ဒေါ်အောင်ဆန်းစုကြည်ရင်ဆိုင်နေရတဲ့အမှု ၁၂ ထိဖြစ်လာ
ရဟတ်ယာဉ်ဌားစီးတာနဲ့ ရဟတ်ယာဉ်ဝယ်ယူရာမှာ နိုင်ငံဘဏ္ဍာငွေထိခိုက်နစ်နာတာတွေရှိတယ်ဆိုပြီး သမ္မတဦးဝင်းမြင့် ၊ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ လူကယ်ပြန်ဝန်ကြီး ဒေါက်တာဝင်းမြတ်အေးတို့ကို အဂတိပုဒ်မနဲ့ စစ်ကောင်စီက တရားစွဲလိုက်ပါတယ်။
သဘာဝဘေးအန္တရာယ်ကာကွယ်ရေးအတွက် ရဟတ်ယာဉ် တစ်စီးဌားရမ်းရာမှာ စာချုပ်မှာပါတဲ့ ပျံသန်းချိန်ထက် အသုံးပြုတဲ့ ပျံသန်းချိန်လျော့နည်းခဲ့တာကြောင့် နိုင်ငံဘဏ္ဍာငွေ ထိခိုက်နစ်နာတယ်ဆိုကာ တရားစွဲတာပါ။
ဒါအပြင် နိုင်ငံတော် ပိုင်ရဟတ်ယာဉ်တစ်စီးဝယ်ရာမှာလည်း ဘဏ္ဍာရေးစည်းကမ်းမလိုက်တာတာ ၊ ရဟတ်ယာဉ်မရောက်သေးဘဲ ဝန်ဆောင်ခကို ကြိုပေးထားတာ ၊ သဘာဝဘေးအန္တရာယ်တွေမှာ သုံးဖို့ ဘဏ္ဍာငွေကို ထိရောက်စွာမသုံးဘဲ ရဟတ်ယာဉ်ဝယ်ဖို့ ပေးချေတာတွေကြောင့် နိုင်ငံဘဏ္ဍာ ဆုံးရှုံးရတယ်လို့ စစ်ကောင်စီဘက်ကဆိုထားပါတယ်။
Public Service Announcement
ဒါကြောင့် လူကယ်ပြန်ဝန်ကြီး ဒေါက်တာဝင်းမြတ်အေး ၊ သမ္မတ ဦးဝင်းမြင့်နဲ့ ဒေါ်အောင်ဆန်းစုကြည်တို့ကို ဒီနေ့ မှာ နေပြည်တော် ၊ဘုရားကုန်း ရဲစခန်းမှာ အဂတိပုဒ်မ ၅၅ နဲ့တရားစွဲလိုက်တယ်လို့သိရပါတယ်။
ဒီပုဒ်မဟာ ထောင်ဒဏ် ၁၅ နှစ်ထိချနိုင်တဲ့ပုဒ်မလည်းဖြစ်ပါတယ်။
ဒါကြောင့် ဒေါ်အောင်ဆန်းစုကြည်ကို စစ်ကောင်စီက စွဲဆိုတဲ့ပုဒ်မ ၁၂ ခုထိရှိလာပြီး ဒီပုဒ်မတွေအရ ပြစ်ဒဏ်စုစုပေါင်း ၁၀၀ နီးပါးချဖို့ စီစဉ်နေတာတွေ့ရပါတယ်။
ဒီနေ့မှာ ဒေါ်အောင်ဆန်းစုကြည်ကို ရာဇသတ်ကြီး ပုဒ်မ ၅၀၅ (ခ)နဲ့ စွဲထားတဲ့အမှုကို အမိန့်ချ ဖို့ ရှိပေမယ့် မချတော့ဘဲ ဒီဇင်ဘာ ၆ ရက်ကိုရွှေ့ဆိုင်းလိုက်ပါတယ်။
ဒါပေမယ့် ဒီနေ့မှာတင်ပဲ ထောင်ဒဏ် ၁၅ နှစ်ချလို့ရတဲ့ ပုဒ်မ နဲ့ထပ်တိုးတရားစွဲလာတာပဲဖြစ်ပါတယ်။
