြောင်း MNDAAက ထုတ်ပြန်ခဲ့သည်။