မန္တလေးတိုင်း မတ္တရာမြို့နယ်တွင် အမျိုးသားနေ့အကြို စစ်အာဏာရှင်ဆန့်ကျင်ရေးသပိတ်ကို ယနေ့ (နိုဝင်ဘာ ၂၇ရက်) နံနက်ပိုင်းက ပြုလုပ်ခဲ့သည်။
“အမျိုးသားနေ့အကြို စစ်အာဏာရှင်ဆန့်ကျင်ရေးလှုပ်ရှားမှုပေါ့။ အမျိုးသားနေ့ကို ကြိုဆိုတယ် စစ်အာ ဏာရှင်ကို ဆန့်ကျင်တာပေါ့”ဟု သပိတ်ဦးဆောင်သူ တစ်ဦးက ပြောသည်။
အဆိုပါ ဆန္ဒထုတ်ဖော်မှုကို လုံခြုံရေးအခြေအနေအရ မတ္တရာမြို့နယ် ကျေးလက်ဒေသ တစ်နေရာ၌ ပြုလုပ်ခဲ့ပြီး နွေဦးတော်လှန်ရေးကာလ၌ ကျဆုံးခဲ့သည့် သူရဲကောင်းများအား အလေးပြုကာ မတရားဖမ်းဆီးခံထားရသည့် ရဟန်းရှင်လူပြည်သူများအတွက် ဝမ်းနည်းကြေကွဲကြောင်း ဖော်ပြခဲ့ကြသည်။
“ အခု ဒီလှုပ်ရှားမှုတွေလုပ်တဲ့အခါ ဘာအခက်အခဲရှိလဲဆိုတော့ လှုပ်ရှားပြီးရင် ကျွန်တော်တို့ ပုန်းရတာပေါ့။” ဟု ဆန္ဒပြပွဲ ဦးဆောင်သူက ပြောသည်။ ဆန္ဒထုတ်ဖော်မှုများ ပြုလုပ်ရာဒေသရှိ ဒေသခံများကို စစ်ကောင်စီက ပစ်မှတ်ထား အကြမ်းဖက်ခြင်းမဖြစ်စေရန်အတွက် ကျေးရွာများနှင့် အနည်းငယ်ဝေးသည့် တောတောင်များ၊ ယာခင်းများ၌ ဆန္ဒထုတ်ဖော်မှုများ လုပ်ဆောင်နေခြင်းဖြစ်ကြောင်း ၎င်း ကဆိုသည်။
Public Service Announcement
ဒီမိုကရေစီရရှိရေး၊ ဖက်ဒရယ်ဒီမိုကရေစီပြည်ထောင်စုပေါ်ထွန်းရေး၊ စစ်အာဏာရှင်ကျရှုံးရေး၊ အကြမ်းဖက် လူသတ်စစ်ကောင်စီ အလိုမရှိကြောင်း စသည်တို့ကို ကြွေးကြော်ခဲ့ပြီး ဖမ်းဆီးထားသည့် ခေါင်းဆောင်များ၊ ပြည်သူများ၊ ကျောင်းသားများ၊ ဝန်ထမ်းများ၊အနုပညာရှင်များ ပြန်လွှတ်ပေးရန် တောင်းဆိုခဲ့သည်။
စစ်ကျွန်ပညာရေးစနစ်၊ သွေးစွန်းပညာရေးစနစ် အလိုမရှိကြောင်းလည်း ဆန္ဒထုတ်ဖော်ခဲ့ကြသည်။
