-လွတ်မြောက်လာပြီး တစ်လအကြာတွင် ကွယ်လွန်ခြင်းဖြစ်
အမျိုးသားဒီမိုကရေစီအဖွဲ့ချုပ်(NLD)ပါတီ၏ ဗဟိုပြန်ကြားရေးတာဝန်ခံတစ်ဦးဖြစ်သူ ကဗျာဆရာမုံရွာအောင်ရှင်သည် ယနေ့(နိုဝင်ဘာ၂၈ရက်))နံနက် ၆နာရီခန့်တွင် ကွယ်လွန်သွားကြောင်း မိသားစုနှင့် နီးစပ်သူများက အတည်ပြုသည်။
မုံရွာအောင်ရှင်သည် ယခင်က ပန်းနာရင်ကြပ်ရောဂါခံစားနေရသော်လည်း ယခုသေဆုံးရခြင်းမှာ နှလုံးသွေးကြောပိတ်သည့်ရောဂါကြောင့် နှလုံးရပ်သေဆုံးသွားခြင်းဖြစ်ကြောင်း စုံစမ်းသိရသည်။
ဖေဖော်ဝါရီ ၁ ရက်တွင် စစ်တပ်ကအာဏာသိမ်းပြီးနောက်ပိုင်း မုံရွာအောင်ရှင်အား ဖမ်းဆီးထိန်းသိမ်းခဲ့ပြီး အောက်တိုဘာ ၁၈ ရက်တွင် အခြားအကျဉ်းသားများနှင့်အတူ လွတ်ငြိမ်းချမ်းသာခွင့်ဖြင့် ပြန်လွတ်လာခဲ့သည်။
ထို့ကြောင့် လွတ်မြောက်လာပြီး တစ်လအကြာတွင် ကွယ်လွန်သွားခြင်း ဖြစ်သည်။
Public Service Announcement
ထိန်းသိမ်းထားရာမှ လွတ်မြောက်လာပြီးနောက် မိသားစုနှင့်အတူ တာမွေမြို့နယ်ရှိနေအိမ်၌အတူနေထိုင်ကာ ဆေးကုသမှုခံယူခဲ့ပြီး ပြီးခဲ့သည့်ရက်ပိုင်းကပင် သက်သာလာသည်ဆိုကာ ဆေးရုံမှပြန်ဆင်းလာခြင်းဖြစ်ကြောင်း မိသားစုနှင့် နီးစပ်သူများက ပြောသည်။
NLD ပါတီ၏ ဗဟိုပြန်ကြားရေးတာဝန်ခံလည်းဖြစ် ပါတီမှထုတ်ဝေသည့် ဒီလှိုင်းစာစောင်၏ အယ်ဒီတာချုပ်တစ်ဦးလည်းဖြစ်သည့်မုံရွာအောင်ရှင်သည် ကွယ်လွန်ချိန်၌ အသက် (၇၆)နှစ်ရှိပြီ ဖြစ်သည်။
