ချင်းပြည်နယ် ဟားခါးမြို့ရှိ ပြည်နယ် ရဲအရန်တပ်ရင်းတည်ရှိရာနေရာကို ချင်းလက်နက်ကိုင်ပူးပေါင်းတပ်ဖွဲ့က ယနေ့(နိုဝင်ဘာ၉ရက်)နံနက်တွင် ဝင်ရောက်တိုက်ခိုက်ခဲ့ရာ ရဲ ၇ဦးသေဆုံးကြောင်း ချင်းအမျိုးသားတပ်ဦး (CNF) ပြောရေးဆိုခွင့်ရှိသူ ဆလိုင်းထက်နီက PSသို့ ပြောကြားသည်။
CNF၏ တပ်ဖွဲ့ဖြစ်သည့် ချင်းအမျိုးသားတပ်မတော် (CNA) နှင့် ချင်းကာကွယ်ရေးတပ်ဖွဲ့(CDF) ပူပေါင်းအဖွဲ့သည် နံနက် ၆နာရီခန့်တွင် ဟားခါးရှိ ပြည်နယ်ရဲရုံးကို ဝင်ရောက် တိုက်ခိုက်ခဲ့ခြင်းဖြစ်သည်ဟုဆိုသည်။
“အဲဒီမှာ သူတို့ဘက်က ၇ယောက်ကျတာပေါ့။ အရင်တစ်ခါတက်လာတဲ့ စစ်ကြောင်း ( ဖလမ်းမှ ဟားခါးသို့ တက်လာသည့် စစ်ကြောင်း) နဲ့ ပါလာတဲ့ ရဲတပ်ရင်းတွေပေါ့။ ဟားခါး ပြည်နယ် ရဲစခန်းအတွင်းမှာ တိုက်ပွဲဖြစ်တာ။ သူတို့ဘက်က ၇ယောက်ကျတယ်။ ကျတဲ့အကြောင်းအရင်းက သူတို့ မနက်အစောကြီး အိပ်ယာထ မျက်နှာသစ်နေတဲ့အချိန်မှာ ကျွန်တော်တို့ သွားပစ်တာ” ဟု ဆလိုင်းထက်နီက ပြောသည်။
ထိုသို့ ပစ်ခတ်ပြီးနောက် ချက်ချင်းပြန်လည်ဆုတ်ခွာခဲ့ရာ ချင်းတပ်ဖွဲ့ဘက်မှ အထိအခိုက်မရှိဟု ဆိုသည်။
Public Service Announcement
